Pihawian Roh Barasis ¹ Dami hampe andrau Pentakosta, katuluh here ba kumpul hang uneng sa sameh. ² Salenga karengeian teka langit, lengan ialah riwut barat, balalu lengan yiru nampenu katuluh isi lewu uneng here maharung. ³ Na tantarang ma here lela-lela ialah apui balalu bahamur minau hang amau here isa-isa. ⁴ Balalu, katuluh here na tampenu andri Roh Barasis balalu here mulai bapaner hang hene masam bahasa, ialah sa na ami daya Roh Barasis pakai here bapaner. ⁵ Hantek yiru, naan kawan ulun Yahudi sa muneng hang tumpuk Yerusalem, kawan ulun saleh teka kawan bangsa hang kapit langit. ⁶ Hantek, lengan yiru karengeian, kumpulan ulun rama hawi nelang bingung daya tiap ulun karengei here bapaner hang wuang bahasa here raerai. ⁷ Here wa'uh tatu'u, nelang kaeau, "Ang sa here sa ganyah bapaner yena kawan ulun Galilea? ⁸ Kalaawe salenga takam karengei here na bapaner makai basa uneng takam na kaya'an? ⁹ Kawan ulun Partia, andri Media, andri Elam, andri warga Mesopotamia, Yudea, andri Kapadokia, Pontus, andri Asia, ¹⁰ Frigia, andri Pamfilia, Mesir, andri daerah-daerah Libia riet Kirene, andri ulun sa hawi teka Roma, kawan ulun Yahudi kalahie pada kawan proselit. ¹¹ kawan ulun Kreta andri Arab. Takam nyanrengei here bapaner makai basa takam ne'u ulah gawi hante Alatalla." ¹² Balalu, katuluh here wa'uh tatu'u andri bingung nelang kaeau andri sa lain, "inun arati katuluh yina?" ¹³ Kude, ulun sa lain kakihi nelang kaeau here, "Here na mahamui daya anggur wau." ¹⁴ Petrus Bpaner Nadap Ulun Rama ¹⁴ Petrus mindri andri kasawalas rasul, palus bapaner ma here, "Rengei naun kawan ulun Yahudi andri katuluh sa muneng hang Yerusalem, hampan naun katuluh karasa nelang nyandrengei lenganku. ¹⁵ Daya, kawan ulun ina puang mahamui, ialah sa na tanguh naun daya andrau wa'u pukul telu, ¹⁶ kude ina sa napaner mitah Nabi Yoel: ¹⁷ "Hang andrau-andrau pangalisan sagar ba kajadian, Alatalla nampe lengan-Ni: Aku sagar ngampinau Ruh-Ku ma amau katuluh murunsia. Kawan iyanu upu andri kawan iyanu wawei sagar banubuat, kawan iya bujang sagar kahaba paninungan, andri kawan ulun matueh hingka penah naun sagar kahaba upi. ¹⁸ Labis teka yiru, ma amau kawan walah-Ku upu andri kawan walah-Ku wawei hang andrau yiru, Aku sagar ngampinau Ruh-Ku, balalu here sagar banubuat. ¹⁹ Neleng, Aku sagar ngampi dinung kawan mukjizat hang langit, hang amau, andri kawan siri ajaib hang bumi, hang kapit, ira, andri apui, andri atuk. ²⁰ Mate andrau sagar na ubah jari maiyeng maituk andri wulan jari ira, sahuan andrau pihawian panante Tuhan. ²¹ Sagar ba kajadian, tiap ka ulun sa nerau ngaran Alatalla sagar na salamat." ²² "Rengei naun kawan ulun Israel, paner ku ina. Yesus, ulun Nazaret, sa na tutui daya Alatalla hingka penah naun mitah hene kawan ajaib, kawan mukjizat, andri kawan siri, sa haut na tantarang Alatalla hang penah naun mitah Hanye, ialah sa haut rasa naun. ²³ Yesus ina, sa nasarah sasuai aheng sa haut na tantu andri kabahumen Alatalla sa huan ni, nawunu naun mitah na pantak hang kayu balasanggar makai tangan kawan ulun durhaka. ²⁴ Kude, Alatalla nampi kaelanwelum palus napas Hanye teka kahanangen tumpuk adiu daya puang sagar Hanye na kuasai daya pampatei. ²⁵ Daya, hi Dawid suah bapaner ne'u Yesus, "Aku kadinung Tuhan naan hang hadapanku, daya Hanye naan hang tuhi kawanku balalu aku puang sagar na goyahkan. ²⁶ Daya yiru sabab ni, atei andri amirueku arai mihewu. Tengaku muneng hang wuang kaharapen. ²⁷ daya Hanyu puang sagar maladar amirueku muneng hang tumpuk adiau, atawa maladar tenga ulun-Nu sa Barasis ninung kabinasaan. ²⁸ Hanyu haut iwara ma aku lalan pamelum. Hanyu sagar ngulah aku penu ka'araien andri uruwawa-Nu." ²⁹ Pulaksanai katuluh, aku tau bapaner ma hanyu andri penu kayakinan, neu datu nini takam, hi Dawid, hanye haut matei palus na pasar, andri pasaran ni magun naan hampe taati. ³⁰ Jari, daya hanye na erang ka ulun Nabi nelang karasa Alatalla haut ba janyi andri sumpah ma hanye neu ngampi harung erang kaulun teka katurunan Dawid hang amau tahta ni. ³¹ Daya yiru, Hi Dawid sa haut suah ninung kapihu'anni, Hanye bapaner neu Kristus sa amuan teka pampatei: "Hanye puang sagar muneng hang tumpuk adiau, andri tenga ni puang sagar ninung kabinasaan." ³² Yesus ina sa na amuan Alatalla teka pampatei andri katuluh kami haut manyaksi hal yiru. ³³ Daya iru, udi na enat ma kadudukan ni sa amau daya tangan kawan Alatalla nelang narime janji Roh Barasis teka Amah, Hanye haut na ampinau, baik sa na dinung atawa sa na rengei. ³⁴ Daya yeru, hi Dawid puang mamai ma surga, kude hanye raerai ka eau, "Tuhan bapaner ma Tuanku, 'Harungleh hang tuhi kawan-Ku, ³⁵ hampe Aku ngulah kawan musuh-Nu jari pirarahan pe'e-Nu." ³⁶ "Daya yiru, elah katuluh ulun Israel karasa ta'tu'u Alatalla haut nyanyari Hanye Tuhan andri Kristus, ina Yesus sa haut napantak hang kayu balasangar daya naun." ³⁷ Hantek here karengei hal yiru, atei here tu'u mahanang, balalu here ba paner ma hi Petrus andri ma kawan rasul sa lain, "Pulaksana'i katuluh, inun sa patut na karaja daya kami? ³⁸ Balalu hi Petrus bapaner ma here, "Batobat nelang laku tenga naun na baptis hang wuang ngaran Kristus Yesus himpan ngampun katuluh dosa nu, nampe naun ta'u narima karunia Roh Barasis ³⁹ Daya, janji ina ma hanyu, andri ma kawan iya nu, andri ma katuluh ulun sa masih lawit, sa hene sa sagar na herau daya Alatalla." ⁴⁰ Andri hene papaneran sa lain, hi Petrus ba saksi palus iwara andri tu'u ma here, eau ni: "Ware nyalamat tenga daging naun teka ulun sa puang maeh atei!" ⁴¹ Kawan ulun sa narime lengan Petrus na baptis balalu hang andrau yiru jumlah here batamah kakira telu ribu ka ulun. ⁴² Here ta'tu;u hang wuang pangajaran kawan rasul andri hang wuang pipakatan, mambagi rute, nelang laku doa. ⁴³ Dami, katakuten hawi ma amau tiap amirue, nelang hene hal ajaib andri kawan siri sa bakajadian mitah kawan rasul. ⁴⁴ Katuluh ulun sa parisaya bakumpul sasameh nelang inun sa naan hang here ampun sasameh. ⁴⁵ Balalu, here ngari harata bana wat here, udi yiru mambagi ni ma katuluh ulun sasuai andri kaperluan here asing-asing. ⁴⁶ Tiap andrau, andri isa atei here bakumpul sasameh hang Lewu Alatalla nelang mambagi rute hingka lewu ma lewu. Here narime makuta andri arai atei, ⁴⁷ nelang nawat Alatalla, ulun rama katuju tu'u andri here. Nelang, tiap andrau Tuhan namah jumalah here, hanye yiru kawan ulun sa na salamat.