¹ Daya pikaeh Alatalla, aku ilaku tatuu ma naun, kawan pulaksanai, nampan naun nyarah diri naun jari parapah sa welum, sa kudus nelang sa ngampi sanang atei Alatalla; hanye yiru ibadahnu sa sajati. ² Ada budas naun sameh andri dunia yiti, kude elahni naun baubah daya akal budi naun sa wau, nampan naun kaiyuh mantaru kabahumen Alatalla; inun sa maeh, sa ngampi sanang atei Alatalla nelang sa paruna. ³ Daya, mitah ahi lelo sa haut na ami ma aku, aku iwara ma tiap kaulun hang penah naun nampan naun ada mamikir kawan hal sa lain sa labis amau teka sa harus na pikir daya naun, kude nampan naun bapikir barasis sasuai andri ukuran iman sa haut naami Alatalla ma tiap kaulun. ⁴ Daya, sameh yalah isa tenga, naan hene anggota, kude masing-masing puang sameh tugasni. ⁵ Kala yiru jua andri takam, biarpun takam rama, kude isa tenga hang wuang Kristus. Nelang tiap takam yalah anggota ma sa lain. Kawan karunia Rohani ⁶ Takam kaiyuh ahi lelo sa balainan manurut ma karunia sa na ami ma takam. Amun neu banubuat, hayu takam ngarajani sasuai andri iman takam. ⁷ Amun neu malayani, hayu hanye malayani, atawa amun neu ngajar, hayu hanye ngajar ⁸ Atawa amun neu mahibur, hayu hanye ngami panghiburan, amun neu ngami inun sa namilikini, hayu hanye ngami andri pikaeh atei, amun neu mamimpin, hayu hanye tuu-tuu mamimpin, amun neu ahi lelo, hayu hanye ngami ahi lelo andri sanang atei. Nasihat neu welum hang wuang sinta. ⁹ Sinta yiru ada papura. Marikang andri sa jahat, nelang itegei hang inun sa maeh. ¹⁰ Maeh naun sasameh ipasinta andri sinta yalah ipulaksanai nelang sasameh badahulu ngami hormat, ¹¹ Ada budas naun mawule, maeh andri samangat hang wuang Roh nelang malayani Alatalla. ¹² Arai atei hang wuang pangharapen, sabar hang wuang kasusahen nelang utul badoa! ¹³ Uma ngarawah nyasukup kaparluan kawan ulun kudus, nelang bausaha ngami kawan inun apa ni andri sanang atei. ¹⁴ Ami berkat ma here sa ngahanangan naun, ami berkat, ada nyapa! ¹⁵ Arai atei andri here sa arai atei, nelang nungkau andri here sa nungkau. ¹⁶ Maeh naun isa pikir, ada mamikir kawan hal sa amau, kude tuju ma kawan ulun sa hang ime. Ada budas naun ngingkam tenga naun pandai. ¹⁷ Ada iwaleh kajahaten andri kajahaten. Ulah inun sa maeh hang hadapan katuluh ulun. ¹⁸ Amun iyuh, amun hal yiru bagantung ma naun, welum hang wuang damai andri katuluh ulun. ¹⁹ Pulaksanai katuluh, ada budas naun iwaleh, ami unengan ma Alatalla sa iwaleh. Daya naan nasurat, "Iwaleh yiru hak-Ku, Aku sa sagar iwaleh," lengan Tuhan. ²⁰ Kude, amun musuhnu kajuju, ami hanye kuman, nelang amun musuhnu kakan ranu, ami hanye nguut ranu. Daya anri ngulah kala yiru, naun kasameh nganak waye hang amau uluni. ²¹ Ada naun talau andri kajahaten, kude santalau kajahaten andri pikaeh.