¹ Hang kateka yiru, Yesus takia mitah umme gandum hang anrau Sabat, nelang kawan murid-Ni kalauwan, balalu here ngutik kawan wusi gandum, palus ngutani. ² Kude, hantek kawan ulun Farisi nantauni, here balalu kaeyau ma Hanye, "Tantau, kawan murid-Nu ngaraja hal sa na uring hang anrau Sabat." ³ Kude, Yesus kaeyau ma here, "Huan suah sah naun mambasa inun sa na karaja daya Dawid hantek hanye baya here sa umma anri hanye kalauwan, ⁴ Kalaawe hanye masuk ma Lewu Alatalla palus nguta rote parapah sa puang iyuh na kuta dayani, kalahie pada puang iyuh nakuta daya kawan ulun sa baya hanye, ekat iyuh nakuta daya kawan imam? ⁵ Atawa, huan suahkah naun mambasa Hukum Taurat, amun hang anrau Sabat, kawan imam hang Lewu Alatalla puang ngalut ajar hukum Sabat, kude here puang na ampi hala? ⁶ Kude, Aku iwara ma naun naan hang yina sa labis hante teka Lewu Alatalla. ⁷ Kude, iru amun hanyu kataru aratini : ' Aheng-Ku hanye iru ahi lelu puang parapah', daya hanyu puang sagar nukum sa puang bahala. ⁸ Daya, Anak Murunsia hanye yiru Tuhan hang ammau anrau Sabat." ⁹ Udi tulak teka yiru, Yesus hampe hang sinagoge. ¹⁰ Hang yiru naan erang kaulun upu sa lumpuh tuhi tanganni. Balalu, here nunti anri Yesus, eyau here, "Inun iyuh sah nyamare ulun hang anrau Sabat?" aheng here hampan tau ngampihala Yesus. ¹¹ Balalu, Hanye kaeyau ma here, "Hie diantara naun sa baisi erang kaukui babiri, anri amun babiri yiru lawu ma luwang hang anrau Sabat, ang neh hanye sagar negei palus ngampikalaur babiri yiru teka luwang? ¹² Labis baharaga murunsia teka erang kaukui babiri! Daya yiru, patut ngaraja hal sa maeh hang anrau Sabat". ¹³ Udi hie, Yesus kaeyau ma ulun yiru, "Tarui tangannu." Ulun yiru narui tanganni balalu ware sameh nyalah kawan ulun sa lain. ¹⁴ Kude, kawan ulun Farisi tulak teka yiru nelang basakongkol ne'u nawan Hanye, kalaawe sarank hampan tau munu Hanye. ¹⁵ Dami, Yesus, karasa hal yiru, Hanye tulak yiru. Wahai kawan ulun sa umma Hanye palus Hanye nyamare here katuluh, ¹⁶ nelang ngampiitung here hampan puang iwawara ne'u Hanye. ¹⁷ Hal ina ne'u ngampi ganap inun sa haut na tahampe mitah Nabi Yesaya : ¹⁸ "Tantau, ina walah-Ku sa haut na pidiKu, sa nakaleluKu, sa ma Hanye amirueKu baaheng. Aku ngami ruhKu ma ammauNi, anri Hanye sagar mantaru sa adil ma kawan bangsa lain. ¹⁹ Hanye puang sagar ibantah, atawa miuik, anri puang sagar naan erang kaulunpun sa nyanrengei lenganNi hg lalan-lalan. ²⁰ Paring sa tepu puang sagar natampitusNi, nelang summu sa kai pare' puang sagar na tampareNi, hampe Hanye ngulah kaadilan manang, ²¹ nelang hang wuang ngaranNi, kawan bangsa lain sagar baharap. ²² Naan erang kaulun sa harung alah, nelang pehe anri muna, na ennei ma hadapan Yesus. Udi hie, Yesus nyamareni balalu erang kaulun sa pehe anri muna ru tau bapaner anri ninung. ²³ Katuluh ulun jari ngawauh nelang nunti, "Inun sah Hanye na Iya Dawit? ²⁴ Kude, katika kawan ulun Farisi nyanrengeini here balalu kaeyau, "Ulun ina puang sagar tau nunyu kawan ruh alamurun kaluar amun hanye ina puang hi Beelzebul, hanye yiru pamimpin kawan ruh alamurun." ²⁵ Yesus karasa inun sa naan hang wuang akal pikir here palus kaeyau ma here, "Tiap karajaan sa pasai darai nawan tengani raerai, sagar na tanan. Kalahie pada, tiap tumpuk atawa lewu sa pasai darai nawan tengani raerai, puang sagar tau batahan. ²⁶ Kalahie pada, amun iblis nunyu kaluar iblis, hanye sagar pasai darai nawan tengani raerai. Amun kalahie, kalaawe karajaanni sagar tau batahan? ²⁷ Kalairu pada, amun Aku, nunyu kawan ruh alamurun kaluar makai ngaran hi Beelzebul, balalu makai ngaran hie sah kawan anaknu nunyu here kaluar? Daya iru here sa sagar jari hakimnu. ²⁸ Kude, amun Aku nunyu kaluar ruh alamurun makai Ruh Alatalla, Karajaan Alatalla haut hawi ma naun. ²⁹ Kalahie pada, kalaawe erang kaulun tau masuk ma lewu ulun lain sa kuat ne'u ngalap anri paksa kawan harata bannani amun hanye puang badahulu nuruk ulun sa kuat yiru? Udi hie, wau hanye kaiyuh ngalat harata hang lewu iru. ³⁰ Hie pun sa puang baya AKu, nawan aku. Nelang puang hakun bakumpul anri Aku, sagar pasai darai. ³¹ Daya iru, Aku kaeyau ma hanyu amun tiap dusa anri eyauan puang maeh murunsia sagar na ampuni, kude eyauan puang maeh ne'u Ruh puang sagar na ampuni. ³² Kalahie pada, hieleh sa kaeyau hal sa nawan Anak Murunsia sagar na ampuni, kude hieleh sa bapanner nawan Ruh Barasis puang sagar na ampuni, hg masa taati atawa hang masa hg hadapan." ³³ "Amun kakau kayu iru maeh, wu'ani sagar maeh pada. Atawa, amun kakau kayu yiru puang maeh, wu'ani puang sagar maeh pada. Daya iru, kakau kayu na pantaru teka wu'ani. ³⁴ U, naun turunan anipe beludak, kalaawe naun sa murun atei tau iwara kawan hal sa maeh? Daya teka wuang atei, wawa bapanner. ³⁵ Ulun maeh ngaluar kawan hal maeh teka panatauni sa maeh, kalahie pada ulun murun atei ngaluar kawan hal murun teka panatauni sa puang maeh. ³⁶ Kude, aku iwara ma naun amun tiap kata sa sasia, sa na wara ulun, here sagar nangungjawabni hang anrau penghakiman. ³⁷ Daya wusi surahnu, hanyu na ampi tuu, kalahie pada daya wuai surahnu, hanyu tau na hukum. V 38 Udihie, papire kaulun ahli Taurat baya ulun Farisi iwara ma Yesus, "Guru, kami hamen nantau tanna teka Hanyu." ³⁹ Kude, Yesus kaeyau ma here, "Generasi sa murun atei anri katuju idapa ina hamen laku tanna teka AKu. Mahi tanna sa sagar na ami ma here lain teka tanna Nabi Yunus. ⁴⁰ Daya iru, iyalah Yunus muneng hang wuang wuntung kenah salawah telu anrau telu malem kalairu pada Anak Murunsia sagar muneng hang wuang wuntung tane salawah telu anrau telu malem. ⁴¹ Kawan ulun Niniwe sagar minri baya anri generasi ina hang anrau penghakiman anri sagar na hukum kude here batobat udi nyanrengei khotbah hi Yunus. Pada, tantau, sa labis hante teka hi Yunus naan hang ina. ⁴² Ratu teka Selatan sagar bangkit sinrah baya generasi ina hang anrau penghakiman balalu sagar na hukum daya hanye hawi teka hujung bumi ne'u nyanrengei hikmat hi Salomo. Pada, tantau, sa labis hante teka hi Salomo naan hang ina. ⁴³ Dami ruh alamurun kaluar teka murunsia, hanye mitah kawan unengan sa puang baranu ne'u ngantara unengni istirahat, kude hanye puang kahaba unengan yiru. ⁴⁴ Balalu, hanye kaeyau, 'Aku hamen mulek ma lewu isa haut tananku huni.' Dami hanye hampe, hanye nantau lewu iru lawang, balalu hanye ipapas palus maraduni. ⁴⁵ Udi hie, ruh alamurun iru tulak balalu mulek ngennei pitu ruh lain sa labis murun atei teka hanye, here masuk palus muneng hang lewu lawang iru. Hal iru ngulah kondisi ulun iru magin puang maeh teka kapihuanni. Kalairu pada sa sagar bakajadian anri generasi sa murun atei ina. ⁴⁶ Hantek Yesus masih bapanner anri ulun rama, Hanye nantau ineh baya kawan pulaksanaiNi minri hang luar, nelang bausaha hamen bapanner anri Hanye. ⁴⁷ Erang kaulun kaeyau ma Hanye, "Tantau, ineh baya kawan pulaksanaiNu minri hang luar, here hamen bapanner anri Hanyu." ⁴⁸ Kude, Yesus kaeyau ma ulun iru, "Hie sah inehKu kalahie pada hie sah pulaksanaiKu?" ⁴⁹ Balalu, nelang ngenat tanganNi nutui kawan muridNi, Yesus kaeyau, "Ina inehKu pada ina pulaksanaiKu! ⁵⁰ Daya hieleh sa ngaraja aheng Alatalla Ammah-Ku sa hg Surga, hanye irulah pulaksanaiKu upu, hanye irulah pulaksanaiKu wawei, hanye irulah inehKu."