¹ Kene karina denganku, molo lot kalak si oda mengue i aturen kene si enggo porsea ngo lako petokokensa merkiteken tendi permasih ate. Merjaga-jaga mo kene asa unang mengekut ke merdosa. ² Mersiurupen mo kene, lako memersan si embahen simbotong i, ingo dalanna kene kiradoti patik ni Kristus. ³ Alai molo ipeginjang kalak rokana, kepeken oda lot bana, mengoto-otoi dirina ngo ia. ⁴ Alai karina mo nenangkasi perniulanna be, asa ipoji deba dekket kalak na asing. ⁵ Alai karina kalak ngo merembah si embahenna! ⁶ Alai manang ise ki bereken peddah merkiteken kata ni Debata, jaloon na ngo si mende merkiteken sinipeddahken nai. ⁷ Unang kene kena akkalen. Oda ngo boi ileai Debata! Manang kade isaburken, ingo lako siperanin. ⁸ Manang ise menabur ibagasen perdagingen, gotilenna ngo si oda toko merkiteken dagingna: Alai si menabur merkiteken tendi, gotilenna ngo i tendi i nai kenggeluhen sndekkah- ndekkahna! ⁹ Unang ke mahangke membakin simende, enggo kessa dapet tikkina jalon ndene ngosimende, molo oda kene mendelle. ¹⁰ Dahari deng ngo, ta ulaken si mende mi karina kalak terlumebbih mi denganta si enggo porsea. ¹¹ Tandai kene mo belgah surat ni tangan Ku! ¹² Karina sikiperokaken i kesangapen perdagingen, menesak-nesak kene lako mersunat, asa unang i tahanke kenalele ala ni silang ni Kristus. ¹³ Kalak i si enggo tersunat pe oda ngo nggeut menguei hukum Taurat, alai nggeut pe kalak i isunat asa boi ngo kalak i peginjangken roka merkiteken sunst mu. ¹⁴ Asa Aku pe oda geut merginjang roka molo oda ala ni silang ni Tuhan Jesus Kristus, merkite-kiteken Jesus ngo tersirang portibi en, janah Aku pe tersilang lako mi portibi en. ¹⁵ Kade ngo lapaten sini tersunat dekket si oda tersunat? Siperluna imo sirembaru teppa. ¹⁶ Asa mi karina kalak si mendalanken aturen i, dapetten dame dekket las ni roka mo roh mi kalak Israel si ni pilih ni Debata. ¹⁷ Asa unang ma lot mengambati Aku, ala merembah tanda-tanda Jesus ibagasen dagingKu. ¹⁸ Kene karina dengan Ku, pasu-pasu mi Tuhan Jesus Kristus mo mendwngani kene. Amen.