¹ Aku nunti: Inun Alatalla haut nampik umat-Ni?" Batantu puang! Daya, aku raerai erang kaulun Israel, katurunan Abraham, teka suku Benyamin. ² Alatalla puang nampik umat-Ni sa haut napidi-Ni teka asal. Inun naun puang karasa amun Kitab Barasis kaeau neu hi Elia, tawuk hanye mangadu sual Israel ma Alatalla? ³ 'Tuhan, here haut munu kawan nabi-Nu, here haut ngampi sanruntun kawan mezbah-Nu, balalu ekat lee aku raerai sa masih welum, nelang here hamen munu aku." ⁴ Kude, inun lengan Alatalla ma hanye? "Aku masih nanan 7.000 kaulun ma Aku, sa puang suah sujud nyambah ma Baal." ⁵ Kala yiru pada itati, naan lee sa napidi daya ahi lelo. ⁶ Kude amun daya ahi lelo, puang lagi daya pagawian, daya amun puang kala yiru, ahi lelo yiru puang lagi jari ahi lelo. ⁷ Balalu kalaawe? Bangsa Israel puang kaiyuh inun na antara here, kude here sa tapidi sa kaiyuh, sa lainni tenek karas atei ⁸ Kala sa naan nasurat: "Alatalla ngulah here janak mandre, ngami mate sa puang tau kadinung, nelang silu sa puang tau karengei, hampe andrau yiti." Ulangan 29:4; Yesaya 29:10 ⁹ Hi Dawid kaeau: "Elahni jamuan here jari jabak ma here raerai, jari watu sandungan, nelang iwaleh ma here. ¹⁰ Elahni mate here maiyeng nampan here puang tau kadinung, balalu punggung here bungkuk hampe kalalawahni." Mazmur 69:23-24 ¹¹ Jari, aku nunti, inun here ru katapian nampan lawu? Budas puang! Kude, daya kahalaen here, kasalamatan haut hampe ma kawan bangsa puang Yahudi, nampan ngulah here kasiwa. ¹² Amun kahalaen here jadi katatauen ma dunia, balalu kakurangan here jari katatauen ma kawan bangsa puang Yahudi, labis lagi amun here paruna! ¹³ Itati aku bapaner ma naun, kawan ulun puang Yahudi, justru daya aku rasul ma kawan bangsa puang Yahudi, aku tuu katamaman ma tugasku, ¹⁴ nampan aku tau ngulah pulaksanai sebangsaku kasiwa, balalu nyalamat papire kaulun teka here. ¹⁵ Amun here puang narime yiru aratini pikaeh ma dunia, inun yiru aratini amun here narime sameh kala welum teka penah ulun matei? ¹⁶ Amun rute sa palanungkai yiru barasis, katuluh sampuran rute pada barasis. Nelang amun wakat kayu yiru barasis, kawan raan ni pada barasis. ¹⁷ Kude, amun papire raan haut nasantepu, balalu naun, sa puang isa raan nacangkok hg penah here nelang uma kahaba pamelum teka wakat andri gatah kakau zaitun yiru, ¹⁸ ada naun jari amau atei andri kawan raan yiru. Naun harus kaitung puang naun sa ngami pamelum ma wakat, kude wakat sa ngami pamelum ma naun. ¹⁹ Mungkin naun sagar kaeau, "Kawan raan yiru nasantepu nampan aku tau nacangkok." ²⁰ Yiru bujur! Here nasantepu daya here puang parisaya, kude naun daya iman parisaya. Ada budas naun sakah, kude takutleh ²¹ daya amun Alatalla puang sayang kawan raan asli, Hanye pada puang sagar sayang andri naun. ²² Daya gana yiru, dinung mamaeh pikaeh andri pikaras Alatalla; Pikaras ma here sa haut lawu, kude pikaeh ma naun sa tenek muneng hang wuang pikaeh-Ni. Amun puang, naun pada sagar na tetek. ²³ Nelang neu here pada, amun here taduh puang parisaya, here sagar nacangkok lagi daya Alatalla bakuasa mancangkok here kamulek. ²⁴ Daya, amun naun sa haut na tetek teka raan kakau zaitun jumpun balalu nacangkok ma kakau zaitun asli, sa balawanan andri wangun naun, duan likan here sa dasar teka raan asli sa nacangkok ma kakau zaitun here raerai? ²⁵ Daya, pulaksanai katuluh, aku hamen naun katantuluhni karasa rahasia yina nampan naun ada ngingkam haut pintar marahati, daya meheni teka Bangsa Israel mape silu hampe sukup jumalah kawan bangsa lain sa hawi. ²⁶ Daya gana yiru, katuluh ulun Israel sagar nasalamat. Kala naan nasurat, "Panyalamat sagar hawi teka Sion, Hanye sagar manyingkir kajahaten teka hi Yakub. ²⁷ Yina janji-Ku andri here, hantek Aku ngampun kawan dusa here." Yesaya 59:20-21; 27:9 ²⁸ Manurut Kabar Maeh, here yiru musuh Alatalla daya naun, kude manurut pidian, here yiru kawan ulun sa nasinta Alatalla daya datu nini here. ²⁹ Daya anugerah andri pidian Alatalla puang tau batal. ³⁰ Daya, sameh kala naun sa dahulu puang nuu ma Alatalla, kude sa itati haut narime ahi lelo daya here sa puang nuu yiru; ³¹ kala yiru pada here itati sa puang nuu, nampan ahi lelo Alatalla sa haut naami ma naun pada natarime da here. ³² Daya, Alatalla haut maladar here katuluh sa puang nuu nampan Hanye tau nantarang ahi lelo-Ni ma katuluh ulun. Pujian ma Alatalla ³³ Oh, tuu tamam katatauen andri kaharatien nelang pangarasaen Alatalla. Puang tara salidik nelang puang takam tau nanguh kawan sara lalan-Ni! ³⁴ "Daya, hie sa karasa pikiran Tuhan? Atawa, hie sa tau ngami nasehat ma Hanye?" Yesaya 40:13 ³⁵ "Atawa, hie sa suah ngami ala inun inun ma Hanye sahuan yina balalu harus nawaleh daya-Ni?" Ayub 41:11 ³⁶ Daya katantuluh yina teka Hanye, daya Hanye, ma Hanye. Ekat ma Hanye tawat hurmat kamuliaan hampe kalalawahni! Amen.