¹ Tiap ulun harus tunduk ma pamarentah sa bakuasa hang amau here daya puang uweng pamarentah sa puang baasal teka Allatala, nelang here natantu daya Alataalla. ² Yiru sababni hie ulun sa nawan pamarentah, sameh anri nawan inun sa haut natantu daya Alatalla, nelang ulun sa nawan sagar kahaba hukuman. ³ Daya ulun sa ngulah maeh puang usah takut ma pamarentah, kude ulun sa jahat sa harus takut. Inun naun hamen welum puang kaingkam takut ma pamarentah? Karaja inun sa maeh, balalau naun sagar natawat teka yiru ⁴ daya here yiru walah Alatalla neu pikaehnu. Kude, amun naun ngaraja sa jahat, harus naun takut, daya puang dagana mahi sabab amun pamarentah negei sanjata. Here yiru walah Alatala, sa tau nyanawu hukuman Alatalla ma kawan ulun sa ngulah jahat. ⁵ Yiru sababni, naun harus tunduk, puang ekat daya takut hukuman Alatalla, kude pada daya kunuan atei naun. ⁶ Yiru sababni naun bayar pajak, daya here yiru walah Alatalla sa nampalus kawan tugas neu yiru. ⁷ Ami ma ulun sa harus na ami; pajak ma ulun sa kahaba hak narime pajak, sukai ma ulun sa kahaba hak narime sukai, katakuten ma ulun sa patut narime katakuten, nelang hormat ma ulun sa kahaba hak narime hurmat. Sinta anri ulun lain yiru Hukum sa utama. ⁸ Ada naun bautang inun-inun anri ulun, kude maeh naun sinta ma isa anri sa lain daya ulun sa sinta anri sasameh murunsia haut nampalus Hukum Moses. ⁹ Daya , "Ada ibela, ada munu, ada ngalat, ada bahiri ngaheng wat ulun," nelang amun naan parentah sa lain, katantuluhni naut jari isa hang yina, hanye yiru "Sinta anri sasameh murunsia kala dirinu raerai." ¹⁰ Sinta puang ngulah kajahaten ma sasameh murunsia. Daya yiru, sinta nampalus kabahumen Hukum Moses. ¹¹ Kala yiru pada naun karasa itati wayahni naun kaelan teka manre; daya itati kasalamatan haut labis riet ma takam teka wayah wau nuku percaya. ¹² Malem haut kai paitah nelang puang lawah lagi kaanrau, daya yiru hayu takam ngumpe katuluh gawian piiyeng balalu makai panrape piraai. ¹³ Hayu takam welum marahati kala kaanrau, puang uma hang wuang pesta bararami nelang mahamui, puang uma gawian cabul anri hawa nafsu, nelang puang uma babur anri bahiri. ¹⁴ Kude pakai Tuhan Yesus Kristus, ada naun ngurus tenga daging neu mulur aheng atei.