¹ Anrau yiru, Yesus kaluar teka lewu balalu maharung hang iring danau. ² Ulun rama hawi bakumpul nunung Hanye. Daya yiru, Hanye balalu mamai ma jukung palus maharung, ulun rama iru minri hang iring danau. ³ Hanye iwara wahai hal ma here mitah perumpamaan, eyauNi, "Naan erang kaulun penabur tulak lepuh ngamule, ⁴ hantek hanye tulak lepuh ngamule yeru, papire diki bibit lawu hang iring lalan, balalu kawan wunrung hawi lepuh nguta diki bibit yiru hampe galis. ⁵ Pada naan diki bibit sa lain sa lawu hang unengan penu watu, diki bibit yiru hinang welum daya taneni puang wahai. ⁶ Kude dami mate anrau hulet, amulean yiru matei daya laing anrau. Pada, daya mahi wakatni, balalu amulean yiru matei karing. ⁷ Diki bibit sa lain lawu hang helang jumpun barunrui, dami jumpun barunrui ru tum'mu magin hante, amulean yiru akhirni matei wah hipit. ⁸ Kude, diki bibit sa lawu hang tane maeh balalu tum'mu pada mahasil wua, naan sa jatuh kali lipat, naan sa enempulu kali lipat, pada naan sa telumpulu kali lipat. ⁹ Hie sa basilu ware hanye nyanrengei." ¹⁰ Balalu, kawan murid Yesus hawi palus nunti ma Hanye, "Daya inun Hanyu bapanner ma here makai rarapisan?" ¹¹ Yesus kaeyau ma kawan muridNi, "Ma hanyu haut na ammi katauen katarau ne'u Karajaan Surga, kude ma here puang. ¹² Daya, ma ulun sa baisi, ma hanye sagar na ammi wahai berkat. Kude, ma ulun sa puang baisi, teka hanye sagar na alap berkat yeru. ¹³ Irulah sababni, Aku bapanner nadap here makai rarapisan daya hantek here nantau here puang nantau, kalahie pada hantek here nyanrengei here puang nyanrengei, puang kataru pada. ¹⁴ Ne'u here, ganap inun sa haut na wara mitah Nabi Yesaya sa kaeyau, 'Makai silu, hanyu sagar karengei, kude tatap puang kataru. Kalahie pada, makai mate, hanyu sagar nantau, kude hanyu pada tatap puang kataru.' ¹⁵ Daya atei bangsa yena mape, silu here mandunging, mate here pehe. Amun puang kalairu himat here haut tau nantau, tau nyanrengei, pada tau kataru makai atei here, balalu iwaleng umma Aku pada palus nasamare.' Yesaya 6:9-10 ¹⁶ Daya yiru, na berkat matenu daya tau nantau kalahie pada silunu daya tau karengei. ¹⁷ Aku iwara ne'u hal sa tu'u bahwa wahai nabi anri kawan ulun maeh sa hamen nantau iyalah sa na tantau dayanu, kude here puang katantau, anri here pada hamen nyanrengei inun sa na sanrengeinu kude here puang karengei." ¹⁸ "Daya yiru, sanrengei arati rarapisan ne'u erang kaulun mi amule. ¹⁹ Hantek ulun nyanrengei ne'u Karajaan Alatalla kude here puang kataru, hi murun atei hawi balalu ngalap inun sa haut na amule hang wuang atei ulun yiru. Hanye ina ulun sa diki bibitni na amule hang iring lalan. ²⁰ Naan pada sa paamule hang uneng sa penu watu, hanye yiru ulun sa nyanrengei lengan Alatalla balalu narimeni palus miarai mihewu, ²¹ kude puang iwakat hang wuang ateini ekat batahan erang itus. Balalu, dami kahanangen hawi ma hanye daya lengan Alatalla yiru, hanye palus lawu. ²² Diki bibit sa lawu hang penah jumpun haket barunrui hanye yiru ulun sa nyanrengei lengan Alatalla, kude daya katakuten dunia anri akal murun panatau balalu lengan Alatalla yiru puang tau mu'a. ²³ Kude, ulun sa diki bibitni na amule hang tane maeh, hanye yiru ulun sa nyanrengei anri kataru ne'u lengan Alatalla. Hanye sa tu'u wahai mahasil wua, naan sa jatuh kali lipat, naan sa enempulu, naan pada sa telumpulu." ²⁴ Yesus nahampe rarapisan sa lain ma here, eyauNi, " Karajaan Surga yiru iyalah erang kaulun sa mi amule diki bibit sa maeh hang tane ummeni. ²⁵ Kude, hantek kawan ulun rama manre, hawi musuhni lepuh ngamule bibit alalang hang helang bibit gandum, balalu tulak. ²⁶ Hantek bibit gandum yiru tummu anri mua, alalang yiru pada tummu. ²⁷ Dami, kawan walah ulun sa ampun umme yiru hawi balalu nunti ma hanye, 'Tuan, angneh hanyu ngamule bibit gandum sa maeh hang ummenu? Balalu, teka awi selenga naan bibit alalang yiru?' ²⁸ Hanye kaeyau ma here, 'Erang kaulun musuh sa ngamuleni.' Udihie kawan walah yiru nunti ma hanye, "Inun kakira hanyu hamen hampan kami tulak palus nawah kawan alalang yiru?' ²⁹ Kude, tuan yiru kaeyau, 'Ada, elahleh! Daya, hantek naun nawah kawan alalang yiru, kawan gandum pada himat wuah tawah naun. ³⁰ Elahleh here uras tummu hampe musim masi die. Dami, hampe musim masi, aku marentah kawan sa mi amule, "Sa pertama, tawah dulu kawan alalang yiru udihie huruk palus na babat hampan na tutung. Kude wasian gandum yiru ware na kumpul hang wuang lumbungku." ³¹ Balalu Yesus basarita ne'u rarapisan sa lain ma here, kalaina eyauNi, "Karajaan Surga iru iyalah diki sawi sa na amule hang umme. ³² Diki sawi iru sa paling rumis teka katuluh masam diki, kude dami tummu, hanye labis hante teka katuluh masam sayur sa naan, hampe jari kakau ma kawan wunrung hang ammau langit hawi palus ngulah sarang hang kawan ra'anni." ³³ Yesus pada basarita ne'u rarapisan sa lain ma here, "Karajaan Surga yiru iyalah ragi, sa na alap erang kaulun wawei palus na kalut baya tepung telu sukat hampe katuluhni basampur rata baya ragi yiru. ³⁴ Katuluh hal yiru na wara Yesus ma kawan ulun rama mitah kawan rarapisan, Hanye bapaner ma here ekat makai rarapisan. ³⁵ Hampan ganap iyalah sa na tahampe daya Nabi, "Aku nguka wawaku paner mitah kawan rarapisan, Aku iwara kawan hal sa na dinna teka dunia yena na sanyari. " Mazmur 78:2 ³⁶ Balalu, Yesus nanan kawan ulun rama iru masuk ma wuang lewu. Kawan muridNi hawi nunung Hanye anri kaeyau, "Awat iwara ma kami arati rarapisan ne'u rikut alalang hang umme." ³⁷ Eyau Yesus, "Ulun sa ngamule diki bibit sa maeh hanye yiru Iya Murunsia, ³⁸ ummeNi hanye yiru dunia yena. Diki bibit sa maeh hanye yiru kawan iya Karajaan, balalu rikut alalang hanye yiru kawan iya hi murun atei, ³⁹ musuh sa ngamuleni hanye yiru hi Iblis, musim masi hanye yiru ahir dunia yena, here sa masi hanye yiru kawan malaikat Tuhan. ⁴⁰ Jari, kala kawan rikut alalang na himpun balalu na tutung hang apui, kala yiru pada die hantek ahir dunia yena. ⁴¹ Iya Murunsia sagar nunyu kawan malaikatNi ne'u nimpun katuluh watu sandungan kalahie pada kawan ulun sa murun atei teka karajaanNi, ⁴² balalu nawut here ma wuang rapuan apui. Hang yiru sagar wahai kiak tungkau baya aha'an dipen. ⁴³ Kude, kawan ulun maeh sagar mara'ai matalak iyalah mate anrau hang wuang Karajaan Alatalla Ammah. Hie naun basilu ware hanye nyanrengi." ⁴⁴ "Karajaan Surga iyalah harata karun sa pasimuh hang umme, ulun sa kahabani balalu hinang nyimuhni kamulek. Daya kaaraiyen ateini, hanye tulak lepuh ngari katuluh harata bannani balalu midi umme yiru. ⁴⁵ Kalahie pada, Karajaan Surga yiru iyalah erang kaulun sa miarian ngantara mutiara sa tu'u maeh. ⁴⁶ Dami hanye kahaba mutiara yiru, hanye tulak lepuh ngari harata bannani balalu midi mutiara yiru." ⁴⁷ Kalahie pada, Karajaan Surga yiru iyalah lunta sa na tawut ma ranu balalu kahaba wahai masam kenah. ⁴⁸ Hantek lunta yiru penu, here ngenneini ma pantai balalu maharung, ngumpul kawan kenah yiru sa maeh na huwe ma wuang karanyang, kude sa murun na umpe. ⁴⁹ Jari, kalayiru sa sagar bakajadian hang ahir dunia yena. Kawan malaikat Tuhan tulak lepuh misah kawan ulun sa murun atei anri kawan ulun sa maeh atei, ⁵⁰ balalu nawut kawan ulun sa murun atei yiru ma wuang rapuan apui. Teka yiru karengeian kiak tungkau baya aha'an dipen. ⁵¹ Haut kataru sah naun ne'u katuluh hal yiru?" Here kaeyau ma Hanye, "Hiai kami kataru." ⁵² Balalu, Yesus kaeyau ma here, "Daya yiru, tiap ahli Taurat sa haut jari murid Karajaan Surga, hanye iyalah ulun sa ampun lewu sa ngaluar harata sa wau kalahie pada sa lawah teka harata bannani." YESUS PUANG NATARIME HANG TUMPUK NATATNI ⁵³ Hantek Yesus haut luput nahampe kawan rarapisan yiru, Hanye tulak. ⁵⁴ Hantek Yesus hampe hang tumpuk natatNi, Hanye ngajar hang kawan sinagoge hampe katuluh ulun ngawauhen balalu kaeyau, "Hingka awe Ulun yina kaiyuh kabijaksanaan baya kawan mujizat yena? ⁵⁵ Angneh Hanye yena iya teka erang kaulun tukang kayu? Angneh inehNi sa bangaran Maria, angneh kawan pulaksanaiNi hanye yiru hi Yakobus, hi Yusuf, hi Simon anri hi Yudas? ⁵⁶ Angneh kawan pulaksanaiNi sa wawei naan baya takam? Balalu, teka awe Ulun yena kaiyuh katuluh hal yiru?" ⁵⁷ Balalu, here puang marauh atei dayaNi. Daya, Yesus kaeyau ma here, "Erang kaulun nabi natarime hang awepun unenganni ekat hang tumpuk natat lewuni raerai sa hanye puang natarime." ⁵⁸ Hang yiru Hanye puang ngulah wahai mujizat daya here sika puang harap.