¹ Udah nya aku ninga nyawa ti inggar bejaku ari Rumah Sembiang nya ngagai melikat ke tujuh iku nya, “Mupuk meh kita lalu tuang tujuh igi mangkuk pengeringat Allah Taala nya ngagai dunya!” ² Melikat ti keterubah lalu mupuk, lalu nuang mangkuk iya ngagai dunya. Penyakit rumbak ti balat sereta bebau lalu pegari ba orang ke bisi kelai jelu, ti nyembah anak patung jelu nya. ³ Udah nya melikat ti kedua lalu nuang mangkuk iya ngagai tasik. Ai tasik lalu bebali nyadi baka darah orang ke mati, lalu semua utai ti idup dalam tasik nya, mati magang. ⁴ Udah nya melikat ti ketiga nuang mangkuk iya ngagai sungai, enggau ngagai mata ai, lalu ai sungai enggau mata ai bebali nyadi darah. ⁵ Aku lalu ninga melikat ke ngibun ai bejaku, “Ukum ti diberi Nuan endang lurus, O Allah Taala ti Kudus, Nuan ke diatu enggau ti udah! ⁶ Laban mensia udah munuh bala nembiak Tuhan enggau sida nabi, lalu diatu Nuan udah meri sida darah ke diirup sida. Sida endang patut ngirup nya!” ⁷ Aku lalu ninga nyawa bejaku ari alta, “Sigi amat, Tuhan Allah Taala ti Pemadu Bekuasa! Ukum ti diberi Nuan endang bendar sereta lurus!” ⁸ Udah nya melikat ti keempat nuang mangkuk iya ngagai mata hari, lalu mata hari dikemendarka nganguska mensia ngena api. ⁹ Mensia lalu angus laban pengangat ti balat, lalu sida nyumpah nama Allah Taala ti bisi kuasa atas semua penusah ti besai nya, tang sida enggai nesal ati ke dosa sida, sereta enggai ngemuliaka Iya. ¹⁰ Melikat ti kelima lalu nuang mangkuk iya ngagai kerusi diraja jelu nya, lalu semua perintah jelu nya dibalut pemetang. Orang nyau ngigit dilah diri laban balat tusah, ¹¹ lalu nyumpah Allah Taala ti di serega ketegal pemedis enggau rumbak sida. Tang sida enggai nesal ati ke utai ti udah dikereja sida. ¹² Melikat ti keenam lalu nuang mangkuk iya ba Sungai Eupratis. Sungai nya lalu rangkai, nyendiaka jalai ti deka ditengah bala raja ke datai ari timur. ¹³ Aku lalu tepedaka tiga iku roh ti kamah, ti baka gamal engkatak, pansut ari nyawa naga nya, enggau ari nyawa jelu nya, enggau ari nyawa nabi ti pelesu nya. ¹⁴ Sida nya roh antu ti ngereja kereja ajih, ke bejalai ngagai semua raja di dunya tu, lalu ngempuruka sida beperang lebuh Hari Besai Allah Taala ti Pemadu Bekuasa. ¹⁵ “Peda nuan, Aku datai baka penchuri! Beberekat meh orang ke dani, ke mengkang ngena gari diri, ngambika iya enda bejalai telanjai ngayanka tubuh diri!” ¹⁶ Sida roh antu nya lalu ngempuruka bala raja nya ba siti endur ti dikumbai Armagedon dalam Hebrew. ¹⁷ Melikat ti ketujuh lalu nuang mangkuk iya ngagai angin, lalu nyawa ti inggar bejaku ari kerusi diraja ti dalam Rumah Sembiang nya, ku iya, “Udah tembu!” ¹⁸ Kilat lalu nyelar, guntur meletup lalu beguru, tanah balat amat berenyang. Nadai tanah udah kala ngemalat nya berenyang kenyau ari mensia terubah diau di dunya tu. ¹⁹ Nengeri ti besai nya lalu pechah tiga, lalu semua nengeri dalam semua menua runtuh magang, lalu Allah Taala ingatka Babilon ti besai, lalu mejalka nengeri nya ngirup ari mangkuk pengeringat Allah Taala. ²⁰ Semua pulau di tasik rari magang, lalu semua bukit nadai agi ditemu. ²¹ Tekang ujan batu ti besai, pemerat sigi-sigi kira 50 kilogram, labuh ari langit lalu ninggang mensia. Mensia lalu nyumpah Allah Taala ketegal penusah laban ujan batu nya, laban ujan batu nya amat balat.