¹ "Hal Karajaan Surga hanyeyiru iyalah erang kaulun sa baisi kabun sa tulak kayaat sungsung ne'u nauwa kawan ulun sa bagawi baya hanye. ² Dami here haut pakat upa' erang dinar erang anrau, balalu hanye nunyu here bagawi hang kabun anggurni. ³ Kakira hang jam katelu hanye tulak balalu nantau naan sa ekat minri daya mahi gawian. ⁴ Eyauni ma here, 'Ware naun tulak ma kabun anggur hampan inun sa patut sagar amiku ma naun." Balalu here tulak. ⁵ Udihie, niba jam kaenem anri jam kasuei hanye tulak lagi balalu ngaraja hal sa sameh. ⁶ Kakira jam kasawalas, hanye tulak lagi balalu panalu ulun lain sa pada minri mahi gawian, hanye kaeyau ma here,'Inun ngulah naun minri hang yena puang bagawi sapanjang anrau yena?' ⁷ Eyau here ma hanye, 'Daya mahi sa ngami kami gawian.' Balalu hanye kaeyau ma here, 'Ware naun, tulak pada ma kabun anggurku.' ⁸ Dami anrau haut niba kamalem, hi ampun kabun yiru nunyu ma kapala gawini, "Herau katuluh ulun sa haut bagawi palus bayar upa here, mulai teka sa paling hanrian hawi hampe sa pamulaan ni.' ⁹ Hantek here sa na huyu bagawi teka jam kasawalas hawi, asing-asing ulun kaiyuh isa dinar. ¹⁰ Hantek here sa pamulaan ni bagawi hawi, here mina' sagar narime labis hene. Kude, asing-asing here pada sameh narime isa dinar. ¹¹ Dami here narime upa' yiru here balalu protes anri ulun sa ampun kabun. ¹² Here kaeyau, 'Kawan ulun sa masuk paling hanrian ekat bagawi erang jam, kude hanyu nyansameh here anri kami, sa nangung gawian nelang laing kai' erang anrau.' ¹³ Kude, sa ampun kabun yiru kaeyau ma here katuluh, 'Pulaksanai, aku puang hala anri hanyu. Angneh takam haut pakat erang dinar erang anrau? ¹⁴ Alap duitnu yiru balalu hulu tulak, daya aku hamen ngammi ma kawan ulun sa hanrian yiru sameh nyalah ammiku ma naun. ¹⁵ Inun kakira aku na puang iyuh sah ngatur kala awe ahengku makai harataku raerai? Atawa, inun sah matenu sa puang maeh daya aku maeh?' ¹⁶ Jari, sa hanrian sagar jari sa pamulaanni, kalahie pada sa pamulaanni sagar jari sa paling hanrian." ¹⁷ Hantek Yesus hamen tulak ma tumpuk Yerusalem, Hanye ngennei karuehwalas kawan muridNi kude puang sinrah. Hang lalan Hanye kaeyau ma here, ¹⁸ Tantau naun, takam rahat nuju ma tumpuk Yerusalem hang yaru Iya Murunsia sagar na sarah ma kawan imam kapala anri kawan ahli Taurat. Here sagar nukum Hanye anri pampatei. ¹⁹ Balalu here sagar nyarah Hanye ma kawan bangsa lain hampan na kasese, na weweh makai cambuk balalu na pantak hang kayu balasangar. Kude hang anrau sa katelu Hanye sagar welum kamulek." ²⁰ Udihie, ineh teka kawan anak hi Zebedeus hawi nunung Yesus balalu palus suruk sammah hadapanNi. ²¹ Yesus nunti ma hanye, "Inun sa na ahengnu?" Ineh yiru kaeyau, "Awat Hanyu marentah hampan karueh iyaku tau maharung hang KarajaanNu, isa hang pulak kawanNu anri isa hang pulak kawiNu," ²² Kude, Yesus kaeyau, "Hanyu puang kataru anri inun sa na lakunu. Kaule sah hanyu nguut teka galas sa harus na uut dayaKu?" Uras here kaeyau ma Yesus, "Hiai, kami kaule." ²³ Yesus kaeyau ma here, "Naun mula sagar nguut teka galasKu, kude ne'u maharung hang tuhi kawan atawa tuhi kawiku puang Aku sa ngamini, daya yiru ekat ma here sa haut na ampi siap daya Alatalla AmmahKu." ²⁴ Hantek kasapuluh murid sa lain nyanrengei hal yeru, here nyangit karueh pulaksanai yiru. ²⁵ Kude, Yesus balalu nerau here nelang kaeyau, "Naun karasa amun kawan pamarentah bangsa lain marentah hang ammau here, nelang kawan ulun pajabat here nampalus parentah teka sa hang ammau here. ²⁶ Sabujurni puang kalayiru amun hang penah naun, hie sa hamen jari paling hante hang penah naun, hanye harus jari walah naun. ²⁷ Udihie, hie sa hamen jari sa pamulaan hang penah naun, hanye pada harus jari walah naun, ²⁸ sameh iyalah Iya Murunsia sa hawi puang ne'u na layani, kude ne'u malayani anri ngami amirueNi jari tewuhan ma kawan ulun rama." ²⁹ Hantek here nanan tumpuk Yerikho, kawan ulun rama umma ngarairing hang wadingNi. ³⁰ Naan rueh kaulun pehe' sa rahat maharung hang iring lalan, here nyanrengei Yesus mitah hadapan here, balalu here miuik, "Tuhan, Iya Dawid, ware ahi leluNu ma kami!" ³¹ Ulun rama nyangit here nunyu here suni. Kude, here tatap miuik mehet, "Tuhan, Iya Dawid, ware ahi leluNu ma kami!" ³² Balalu, Yesus tarie' nelang nerau here Hanye kaeyau, "Inun aheng naun teka Aku?" ³³ Here kaeyau ma Hanye, "Tuhan, kami hamen hampan kami tau nantau." ³⁴ Yesus piahi anri here, balalu negei mate' here, hantek yiru pada here tau nantau kamulek, balalu umma ngarairing Yesus.