¹ Pulaksanai katuluh, aheng atei andri doaku ma Alatalla neu here nampan nasalamat. ² Daya, aku tau basaksi neu here, amun here tuu basamangat ma Alatalla, kude puang badasar ma pangatahuan sa tuuni. ³ Here puang karasa kabanarana Alatalla andri bausaha ngulah kabanaran ma here raerai, here puang tunduk ma kabanaran Alatalla. ⁴ Daya Kristus yiru kaganapan Hukum Taurat sa jari kabanaran ma tiap kaulun sa parisaya. ⁵ Hi Moses nyurat neu kabanaran sa teka Hukum Taurat, amun erang kaulun sa ngaraja kabanaran badasarkan hukum sagar welum daya hukum yiru. ⁶ Kude, kabanaran sa asalni teka iman kaeau kala yiti, "Ada kaeau hang wuang ateinu, 'Hie sa sagar mamai ma surga?' Aratini, sa ngenei Kristus minau. ⁷ Atawa 'Hie sa sagar minau ma dunia ulun matei?' Aratini, sa ngenei Kristus mamai teka ulun matei. ⁸ Kude, inun sa na eauni yina? "Firman yiru riet andri hanyu, hanye yiru hang wuang wawa nu andri hang wuang ateinu." Yiru kabar sa nawara kami. ⁹ Daya andri wawa naun mangaku amun Yesus Kristus yiru Tuhan, nelang parisaya hang wuang atei naun Alatalla haut nyamelum Yesus teka penah ulun matei, himat naun sagar salamat. ¹⁰ Daya andri atei, ulun jari parisaya balalu kaiyuh kabanaran; nelang andri wawa, ulun mangaku hampe kaiyuh salamat. ¹¹ Daya Surat Barasis kaeau, "Hie ulun sa parisaya ma Hanye puang sagar naampi amangan." ¹² Mahi budas nabalain teka kawan ulun Yahudi andri kawan ulun Yunani; Tuhan sa isa yina hanye yiru Tuhan ma katuluh ulun, sa ngami tuu hene kasugihan ma katuluh ulun sa laku karawah ma Hanye. v 13 Daya, "Katuluh ulun sa nanterau hang wuang ngaran Tuhan sagar nasalamat." ¹⁴ Kude,kalaawe here tau nanterau ma Hanye amun here huan parisaya? Balalu, kalaawe here tau parisaya ma Hanye amun here puang suah karengei? Kamulek, kalaawe here tau karengei, amun puang uweng sa iwara neu Hanye? ¹⁵ Nelang, kalaawe here tau iwara neu Hanye, amun here puang nautus? Kala naan nasurat: "Tuu maeh pihawian kawan ulun sa hawi ngenei kabar maeh!" ¹⁶ Kude, puang katuluh ulun sa narime Kabar Maeh yiru daya Nabi Yesaya kaeua, "Tuhan, hie sa parisaya ma kabar sa haut narengeini teka kami?" ¹⁷ Jari, iman hulet teka pandrengeian, balalu pandrengeian daya Firman Kristus. ¹⁸ Kude aku nunti: "Inun kawan ulun yiru huan karengei? Himat haut, daya "Lengan here haut hampe litar dunia, balalu lengan here haut hampe ma pusing dunia." Mazmur 19:5 ¹⁹ Kude, aku kaeau, "Inun bangsa Israel puang kataru?" Samambatang, hi Moses kaeau: Aku sagar ngulah naun ngadidit ma kawan ulun sa lain bangsa, nelang ngulah naun sangit ma kawan bangsa sa budu." Ulangan 32:21 ²⁰ Labis heei, hi Yesaya kaeau: "Aku napanalu daya kawan ulun sa puang ngantara Aku; Aku nantarang tengaKu ma here sa puang itunti neu Aku." Yesaya 65:1 ²¹ Kude, neu Bangsa Israel i Yesaya kaeau, "Hapus andrau Aku haut nyurung tangan-Ku ma bangsa sa mape silu nelang puang nuu.