¹ Jari inun sa hamen naeau takam? Inunkah takam magun ngulah dusa nampan anugerah magin hante? ² Budas puang! Kalaawe wangun takam sa haut matei ma dusa masih welum hang wuangni? ³ Inun puang naun karasa amun takam katuluh sa haut nabaptis hang wuang Yesus Kristus pada uma nabaptis hang wuang pampatei-Ni? ⁴ Daya yiru, takam haut napasar baya Hanye hang andrau takam nabaptis hang wuang pampatei-Ni; nampan sameh kala Yesus sa haut nasamelum teka penah ulun matei itetei kamuliaan Amah, kala yiru pada takam tau welum hang wuang pamelum sa wau. ⁵ Daya gana, amun takam haut jari isa baya Hanye hang wuang pampatei, takam pada sagar na samelum kamulek kala Hanye. ⁶ Takam karasa amun welum takam sa lawah haut na pantak hang kayu balasangar baya Kristus balalu tenga takam sa badusa mahi kuasani lagi nampan takam puang lagi jari walah dusa ⁷ Daya, tiap erang kaulun sa haut matei, ulun yiru haut na lapas teka dusa. ⁸ Itati, amun takam haut matei baya Kristus, takam parisaya takam pada sagar welum baya andri Hanye. ⁹ Takam karasa Kristus sa haut nasamelum teka penah ulun matei puang sagar matei lagi; maut puang lagi bakuasa hang amau Hanye. ¹⁰ Hal pampatei-Ni, hanye yiru pampatei ma dusa hindra ma kalalawahni, Kude hal pamelum-Ni, hanye yiru pamelum ma Alatalla. ¹¹ Kala yiru pada ma naun, naun harus karasa amun tenga naun haut matei ma dusa, balalu welum ma Alatalla hang wuang Kristus Yesus. ¹² Daya gana yiru, ada lagi maladar dusa bakuasa hang tenga naun sa fana nampan naun manurut ma kabahumenni sa jahat. ¹³ Ada pada naun nyarah kawan anggota tenga naun ma dusa jari sanjata kajahaten. Malengkan, sarah tenga naun ma Alatalla jari kawan ulun sa dahuluni matei taati haut welum, balalu kawan anggota tenga naun jari sanjata kabanaran Alatalla. ¹⁴ Kude, dusa puang sagar bakuasa hang amau naun daya naun puang welum hang kapit Hukum Taurat kude hang kapit anugerah. Walah Kabanaran ¹⁵ Jari, inun sa harus nakaraja takam? Inunkah takam sagar ngulah dusa daya takam puang welum hang kapit Hukum Taurat, kude hang kapit anugerah? Budas puang! ¹⁶ Naun pasti karasa amun naun nyarah tenga naun jari walah ma erang kaulun, naun jari walah ulun yiru, sa harus na alut inun eauni; hau dusa sa mimpin naun ma pampatei atawa ma kataaten sa mimpin naun nuju kabanaran. ¹⁷ Kude, syukur ma Alatalla amun naun dahulu walah dusa, taati andri sagalis atei taat ma kawan pokok pangajaran sa haut naajar ma naun. ¹⁸ balalu daya naun haut nalapas teka dusa, naun itati jari walah kabanaran. ¹⁹ Aku kaeau hal yiti makai istilah murunsia daya naun puang murah kataru. Daya, sameh yalah naun dahulu sa nyarah katuluh tenga jari walah ma kawan sa bere nelang sa jahat neu nampalus kabahumen sa labis jahat lagi, kala yiru pada itati naun nyarah katantuluh tenga naun jari walah kabanaran sa barasis. ²⁰ Tawuk naun jari walah dusa, naun bebas teka kabanaran. ²¹ Kude, inun kauntungan sa natarime naun teka kawan hal sa itati ngulah naun umangan? Daya hujung teka katuluh yiru ngenei pampatei. ²² Kude itati, udi nalapas teka dusa nelang haut jari walah da Alatalla, naun kaiyuh wua sa barasis palus pamelum hampe kalalawah. ²³ Daya upa dusa hanye yiru pampatei, kude sinta lelo Alatalla hanye yiru welum hampe kalalawah hang wuang Yesus Kristus, Tuhan takam.