¹ Tawuk Yesus minau teka bukit, rama ulun sa naharak hanye. ² Hawi erang kaulun kadanen, hanye ileku hang hadapan Yesus, palus kaeau, "Amun Hanyu ngaheng, Hanyu tau nyamare aku." ³ Yesus ngulur tangan-Ni nelang manjamah ulun yiru, Eau-Ni, "Aku ngaheng, hanyu ware!." Hang yiru jua panyakitni ware. ⁴ Balalu eau Yesus nengkan hanye, "Ingat, ada hanyu nyarita ma hie-hie, kude hulu hanyu nunung imam, ampi dinung tenga dagingnu ma hanye, udi hie sarah parapah sa naparentah Moses nampan jari kasaksian ma here." Erang kaulun Palayan Parwira Romawi nasamare ⁵ Tawuk Yesus masuk ma Kapernaum, erang kaulun parwira hawi manalu Hanye, nelang laku karawah teka Hanye, ⁶ eauni, "Tuan, palayanku sakit hang lewu, hanye mangkading daya lumpuh, tuu uyuh hanye ngaret kahanangen." ⁷ Eau Yesus ma hanye, "Aku sagar hawi nyamare hanye." ⁸ Kude, parwira yiru nuing, "Tuan, aku puang patut narime Hanyu masuk hang lewuku, kude antuhleh baran erang kawusi lengan balalu palayanku yiru ware. ⁹ Daya aku yina pada harus tunduk ma parentah atasanku, nelang hang imbe aku naan pada kawan parajurit sa harus tunduk ma parentahku. Amun aku nunyu erang kaulun parajurit, 'Hulu tulak,' hanye balalu tulak, aku nunyu sa lain, 'Ma yati,' hanye balalu hawi, aku nunyu palayanku, 'Ulah yiti,' hanye balalu ngulahni." ¹⁰ Tawuk Yesus karengei inun sa naeau parwira yiru, Hanye mandam balalu kaeau ma kawan ulun sa naharak Hanye, "Aku iwara ma naun , huan suah Aku kahaba kaparisayaan sa kala yiti hanteni teka penah ulun Israel. ¹¹ Kapinuuni Aku iwara ma naun, rama ulun sagar hawi teka timur anri barat, balalu uma maharung kuman baya hi Abraham, hi Ishak, anri hi Yakub hang wuang Karajaan Surga, ¹² kude kawan anak karajaan yiru sagar na umpe ma wuang piiyeng sa panga lalem. Hang yaru here sagar nungkau nelang ngaret kahanangen. ¹³ Balalu Yesus kaeau nengkan parwira yiru, "Hulu hanyu mudi, inun sa naparisayanu yiru sagar jari." Balalu tawuk yiru jua, palayanni ware. Kasian wawei hi Petrus anri ulun rama nasamare ¹⁴ Tawuk Yesus hampe hang lewu hi Petrus, Hanye kadinung kasian Petrus sa wawei ganyah mekum hang paandrean. ¹⁵ Yesus manjamah tanganni balalu ekumni wawai. Udi yiru, hanye ambuan teka paandrean palus malayani Yesus. ¹⁶ Dami anrau nanuku kariwe, ulun nginsing nunung Hanye kawan ulun sa naasuk roh jahat, balalu Hanye ngusir kawan roh yiru anri erang kawusi lengan, nelang nyamare katulu ulun sa mekum, ¹⁷ nampan tulus inun sa naeau daya Nabi Yesaya: "Hanye sa ngalap kawan kahanangen takam nelang nanggung kawan panyakit takam." Yesaya 53:4 Jari murid Yesus ¹⁸ Tawuk Yesus kadinung rama ulun ngawariung Hanye, Hanye marentah here nampan nyabarang danau. ¹⁹ Udi hie, erang kaulun guru agama hawi nunung Hanye nelang kaeau, "Guru, aku hamen umba Hanyu maaweleh." ²⁰ Yesus nuing, "Sarigala naan liang, kawan wurung hang langit naan hanai, kude Anak murunsia puang uweng paunenganni pakai ngandak ulu-Ni." ²¹ Isa teka kawan murid kaeau ma Hanye, "Tuhan, ijin aku tulak badahulu lepuh masar ambahku." ²² Kude, eau Yesus ma hanye, "Umba Aku, elahni ulun matei masar ulun matei wat here raerai." Yesus ngampi suni riwut barat ²³ Yesus sungkat mawuang jukung, kawan murid-Ni pada umba sinrah baya Hanye. ²⁴ Salenga hawi riwut barat mehet tatuu hang danau hampe jukung here pipi galumbang. Tawuk yiru, Yesus ganyah manre. ²⁵ Balalu, kawan murid hawi nunung Yesus palus ngele Hanye, eau here, "Tuhan, karawah salamat kami! Takam silaka!" ²⁶ Eau-Ni ma here, "Dainun naun takut, naun ulun sa kurang parisaya?" Udi yiru, Hanye minri palus misuh riwut barat anri danau yiru, balalu danau yiru taduh bagalumbang. ²⁷ Kawan ulun wauh eau here, "Ulun inun Hanye yiti, hampe riwut barat anri danaupun nuu parentahni?" Rueh Kaulun Gadara naasuk Roh Jahat ²⁸ Dami Yesus hampe sabarang danau, hang daerah Gadara, rueh kaulun sa naasuk roh jahat hawi nunung Hanye. Here rueh sa kaluar teka pasaran yiru maraat tatuu hampe mahi sunah isa ulun sa heei mitah lalan yiru. ²⁹ Here rueh nantiak, eau here, "Inun urusan-Nu anri kami, Anak Alatalla? Inun hanyu hawi lepuh nyiksa kami biar huan hampe wayahni?" ³⁰ Puang lawit teka yiru, naan kawan iwek rahat ngantara kutaen. ³¹ Kawan setan yiru ilaku nengkan Hanye balalu kaeau, "Amun Hanyu nunyu kami kaluar, huyu kami masuk mawuang kawan iwek yiru." ³² Yesus kaeau ma here, "Hulu!" Balalu, here kaluar hengka kararueh ulun yiru balalu masuk mawuang kawan iwek yiru. Balalu, katuluh kawan iwek yiru nempat mitun teka iring danau, palus matei leteng. ³³ Kawan ulun sa nyaga kawan iwek yiru nempat ma tumpuk, palus nyarita katuluhni, pada neu inun sa haut jari anri rueh kaulun sa naasuk setan yiru. ³⁴ Maka katuluh ulun hang tumpuk tulak manalu Yesus. Dami here kadinung Yesus, here ilaku nampan Hanye nanan daerah here.