¹ Hantek Yesus luput ngami parentah ma ka rueh walas murid-Ni, Hanye tulak teka yiru ne'u ngajar ulun rama nelang iwara pesen Alatalla hang kawan tumpuk here. YESUS ANRI HI YOHANES PAMBAPTIS. ² Taati, hantek hi Yohanes, sa rahat hang wuang penjara, karengei kawan gawian Kristus, hanye ngirim pesen mitah kawan muridni, ³ nelang nunti ma Yesus, "Inun Hanyu sa hawi yiru, atawa kami harus nganrei sa lainni lagi?" ⁴ Yesus manjawab nelang kaeyau ma here " Tulak palus wara ma hi Yohanes inun sa na sanrengei anri natantau naun, ⁵ sa pehe tau nantau kamulek, sa puang kaiyuh takia tau kaiyuh takia, sa bapanyakit kusta na samare, sa marengen tau nyanrengei, sa matei welum kamulek, kalahie pada ma here sa paua na tahampe kabar maeh ne'u Injil. ⁶ Na ami berkat kawan ulun sa puang pahawit daya-Ku " ⁷ Dami here tulak, Yesus mulai bapaner hang penah kawan ulun rama ne'u hi Yohanes, " Inun sa hamen na tantau naun hang penah jumpun haket? Erang kawatang paring sa na siwui riwut ma yaru ma yati? ⁸ Atawa ma inun naun tulak ma yaru? Erang kaulun sa ba pama maeh? Kawan ulun sa ba pama maeh ru ekat muneng hang istana raja. ⁹ Ne'u nantau inun naun tulak? Erang kaulun nabi? Tu'u, patut naun karasa Aku iwara ma naun, hanye ina labih hante teka erang kaulun nabi. ¹⁰ Daya, hanye yiru erang kaulun sa ne'u hanye haut na tulis : ' Tantau naun! Aku ngirim utusan-Ku badahulu teka Hanyu. Hanye sa ngampi siap lalan ma Hanyu hang hadapan-Nu. ' Maleakhi 3:1 ¹¹ Aku iwara kabar sa kapinu'uni ma hanyu, mahi erang kaulun murunsia sa nakayaan, sa labih hante teka hi Yohanes Pembaptis. Kude, sa paling rumis hang wuang Karajaan Surga, labih hante teka hanye. ¹² Teka katika Yohanes Pembaptis hampe taati, Karajaan Surga nginam kakarasen, nelang kawan ulun sa jahat ngulahni anri arai. ¹³ Daya yiru, katuluh nabi anri Hukum Taurat iwara hal yiru hampe katika hi Yohanes. ¹⁴ Nelang, amun hanyu narimeni, hanye yirulah hi Elia sa sagar hawi. ¹⁵ Hie sa baisi silu pakai nyanrengei, ware hanye nyarengei! ¹⁶ Kude, makai inun Aku mambanding generasi taati? Here yiru ialah kawan iya rumis sa maharung hang unengan-unengan ulun rama, sa nerau kawan hengauni, ¹⁷ nelang kaeyau, 'Kami nyiwui suling ma hanyu, kude hanyu puang nanrik. Kami numet lagu hanang atei, kude hanyu puang mahanang atei.' ¹⁸ Dami hi Yohanes hawi puang kuman, puang nguut ranu, balalu here kaeyau, 'Hanye itun alah.' ¹⁹ Kude, dami Anak Murunsia hawi balalu kuman anri nguut ranu, here pada kaeyau, 'Tantau, erang kaulun sa mauruh nelang mahamui, hengau kawan ulun sa ngumpul pajak baya kawan ulun badusa.' Kude, hikmat jari tu'u daya karajani. PANGITUNGEN NE'U ULUN SA PUANG PARISAYA ²⁰ V 20 Udi hie Yesus mulai mada kawan tumpuk unengNi ngulah wahai mukjizat daya here tenek puang batobat. ²¹ Silaka hanyu, razim! Silaka hanyu, tumpuk Betsaida! Daya, kawan mukjizat sa haut na ulah hang penah naun haut pada na ulah hang tumpuk Tirus baya Sidon, here haut lawah batobat makai pama kabung anri habu. ²² Kude, Aku iwara ma hanyu amun hang anrau penghakiman, tumpuk Tirus baya Sidon sagar nangung dusa sa labih hante teka hanyu. ²³ Balalu, hanyu, tumpuk Kapernaum, innanu hanyu sagar na tawat hampe ammau langit? Puang, hanyu sagar na ampinau ma tumpuk adiau, daya amun kawan mukjizat sa haut na ulah hang penah naun yiru na ulah hang tumpuk Sodom, tumpuk yiru sagar tatap naan hampe taati. ²⁴ Kude, aku iwara ma hanyu amun hang anrau penghakiman, tumpuk Sodom sagar tau labih nangungni teka naun. "KAARAYEN MA ULUN SA HAWI NUNUNG YESUS ²⁵ Hantek yiru Yesus kaeyau, " Aku nawat Hanyu, Alatalla Ammah, Tuhan ammau langit anri kapit tane, daya Hanyu nyanina katuluh ina teka kawan ulun pintar nelang maharati, kude nahampeni ma kawan iya rumis. ²⁶ Hiai, Alatalla Ammah, daya sa kalayirulah sa maeh hang hadapan-Nu. ²⁷ Katuluh haut na sarah ma Aku daya Ammah-Ku. Nelang mahi erang kaulun sa kataru ne'u Anakni, amun puang Ammahni; kalayiru pada mahi erang kaulun sa kataru ne'u Ammahni amun puang Anakni daya yiru aheng Sang Anak hampan katuluh ulun iwara ne'u hal yiru. ²⁸ Hawi nunung Aku, katuluh naun sa jura rapai tenga daging nelang sa wahai masalah, daya Aku hamen ngami naun lalaga. ²⁹ Sandang kuk sa napasang dayaKu, nelang piajar teka Aku daya aku lemah lembut anri imme atei, jari amiruenu tau tanang. ³⁰ Daya, kuk sa napasang-Ku iru murah nelang masalah-Ku madinei.