¹ Balalu, Yesus nerau ka rueh walas murid-Ni anri ngami here kuasa hang ammau kawan roh sa murun ne'u ngumpe kawan roh iru anri ne'u nyamare wahai masam panyakit kalahie pada wahai masam kahangen. ² Ina ngaran-ngaran ka rueh walas rasul yiru : sa taraulu, hi Simon sa na herau Petrus, anri hi Andreas pulaksanaini, anri hi Yakobus iya Zebedeus, anri hi Yohanes pulaksanaini, ³ hi Filipus, anri hi Bartolomeus, hi Tomas, anri hi Matius tukang kumpul pajak, hi Yakobus iya Alfeus, anri hi Tadeus, ⁴ hi Simon ulun teka tumpuk Zelot, anri hi Yudas Iskariot sa ngari Yesus ⁵ Yesus ngutus ka rueh walas rasul iru nelang marentah here, "Ada tulak ma lalan kawan bangsa lain atawa masuk ma wuang tumpuk ulun Samaria, ⁶ kude tulakleh nunung kawan babiri sa tawang teka helang kawan umat Israel. ⁷ Anri, salawah hanyu tulak, ware nahampe habar maeh nelang iwara, "Karajaan Surga haut rupak.' ⁸ Samare kawan ulun sakit, samelum kawan ulun matei, ampibarasis kawan ulun kusta, anri umpe kawan roh sa puang maeh. Hanyu narime puang bawayat, hanyu ngami puang bawayat. ⁹ Ada hanyu ngennei amas, atawa perak, atawa tembaga hang wuang panningnu, ¹⁰ atawa tas ne'u jalanannu, atau rueh lammar pama, atawa sannal, atawa tungkeh daya erang kaulun sa bagawi patut narime makutani ¹¹ Balalu, hang tumpuk hante atawa hang tumpuk rumis hang aweleh hanyu masuk, sampining hie sa patut hang wuangni udi hie munengleh hang yaru hampe hanyu nampalus jalanannu lagi. ¹² Hantek hanyu masuk ma erang kawua lewu, ami tabe. ¹³ Amun lewu iru patut, elah damai sejahteranu muneng hang yiru, kude amun puang, elah damai sejahteranu ru mulek ma hanyu. ¹⁴ Balalu, hielah ulun sa puang narime hanyu atawa puang hakun nyanrengei piwaraannu, hantek hanyu kaluar teka lewu atau tumpuk yiru, kibah habu teka peenu. ¹⁵ Aku iwara habar sa tu'u ma hanyu, amun hang anrau penghakiman, tane hang Sodom anri Gomora sagar labih madinei tangunganni teka tumpuk yiru. " ¹⁶ "Dinung, Aku ngutus naun kala babiri ma penah sarigala. Daya yiru, naun harus pandai kala anipe nelang tulus atei kala wurung dara. ¹⁷ Kude, naun harus bahati-hati nadap kawan ulun sa sagar nyarah naun ma pangadilan palus ngahanangen naun hang kawan lewu sumbayang. ¹⁸ Naun sagar naendei ma hadapan kawan panguasa anri kawan raja daya Aku, nampan naun ngami kasaksian neu Aku ma here anri ma kawan bangsa lain. ¹⁹ Kude, amun here nyarah naun, ada naun gaer neu inun atawa kalaawe naun bapaner, daya tawuk yiru jua sagar nawara ma naun inun sa harus naantuh daya naun. ²⁰ Daya, sa bapaner hang tawuk yiru puang naun, malengkan Roh Ambah-Nu, itetei naun. ²¹ Pulaksanai sagar nyarah pulaksanaini raerai nampan na wunu, balalu kalayiru pada ambah anri anakni. Kawan anak sagar nawan ineh ambahni, balalu nyarah here nampan na wunu. ²² Naun sagar jari kakuaren katuluh ulun daya gana ngaran-Ku, kude ulun sa batahan hampe pijumpuhanni sagar nasalamat. ²³ Amun naun nasiksa hang isa tumpuk, lempat ma tumpuk sa lain. Aku iwara ma naun kapihuan naun litar ngaliling katuluh tumpuk hang Israel, Anak Murunsia haut hawi. ²⁴ Murid puang labis taman teka guruni, kalahie pada palayan puang labis tamam teka tuanni. ²⁵ Haut sukup amun murid jari kala guruni, nelang palayan jari kala tuanni. Amun kapala kaluarga haut nagalar Beelzebul, duanni anggota kaluarga hang lewuni." Takut ma Alatalla puang ma murunsia ²⁶ "Daya yiru, ada naun takut nadap here daya puang sunah isa sa natutup sa puang sagar padinung, atawa puang sunah isa sa nadina sa puang sagar tabungkar. ²⁷ Inun sa naeauku ma naun hang maieng, wara kamulek tawuk maraai. Inun sa na keneh hang silu naun, wara yiru hang ambau hapau. ²⁸ Ada takut anri here sa tau munu tenga, kude puang tau munu amirue, ware takut ma Hanye sa bakuasa ngampi binasa amirue atawa tenga hang naraka. ²⁹ Angneh rueh kaukui angkarei naari makai duit sapeser? Kude puang sunah erang kaukui lawu ma tane amun puang nakabahumen Amahnu. ³⁰ Likan katuluh wila wulu hang ulunu haut rasa jumalahni. ³¹ Daya yiru, ada takut,naun labis baharaga teka kawan angkarei." Mangaku Yesus hang hadapan murunsia ³² "Jari, tiap kaulun sa mangaku Aku hang hadapan murunsia, Aku pada sagar mangaku hanye hang hadapan Ambah-Ku hang surga. ³³ Kude, hie sa puang mangaku Aku hang hadapan murunsia, Aku pada sagar puang mangaku hanye hang hadapan Ambah-Ku hang surga." Tujuan Pihawian Yesus ³⁴ "Ada naun minda amun Aku hawi ngendei pidamai ma dunia. Aku hawi puang ngendei pidamai, malengkan pibaburan. ³⁵ Daya, Aku hawi pakai mamisah anak upu teka ambahni, anak wawei teka inehni, nantu wawei teka kasianni wawei, ³⁶ sa jari musuhni hanye yiru teka kawan kulawarga raerai. ³⁷ Hie sa sinta anri inehni atawa anri ambahni diwi teka sintani ma Aku, puang patut umba Aku. Kala yiru pada, hie sa sinta anakni upu atawa anakni wawei diwi teka sintani ma Aku pada puang patut umba Aku. ³⁸ Hie sa puang mikul balasangarni palus umba Aku, puang patut umba Aku ³⁹ Hie sa malihara pamelumni sagar kawawaian pamelumni, kude hie sa kawawaian pamelumni daya Aku sagar kaiyuh pamelumni." Upa teka Alatalla ⁴⁰ "Hie sa narime naun, narime Aku. Nelang, hie sa narime Aku, narime Hanye sa ngutus Aku. ⁴¹ Hie sa narime nabi daya hanye nabi, sagar narime kala upa erang kaulun nabi. Nelang, hie sa narime erang kaulun maeh daya hanye maeh, sagar narime kala upa erang kaulun maeh. ⁴² Hie sa ngami ranu uut biar ekat erang sangkir ranu marisak ma erang kaulun teka kawan murid-Ku yiti, ulun yiru puang sagar kawawaian upani."