¹ Satontang tu juhut pelean berhala taboto do: “hita sude rap adong parbinotoan”. Parbinotoan, na songoni mambaen halak manjadi sombong, tapi holong mambangun. ² Anggo adong sahalak mangira, bahaso ia adong sada “Parbinotoan, sabotulna ia inda pe mandapot parbinotoan,songon na saharus di dapot ia. ³ Tapi halak na manghaholongi Allah, ia ditanda Allah. ⁴ Satontang tu namangan juhut pelean taboto do : inda adong berhala di dunia dohot inda adong Allah na asing sian pado Allah na Esa. ⁵ Harana harupe adong aha na didok “allah”, baik di sorga, bope di portibion - jana memang botul adong adong bahat “allah” jana bahat “tuhan” na songoni. ⁶ Tapi di hita hum sada sajo do Tuhan, ima Ama, nasian Ia mual ni sasudena jana na laho tusia mangolu, dohot sada Tuhan sajo, ima Yesus Kristus, na marhite-hite Ia sasude madung ditompa jana na harami Ia hita mangolu. ⁷ Tapi inda sude halak nampuna parbinotoan i. Adong halak, na nabarani na laing torus tarikat tu berhala-berhala, mangan juhut i songon juhut palean berhala. ⁸ Panganon inda mamboan hita murdonok tu Allah. Hita inda rugi sanga aha pe, anggo inda hita pangan dohot hita inda labo sanga na ahape, anggo di pangan. ⁹ Tapi jagoma, anso hahebasanmu inda mandaji panghalang tu halahi na gale. ¹⁰ Harana anggo adong halak mangaligi ho na adong “Parbinotoan” lagi juguk mangan di bagasan kuil berhala, inda he halak na gale nuranina i di pargogoi laho mangan juhut pelean berhala? ¹¹ Dohot dalan nasongon i halak na gale, ima saudaromu, na tusia Kristus madung mate, manjadi mago harani “Parbinotoan” mu. ¹² Anggo ho dohot dalan na songoni mardosa maradopkon saudaro-saudaro jana pahancitkon roha parbagasan ni halahi nagale, ho sabotulna mardosa tu Kristus. ¹³ Harani i, molo sipanganon manjadi panghalang di saudarongku, au sampe salohot ni lolotna inda nangkan ra mangan juhut be,anso au ulang manjadi panghalang di saudarongku.