¹ Tarime ulun sa maleme kayakinanni, kude ada basual neu pandirianni. ² Naan ulun sa yakin amun hanye iyuh nguta katuluh masam panguta, kude naan pada ulun sa maleme kayakinanni ekat nguta kawan sayur. ³ Kawan ulun sa tau nguta ada mahina ulun sa puang tau nguta, nelang ulun sa puang tau nguta ada ngahalaen ulun sa tau nguta, daya Alatalla haut narime hanye. ⁴ Hie sa naun hampe tau mahakimi walah ulun lain? Hau minri atawa tumbang, yiru urusan tuanni raerai. Nelang, hanye sagar minri daya Tuhan sanggup ngulah hanye minri. ⁵ Naan ulun sa kaingkam anrau sa isa labis penting teka kawan anrau sa lain, kude ulun sa lain kaingkam katuluh anrau samehleh. Elahni tiap kaulun tuu yakin hang wuang ateini raerai. ⁶ Here sa mamentingkan ekat hang isa anrau, mamentingkanni ma Tuhan. Nelang, here sa ikuta, ikuta neu Tuhan daya here mangucap syukur ma Alatalla. Kala yiru pada ma here sa puang ikuta, here pada puang ikuta neu Tuhan nelang mangucap syukur ma Alatalla. ⁷ Daya puang sunah erang kaulun teka takam sa welum ma dirini raerai, nelang puang sunah erang kaulun teka takam sa matei ma dirini raerai. ⁸ Amun takam welum, takam welum ma Tuhan, atawa amun takam matei, takam matei ma Tuhan. Jari welum atawa matei, takam samula wat Tuhan. ⁹ Daya Kristus matei nelang welum kamulek, nampan Hanye jari Tuhan ma kawan ulun sa haut matei nelang pada ma kawan ulun sa welum. ¹⁰ Kude dainun naun mahakimi pulaksanai raerai? Atawa dainun naun nganggap randah balalu mahina pulaksanai raerai? Daya takam katuluh sagar minri nadap ma takhta pangadilan Alatalla. ¹¹ Naan nasurat, "Daya gana Aku welum, lengan Tuhan, tiap ulun sagar ileku nyambah ma-Aku, nelang tiap ulun sagar mangaku ma Alatalla." Yesaya 45:23 ¹² Jari tiap kaulun sagar mananggung jawab neu dirini raerai ma Alatalla. Ada ngulah ulun lain badusa ¹³ Daya yiru, ada takam pangampihala, kude patut takam batekad nampan puang nganak pihalang atawa watu pihalang ma pulaksanai takam. ¹⁴ Aku karasa nelang parisaya tuu hang wuang Tuhan Yesus puang uweng sunah isa sa najis, kude ulun sa kaingkam yiru najis, maka hal yiru najis ma dirini. ¹⁵ Amun atei pulaksanainu mahanang daya gana inun sa nakuta naun, naun puang lagi welum sasuai sinta. Ada naun nanrusak ulun gana inun sa nakuta naun, daya Kristus pada haut matei ma hanye. ¹⁶ Daya yiru, ada budas naun maladar inun sa naingkam maeh nafitnah jari sa puang maeh. ¹⁷ Daya Karajaan Alatalla puang sual nakuta atawa nauut, kude sual kabanaran, damai sejahtera, nelang kaaraien hang wuang Roh Alatalla. ¹⁸ Ulun sa malayani Kristus anri sara kala yiru sa ngampi sanang atei Alatalla, nelang nahormati murunsia. ¹⁹ Jari, hayu takam nampalus kawan hal sa tau ngampi hawi damai sejahtera nelang sasameh mambangun. ²⁰ Ada nanrusak pigawian Alatalla ekat daya nakuta! katantuluhni halal, kude naun bahala basing sa ikuta balalu ngulah sabab ulun lain badusa. ²¹ Labis maeh puang nguta daging atawa nguut anggur, atawa ngaraja kawan hal sa lain sa tau ngulah pulaksanainu badusa ²² Tegei mamaeh kaparisayaan sa naan hang naun, ma diri naun raerai hang hadapan Alatalla. Tuu arai ulun sa puang mahakimi dirini raerai gana inun sa naanggapni maeh. ²³ Kude, ulun sa bembang sagar nahukum daya hanye ikuta puang manurut kayakinan; nelang inun sa puang hawi teka kayakinan sayiru dusa.