¹ Hang mula ni hanye yiru Lengan Alatalla, Lengan Alatalla yiru baya Alatalla nelang Lengan Alatalla yiru hanye yiru Alatalla yiru raerai. ² Lengan Alatalla yiru haut baya Alatalla teka mula ni. ³ Teka katuluh ni na sanyari mitah Hanye. Amun puang dayaNi, katuluh sa haut jari yiru puang sagar naan. ⁴ Hang wuang Hanye naan welum nelang welum yirulah Ra'ai murunsia. ⁵ Ra'ai iru matalak hang wuang pi'ieng, kude pi'ieng puang kaiyuh manguasaiNi. ⁶ Naan erang kaulun sa na utus daya Alatalla, ngaranni hi Yohanes. ⁷ Hanye hawi jari saksi nahampe habar ne'u Ra'ai yiru hampan mitah hanye katuluh ulun parisaya. ⁸ Hi Yohanes lain Ra'ai yiru, kude hi Yohanes hawi nahampe habar ne'u Ra'ai yiru. ⁹ Ra'ai sa kapinu'uni, sa nyanra'ai katuluh murunsia sagar hawi ma dunia yena. ¹⁰ Ra'ai yiru haut naan hang dunia yena nelang dunia yena haut na sanyari dayaNi, kude dunia yena puang kataru anri Hanye. ¹¹ Hanye hawi nunung here sa haut na sanyariNi, kude here sa haut na sanyariNi puang narime Hanye. ¹² Here sa narime Hanye na ami kuasa ne'u jari kawan iya Alatalla, hanye yiru here sa parisaya ma ngaranNi. ¹³ Here nakayaan puang teka ira atawa aheng lunek, atawa teka aheng kawan upuan, kude teka Alatalla. ¹⁴ Lengan Alatalla yiru haut jari lunek nelang muneng baya takam. Takam haut nantau pihanteNi, hanye yiru pihante Iya Tunggal Alatalla Ammah, sa penu baya anugerah nelang sa kapinu'uni. ¹⁵ Hi Yohanes iwara ne'u Hanye nelang bapanner, "Hanye yena sa na waraku hantek aku kaeyau, 'Udi aku, sagar hawi Hanye sa badahulu teka aku daya Hanye haut naan sahuan aku."' ¹⁶ Teka kuasaNi takam katuluh narime kawan anugerah. ¹⁷ Daya, Hukum Taurat na ami mitah hi Moses; kude anugerah sa kapinu'uni hawi mitah Yesus Kristus. ¹⁸ Mahi erang kaulunpun sa suah kadinung Alatalla, kude Iya Tunggal Alatalla sa maharung hang pangkuan Alatalla Ammah sa ngampi jariNi. ¹⁹ Ina piwaraan hi Yohanes hantek kawan ulun Yahudi nunyu kawan imam baya kawan ulun Lewi teka tumpuk Yerusalem ne'u nunti ma hi Yohanes, "Hie sah hanyu na?" ²⁰ Hi Yohanes iwara, "Aku na lain Kristus." ²¹ Here kamulek nunti ma hanye, "Amun kalayiru, hie sah sabujurni hanyu na? Hi Elia?" Balalu hanye kaeyau, "Aku lain hi Elia." "Inun sah hanyu na Nabi iru sah?" Hanye pada kaeyau, "Lain." ²² Udihie, here balalu bapaner lagi anri hanye, "Hie sah hanyu na, daya kami hamen iwara ma ulun sa nunyu kami? Inun eyaunu ne'u tenganu raerai?" ²³ Hi Yohanes bapaner makai surah Nabi Yesaya, "Aku ina lengan ulun sa na wara daya Nabi Yesaya sa natiak hang padang jumpun haket kalaina : 'Ampi witu lalan ma Tuhan!"' Yesaya 40:3 ²⁴ Kawan ulun Yahudi sa na huyu yiru hanye yiru ulun Farisi. ²⁵ Balalu, here kaeyau ma hi Yohanes, "Amun hanyu lain Mesias, lain hi Elia, pada puang Nabi, daya inun hanyu ngampanrus ulun?" ²⁶ Hi Yohanes kaeyau ma here, "Aku ngamparus ulun makai ranu, kude hang penah naun minri erang kaulun sa puang naun kataru. ²⁷ Hanye sa sagar hawi udi aku. Nguka tadi sannalNi gin, aku puang patut." ²⁸ Katuluh yiru bakajadian hang tumpuk Betania, hang subarang Hungei Yordan, uneng hi Yohanes ngamparus ulun. ²⁹ Makeunini, hi Yohanes nantau Yesus hawi nunung hanye, hi Yohanes kaeyau, "Tantau naun, Iya Babiri Alatalla sa mahapus dusa dunia! ³⁰ Hanye ina sa nawaraku ma naun, 'Udi aku sagar hawi erang kaulun sa labis hante teka aku daya Hanye haut naan kapihuan aku.' ³¹ Sadi, aku puang kataru anri Hanye, kude hampan Hanye na pantaru ma kawan ulun Israel, balalu aku hawi ngamparus naun makai ranu." ³² Balalu, hi Yohahes kaeyau, "Aku nantau Ruh Alatalla minau teka ammau langit iyalah wurung merpati nelang Ruh Alatalla yiru muneng baya Hanye. ³³ Aku puang kataru anri Hanye, kude Hanye sa nunyu aku ngampanrus kawan ulun maka ranu kaeyau ma aku, 'Hanye sa hang ammauNi hanyu nantau Ruh Alatalla minau nelang muneng baya, Hanye yiru sa sagar ngampanrus kawan ulun makai Ruh Barasis.' ³⁴ Aku raerai haut nantau nelang iwara amun Hanye yina Iya Alatalla."' ³⁵ Maketunini, hi Yohanes minri baya rueh kaulun muridni, ³⁶ hanye nantau Yesus rahat takia. Hi Yohanes kaeyau, "Tantau, iru Iya Babiri Alatalla!" ³⁷ Karueh muridni nyanrengei inun sa na wara daya hi Yohanes balalu here umma Yesus. ³⁸ Yesus ngulik ma wading anri nantau here umma baya Hanye, Hanye kaeyau ma here, "Inun sa na antara naun?" Here kaeyau ma Hanye, "Rabi, hang awe Hanyu muneng?" ³⁹ Hanye kaeyau ma here, "Mayati hanyu sagar nantauni." Balalu, here hawi palus nantau unengNi muneng pada here muneng baya Hanye anrau yiru daya katika yiru kakira pukul kasapuluh. ⁴⁰ Erang kaulun teka karueh murid sa nyanrengei paner hi Yohanes balalu umma Yesus hanye yiru hi Andreas, pulaksanai hi Simon Petrus. v 41 Kapihuanni hi Andreas manalu hi Simon, pulaksanaini, nelang iwara ma hanye, "Kami haut panalu baya Mesias." ⁴² Balalu, hi Andreas ngennei hi Simon manalu Yesus. Yesus nantau hi Simon nelang kaeyau, "Hanyu Simon, anak hi Yohanes. Hanyu sagar na herau Kefas (sa aratini 'Petrus' atawa 'Watu')." ⁴³ Makeunini, Yesus ngaheng tulak ma tumpuk Galilea. Hanye panalu anri hi Filipus nelang kaeyau ma hanye, "Ware hanyu umma AKu!"' ⁴⁴ Hi Filipus yiru teka tumpuk Betsaida, tumpuk hi Andreas anri hi Petrus muneng. ⁴⁵ Hi Filipus panalu anri hi Natanael balalu iwara "Kami haut panalu anri Hanye sa na surat daya Muses hang wuang Hukum Taurat anri daya kawan nabi, hanye yiru Yesus teka tumpuk Nazaret, iya hi Yusuf." ⁴⁶ Hi Natanael kaeyau, "Tu'u sah hal sa maeh hawi teka tumpuk Nazaret?" Hi Filipus kaeyau ma hanye, "Hawi anri tantauleh raerai." ⁴⁷ Yesus nantau hi Natanael hawi nunung Hanye balalu Yesus kaeyau ne'u hi Natanael, "Tantau naun, erang kaulun Israel sa sabujurni, mahi sa puang maeh hang hanye!" ⁴⁸ Hi Natanael nunti, "Kalaawe Hanyu kataru anri aku?" Yesus kaeyau, "Kapihuan hi Filipus nerau hanyu, Aku haut ninung hanyu hantek hanyu minri hang imme kakau ara." ⁴⁹ Eyau hi Natanael, "Rabi, Hanyu na tu'u Iya Alatalla. Hanyu na Raja kawan ulun Israel." ⁵⁰ Yesus kaeyau ma hanye, "Daya yiru Aku kaeyau ma hanyu, 'Aku haut nantau hanyu minri hang imme kakau ara', balalu hanyu harap? Hanyu sagar nantau kawan hal sa labis hante teka yina!" ⁵¹ Hanye balalu nampalus pannerNi, "Sa kapinu'uni, Aku iwara ma hanyu, hanyu sagar nantau ammau langit pa uka anri kawan malaikat Alatalla mamai minau ne'u malayani Iya Murunsia."