¹ Aku iwara sa tuuni hang wuang Kristus, aku puang ipusu, nelang lengan ateiku uma basaksi sindrah baya Roh Barasis, ² amun kahanangan ateiku tuu hante nelang gutus aku marista hang wuang ateiku. ³ Daya aku baharap nampan aku nakutuk, tapisah teka Kristus demi kawan pulaksanaiku, kaum mira bangsa andri aku ⁴ hanye yiru kawan ulun Israel; sa ampun hak nampan na angkat jari kawan anak Alatalla, narime kamuliaan, kawan janji, narime pangamian Hukum Taurat, ibadat, andri kawan janji. ⁵ Here ru katurunan kawan amah leluhur, balalu teka penah here Kristus nakayaan sameh ialah murunsia, Kristus yiru Tuhan sa labis teka katuluhni nelang sa natawat hampe kalalawahni. Amen! ⁶ Kude, Lengan Allatalla puang suah hala. Daya, puang katuluh ulun sa asal ni teka Israel jari ulun Israel, ⁷ puang katuluh katurunan Abraham jari kawan anakni, kude "sa na herau katurunannu hanye yiru sa baasal teka hi Ishak. ⁸ Yiru baarti puang kawan anak sa nakayaan da murunsia sa nahitung jari kawan anak Alatalla, malengkan kawan anak sa najanji sa nahitung jari katurunan. ⁹ Daya, kala yiti lengan janji yiru: "Hang tawuk sa haut natukas, Aku sagar hawi, babalu hi Sara sagar kaiyuh erang kaulun anak upu." ¹⁰ Puang ekat yiru, hi Ribka pada ngayaan kawan anak teka isa kaulun, hanye yiru hi Ishak, datu nini takam. ¹¹ Kapihuan kawan anak yiru nakayaan andri huan ngulah ala inun sa maeh atawa sa jahat, nampan aheng Alatalla mitah pidian-Ni natukas puang daya gana inun sa na ulah murunsia kude daya gana Hanye sa nerau, ¹² Nawara ma hi Ribka, "Anaknu sa matueh sagar malayani sa iya." ¹³ Iyalah sa naan nasurat, "Aku sinta hi Yakub, kude Aku muar hi Esau." ¹⁴ Jari, inun sa hamen na antuh daya takam? Inunkah Alatalla ru puang adil? Budas puang! ¹⁵ Daya Hanye kaeau ma hi Moses, "Aku ngami ahi lelo ma ulun sa Aku sini ngami ahi lelo, nelang Aku ngami murah atei ma ulun sa Aku sini ngami murah atei." ¹⁶ Jari, hal yiru puang bagantung ma aheng atawa usaha murunsia, kude ma aheng Allatalla sa nantarang pikaeh-Ni. ¹⁷ Daya Surat Barasis kaeau ma hi Firaun: "Hanye yiru daya gana yina Aku ngangkat hanyu nampan Aku nantarang kuasa-Ku hang wuang hanyu, nelang nampan ngaran-Ku nasiar makatuluh dunia. ¹⁸ Jari, Alatalla ngami ahi lelo ma hie sa na bahum daya-Ni, ngampi mape silu ma hie sa na aheng daya-Ni ¹⁹ Jari, naun sagar kaeua ma aku; "Dainun sa Hanye magun ngampi hala? Daya, hie sa tau nawan aheng-Ni? ²⁰ Kabalikanni, hie sa naun, murunsia, hampe naun heei nawan Alatalla? Taulah sa naulah kaeau ma sa ngulah, "Daya inun hanyu ngulah aku kala yiti?" ²¹ Inun ulun sa ngulah pot teka tane mahi hak andri putak watni; nampan ngulah teka erang kagumpal putak, isa pot sa napakai ma sa maeh, andri isa lainni sa napakai ma sa murun? ²² Kala awe amun Alatalla sa ngaheng nantarang panyangit-Ni andri kuasa-Ni, haut tamam sabar nadap ma kawan murunsia sa ngulah kasangiten-Ni, sa haut nasiap ma pampatei? ²³ Hanye ngulah kala yiru nampan nantarang kamuliaan-Ni ma amau takam sa na sinta daya-Ni, sa haut nasiap daya-Ni ma kamuliaan, ²⁴ hanye yiru takam, sa naherau-Ni, puang ekat teka ulun Yahudi, kude pada teka kawan bangsa lain. ²⁵ Kala sa naan na surat-Ni hang wuang Kitab Hosea, "Here sa puang umat-Ku, sagar naantuhKu umat-Ku. Here sa puang naasintaKu, sagar naantuhKu 'nasintaKu' ²⁶ Nelang, "hang unengan Alatalla, hang awe naeau ma naun: 'Naun puang umat-Ku,' hang yiru here sagar naantuh 'kawan anak Alatalla sa welum.'" Hosea 1:10 ²⁷ Yesaya kaeau neu Israel: "Biar jumalah anak Israel kala karasik hang laut, kude ekat butit sa sagar salamat, ²⁸ Daya Tuhan sagar ngaraja firman-Ni ma amau dunia, paruna andri segera. Yesaya 10:22-23 ²⁹ Sameh kala sa haut na nubuat daya Yesaya: "Umpamani Alatalla puang nanan ma takam katurunan, himat takam haut jari sameh kala Sodom andri Gomora." Yesaya 1:9 ³⁰ Jari, inun sa sagar naeau daya takam? Kawan bangsa puang Yahudi sa puang ngangkali kabanaran, haut kaiyuh kabanaran, hanye yiru kabanaran sa hawi teka iman; ³¹ kude, bangsa Israel sa taat kabanaran Hukum Taurat justru puang hampe ma hukum yiru? ³² Daya inun? Daya here puang ngangkali andri iman, kude andri parbuatan. Here lawu katapian ma watu pihalang. ³³ Kala naan nasurat: "Dinung, Aku nganak hang Sion isa watu sandungan andri watu karang, hie sa parisaya ma Aku puang sagar na ampi amangan." Yesaya 8:14; 28:16