¹ Kaayat hinang, katuluh imam kapala andri kawan pemimpin Yahudi ngalap kaputusan sasameh nampan na hukum matei Yesus. ² Balalu, here nuruk Yesus, ngenei balalu manyarah Hanye ma Gubernur Pilatus. Yudas Munu Tenga ³ Dami hi Yudas, sa mahianat Yesus, kadinung Yesus na hukum matei, hanye manyasal balalu ngampulek telumpulu kadiki duit perak ma kawan imam kepala andri kawan pemimpin Yahudi, ⁴ eauni, ''Aku haut badosa mahianat Ulun sapuang bakahalaan hampe na hukum matei.'' Kude here kaeau, ''Puang urusan kami? Yiru urusannu!'' ⁵ Balalu, hi Yudas numuk duit perak yiru ma wuang Lewu Alatalla balalu tananni. Udiyiru, hanye tulak mitu ngagueng tengani. ⁶ Kude, kawan imam kepala ngalap duit perak yiru balalu kaeau, ''Puang iyuh na simuh hang unengan parapah daya duit yina haraga ira.'' ⁷ Balalu, here ngalap keputusan neu duit yiru, here midi tane tukang balanai unengan siat ma kawan ulun asing. ⁸ Iru sababni, tane yiru na antuh ' Tane Ira' hampi itati. ⁹ Andri kalayiru, tulus inun sa naeau Nabi Yeremia: " Udiyiru, here narime telumpulu kadiki duit perak. Irulah haraga tenga-Ni sa napakat daya kawan ulun Israel. ¹⁰ Here makai telumpulu kadiki duit perak yiru pakai midi tane tukang balanai,kala sa naparentah Tuhan maaku.'' Yesus andri Gubernur Pilatus ¹¹ Dami,Yesus mindri hang hadapan Gubernur balalu Gubernur nunti ma-Hanye, ''Inunkah Hanyu Raja ulun Yahudi?'' Sanga'i Yesus, ''Hiai, ialah eaunu.'' ¹² Kude, katika Hanye na tuduh daya kawan imam kepala andri kawan pemimpin Yahudi, Hanye suni puang nyanga'i. ¹³ Udiyiru, hi Pilatus kaeau ma-Hanye, ''Inun hanyu puang karengei hene dawaan here ma Hanyu?'' ¹⁴ Kude, Yesus puang nyangai hi Pilatus, sunah butit hampe Gubernur yiru heran tatu'u. Pilatus Gagal Mambebaskan Yesus ¹⁵ Dami, satiap hari raya, Gubernur biasani napas erangkaulun tahanan, manurut pidian ulun rama. ¹⁶ Hang waktu yiru, here naan erangkaulun tahanan sa terkenal, sa naantuh Barabas. ¹⁷ Jari, ganyah ulun rama ba kumpul, Pilatus nunti ma here, '' Hie sa bahum naun hamen na bebaskan dayaku, Barabas atawa Yesus , isa naantuh Kristus?'' ¹⁸ Daya, hi Pilatus karasa here muar, maka here nyarah Yesus mahanye. ¹⁹ Ganyah hi Pilatus maharung hang kursi pengadilan, daranganni ngirim pesen mahanye, ''Ada hanyu sampur pakara ulun sa puang bakahalaen ru. Daya, gana Hanye aku nganupi sa maka tatakut andrau yiti.'' ²⁰ Kude, kawan imam kepala andri kawan pemimpin Yahudi ngajaajuk ulun hene laku hi Barabas bebas balalu Yesus na hukum matei. ²¹ Gubernur nunti ma here, '' Sa awe hingka karueh ulun yiru nabahum naun nabebaskan dayaku? Balalu,here kaeau, ''Barabas!'' ²² Pilatus kaeau mahere, ''Amun kairu, inun saharus naulahku andri Yesus, sa naantuh Kristus?'' Here katuluh kaeau, "Balasangar Hanye!'' ²³ Kude, Pilatus nunti, ''Inunngulah? Inun kejahatan Ni?'' Kude, here miuik magin mehet lagi, "Balasangar Hanye!'' ²⁴ Dami hi Pilatus kadinung hanye puang tau ngulah inun-inun lagi,malah kawan ulun yiru mulai barontak, hanye ngalap ranu balalu mui tanganni hang hadapan ulun rama yiru nelang kaeau, ''Aku puang bahala hang amau pampatei ulun yiti. Yiru urusan naun raerai!'' ²⁵ Balalu katuluh ulun yiru nyangai, ''Pampatei-NI natangung daya kami andri kawan anak kami!'' ²⁶ Balalu Pilatus napas hi Barabas ma here udiyiru here ngakasah Yesus, Pilatus manyarah Hanye napan nabalasangar. Tantara Pilatus Ngasese Yesus ²⁷ Udi yiru, kawan tantara gubernur ngenei Yesus ma markas unengan gubernur balalu ngumpul katuluh pasukan Romawi ngaliling Hanye. ²⁸ Here nguka baju Yesus palus makai jubah kalabu ma-Hanye. ²⁹ Here ngulah mahkuta barunrui, pasang here hang ulu Yesus, here ngami isa tungkeh hang tangan kawan-NI nelang ijuku hang hadapan Hanye, ngasese Hanye, eau here, ''Tabe, Raja ulun Yahudi!'' ³⁰ Here nura Hanye, nelang ngalap tungkeh yiru, balalu meweh ma ulu-Ni. ³¹ Udi yiru here ngasese Hanye, here napas jubah kalabu yiru hingka Yesus, balalu makai kamulek pakaian-NI raerai, balalu ngenei Hanye tulak lepuh mambalasangar Hanye. Yesus Nabalasangar ³² Dami kawan tantara yiru kaluar, here panalu erang kaulun upu hingka Kirene sa bangaran Simon. here maksa Simon ngantung balasangar Yesus. ³³ Dami, here hampe hang unengan sa bangaran Golgota,sa artini "Unengan Kuruwangah'', ³⁴ here ngami Hanye anggur na uut na sampur andri aperu, udi nginamni, Hanye puang hakun nguutni. ³⁵ Udi yiru here mambalasangar Yesus, here babagi pakaian Ni hang sasameh here andri ngumpe undi. ³⁶ Balalu, here maharung nyaga Hanye hang yiru. ³⁷ Balalu, hang amau ulu-Ni here masang tuduhan ma-Hanye, ''ITI YESUS, RAJA ULUN YAHUDI.'' V 38 Hang waktu yiru, naan rueh kaulun parampok sa nabalasangar sindrah andri Yesus. Isa hang tuhi kawan balalu isa hang tuhi kawi. ³⁹ Kawan ulun samitah mahina Hanye nelang igutik ulu, ⁴⁰ nelang kaeau,''Hanyu sa kai nyandruntun Lewu Alatalla balalu ngamuanni lagi hang telu andrau, salamatkan tenga-Nu raerai! Amun Hanyu Anak Alatalla, inau tika balasangar yiri!'' ⁴¹ Kalayiru pada kawan imam kepala, andri kawan guru Agama, baya kawan pemimpin Yahudi ngasese Yesus, eau here, ⁴² ''Hanye nyalamat ulun lain, kude Hanye puang tau nyalamat Tenga-Ni raerai. Amun Hanye Raja Israel, elah Hanye minau hingka balasangar yiru taati balalu takam tau parasaya ma-Hanye. ⁴³ Hanye parisaya ma Alatalla, biarleh Alatalla nyalamat Hanye taati, amun Alatalla ngaheng-Ni. Daya Hanye raerai kaeau Hanye Anak Alatalla.''' ⁴⁴ Kawan panjahat sa nabalasangar sindrah andri Hanye pada ngasese Hanye. Pampatei Yesus ⁴⁵ Taati, tika jam ka enem, maieng hang katuluh daerah yiru, hampe jam ka suei. ⁴⁶ Kakira, hang jam ka suei, Yesus ikuriak andri suara mehet, eau-NI "Eli, Eli, lama sabakhtani?'' sa arti ni, ''Alatalla-Ku, Alatalla-Ku, inun ngulah Hanyu nanan Aku?'' ⁴⁷ Papire hingka here sa mindri hang yaru, dami here karengei yiru, here kaeau, ''Ulun yiri ganyah nerau hi Elia.'' ⁴⁸ Balalu, erangkaulun hingka here nempat, ngalap wunge karang, nyamehuni andri anggur maasem, natean ni andri kayu, ngampi uutni ma Yesus. ⁴⁹ Kude, sa lain kaeau, ''Hayu takam ngini, inun hi Elia akan hawi nyalamatkan Hanye.'' ⁵⁰ Balalu, Yesus miuik lagi andri lengan mehet balalu nepus hewuk-Ni sa pangalisan. ⁵¹ Dinung, tenda hang wuang Lewu Alatalla pairah jari rueh bagian, hingka amau hampe ma ime, tane gaguyuh, kawan watu patuhi. ⁵² Kawan pasaran pawawanga, hene kawan ulun wat Alatalla sa haut matei nasamelum kamulek. ⁵³ Here kaluar tika pasaran, udi Yesus haut welum tika pampatei, here masuk ma Yerusalem hang yaru hene ulun kadinung here. ⁵⁴ Taati, kapala pasukan, andri kawan here sa nyaga Yesus, dami here kadinung tane bagarak andri bamasam kajadianni, here takut tatuu balu kaeau, ''Tuu, Hanye yiti Anak Alatalla!'' ⁵⁵ Hang yaru, naan rama ulun wawei nantau tika lawit, here sa uma Yesus tika Galilea here melayani Hanye. ⁵⁶ Tika here yiru naan hi Maria Magdalena, Maria ineh Yakobus andri Yusuf, pada ineh tika kawan anak Zebedeus. Yesus Napasar ⁵⁷ Malem yiru, hawi erangkaulun tatau hingka Arimatea bangaran Yusef, sa haut jari murid Yesus. ⁵⁸ Hanye tulak nunung Pilatus laku tenga Yesus. Hi Pilatus marintah nampan tenga Yesus na ami ma hi Yusef. ⁵⁹ Yusef ngalap bangkai Yesus, mungkusNi andri kain linen sa barasis, ⁶⁰ Balalu ngangkading Hanye hang wuang kuburan wau, watni raerai, sa haut na kadini hang bukit watu. Balalu Yusef ngulagaling isa watu hante pakai nutup wawa pasaran yiru balalu tulak. ⁶¹ Hang yaru, naan Maria Magdalena andri Maria sa lain ganyah maharung hang hadapan kuburan yiru . Pasaran Yesus Najaga ⁶² Kaayat andrauuni, udi andrau sabat, kawan imam kapala andri kawan ulun Farisi nakumpul ma hadapan Pilatus. ⁶³ Here kaeau, ''Tuan, kami kaitung katika hi mapusu ru masih welum, Hanye suah kaeau,'Udi telu andrau, Aku sagar welum lagi. ⁶⁴ Daya yiru, parintah supaya pasaran yiru na jaga hampe andrau ka telu, takut kawan muridNi hawi ngalat bangkai-Ni, kaeau maulun rama, 'Hanye haut welum tika pampatei.' Nelang panipuan sa handrian yina labih tamam hingka sa dahulu.'' ⁶⁵ Pilatus kaeau ma here, ''Naun naan tantara pangawal. Hulu, jaga tatuu.'' ⁶⁶ Balalu, here tulak nyaga pasaran yiru nyaga ngawariung, balalu nyegel watu panutup pasaran.