¹ Itati, Pulaksanai katuluh, aku ngampi itung ma hanyu neu Kabar Maeh teka Alatalla, sa haut nawaraku dahulu hie ma hanyu, sa haut natarimenu, sa ngulah hanyu parisaya. ² Dagana Kabar Maeh yiru pada hanyu na salamat, amun hanyu kukuh itegei hang lengan Alatalla sa haut na waraku pihanyu, kasuali hanyu parisaya anri puang uweng kataruen. ³ Aku haut nahampe pihanyu, sa mambatangni, kala sa haut natarimeku neu Kristus matei dagana kawan dosa takam kala sa nasurat hawuang Surat Barasis. ⁴ Hanye haut napasar, Hanye nasamelum kamulek hang anrau sa katelu kala sa nasurat hawuang Surat Barasis, ⁵ nelang pada Hanye haut nantarang tenga-Ni ma hi Kefas, udi hie ma sa karueh walas yiru. ⁶ Udi yiru, Hanye nantarang tenga-Ni ma labis hingka dime jatuh kaulun sinrah hinra. Karamaan teka here magun welum hampe itati, kude papire kaulun haut matei. ⁷ Balalu, Hanye pada nantarang tenga-Ni ma hi Yakobus, palus ma katuluh rasul. ⁸ Pijumpuhanni, sameh ialah ma gena sa nakayaan sahuan wayahni, Hanye pada nantarang tenga ma aku. ⁹ Daya, aku sa panga ranah nabaning kawan rasul-Ni nelang aku puang patut naantuh rasul dagana aku haut ngahanangen ungkup Alatalla. ¹⁰ Kude, dagana pikaeh Alatalla, aku jari kala wangunku itati. Nelang, pikaeh-Ni ma aku puang kawai. Aku bagawi labis sangkal nabaning here urasni, kude yiru puang aku, yiru daya pikaeh Alatalla sa nyinrah aku. ¹¹ Dagana yiru, inun teka aku atawa teka here, kalayiru wangunni kami ngajar nelang kalayiru pada hanyu haut Parisaya. Nasamelum Kamulek teka Pampatei ¹² Amun Kristus nabarita welum kamulek teka pampatei, wuah inun papire hingka naun kaeau ulun matei puang sagar nasamelum kemulek? ¹³ Amun mahi ulun nasamelum kamulek teka pampatei, Kristus pada puang suah nasamelum kamulek teka pampatei. ¹⁴ Nelang, amun Kristus puang nasamelum kamulek teka pampatei, mahi riranni kami iwara ala katantuluh nelang mamus budas kaparisayaen naun. ¹⁵ Labis teka yiru, kami tarung tuu ipusu neu Alatalla daya kami iwara amun Alatalla haut nyamelum kamulek Kristus teka pampatei, sa puang sagar nasamelum-Ni, amun samula tuu ulun matei puang nasamelum kamulek. ¹⁶ Daya anun ulun matei puang nasamelum kamulek, Kristus pada puang nasamelum kamulek teka pampatei. ¹⁷ Nelang, amun kristus puang nasamelum kamulek, mamus budas kaparisayaen naun, anri naun magun welum hawuang dosa. ¹⁸ Kalayiru pada, here sahaut matei hawuang Kristus pada puang uweng harapan. ¹⁹ Amun kaharapen takam hawuang Kristus ekat ma pamelum yiti ai, takam katuluh hanye yiru kawan ulun sa panga silaka teka katuluh murunsia. ²⁰ Kude itati, Kristus haut nasamelum kamulek teka penah ulun matei, jari sa palanungkai teka uras ulun parisaya sa haut matei. ²¹ Daya, sameh ialah pampatei itetei erang kaulun, balalu mitah isa kaulun pada welum kamulek hingka penah ulun matei natantalus. ²² Dagana hawuang hi Adam urasni matei, kalayiru pada hawuang Kristus urasni sagar na samelum. ²³ Kude, maisasaan ulun manyu giliranni: Kristus sa palanungkai, udi yiru here sa wat Kristus, hang pihawian-Ni kamulek, ²⁴ Balalu hampe ma pangalisanni, hanye yiru hantek Hanye nyarah Karajaan ma Alatalla Amah takam, hantek Hanye haut nyantalau uras pamarintahan, uras kakuasaen, anri kakuaten. ²⁵ Dagana, Hanye musti mamarentah hampe Alatalla ngampi harung uras musuh-Ni hang kapit pee-Ni. ²⁶ Musuh pangalisan sa sagar nasanrupuh hanye yiru pampatei. ²⁷ Daya, Alatalla haut ngampi harung katantuluh hang kapit pee-Ni. Kude, hantek na eyau amun katantuluh haut na ampi harung hang kapit-Ni, lentah tuu amun yiti puang amput Alatalla, sa ngampi harung katantuluh hang kapit Kristus. ²⁸ Tawuk katantuluh na ampi harung hang kapit Kristus, balalu anak sendiri pada sagar ngampi talau tengani pi Hanye, sa ngampi talau urasni hang kapit kristus palus Alatalla sagar jari katantuluh hawuang urasni. ²⁹ Amun puang kalayiru, kala awe sa sagar naulah daya here sa nabaptis ma ulun sa matei? Amun ulun matei puang sagar nasamelum kamulek, balalu daya inun hene ulun mambaptis ma here? ³⁰ Nelang, ma inun pada kami hakun hawuang bahaya tiap tawuk? ³¹ Pulaksanai katuluh, tiap anrau aku nadap pampatei, daya hante pi hewuku anri naun hawuang Yesus Kristus, Tuhan takam. ³² Amun nadinung teka pihak murunsia, inun untungni ma aku nawan kawan eha buas hang Efesus? Amun ulun matei puang nasamelum mulek,"Hayu takam kuman nguut daya anrau keatuni takam matei." ³³ Ada hampe tatipu: "Pargaulan sa puang maeh nyanrusak parangai sa maeh." ³⁴ Ware sadar itati nelang ada lagi ngulah dosa, Daya, papire kaulun huan kataru Alatalla. Aku kaeau kala yiti himpan naun amangan. Nasamelum mulek Tenga Rohani ³⁵ Kude, tau naan sa sagar nunti,"Kala awe wangun ulun matei nasamelum mulek? Anri tenga sakala awe here sagar hawi yati?" ³⁶ U ulun lunga! Inun sa na amulenu puang sagar welum, kasuali wini yiru matei dahulu. ³⁷ Nelang, inun sa naamulenu tau lain kakau amulean sa sagar welum yiru, tau diki sa puang bakudit iyalah diki ganum atawa diki-dikian sa lain. ³⁸ Kude, Alatalla ngami watang ma amulean iyalah sa naaheng-Ni anri asing-asing diki na ami kakauni ngaraerai. ³⁹ Puang uras tenga yiru sameh, kude ekat isa tenga murunsia, salainni tenga kawan eha, sa lain lagi tenga kawan wurung, laini lagi tenga kenah. ⁴⁰ Naan pada tenga surgawi anri tenga duniawi, kude kaeh sa surgawi yiru puang sameh nelang kaeh sa duniawi yiru pada puang sameh. ⁴¹ Kaeh mate anrau puang sameh anri kaeh wulan, kaeh wawahiang pada puang sameh daya isa wawahiang puang sameh anri wawahiang sa lain hawuang kaehni. ⁴² Kalayiru pada anri ulun nasamelum mulek teka pampatei. Nahamur hawuang kabinasaan, nasamelum mulek hawuang wangun sa puang binasa. ⁴³ Nahamur hawuang pikurun, nasamelum mulek hawuang pikaeh. Nahamur hawuang pileme, nasamelum mulek hawuang kakuaten. ⁴⁴ Nahamur anri wangun tenga jasmani, nasamelum mulek anri wangun tenga rohani. amun naan tenga jasmani, naan pada tenga rohani. ⁴⁵ Ialah sa haut nasurat, "Murunsia sa palanungkai, hi Adam, jari mahluk sa welum." Hi Adam sa hanrian jari roh sa ngami pamelum. ⁴⁶ Kude biar kalairu, sa rohani lain sa badahulu, Sa badahulu hanye yiru sa jasmani, udi hiye wau sa rohani. ⁴⁷ Murunsia sa palanungkai asalni teka dunia, hanye yiru nasanyari teka dabu tane. Murunsia sa karueh asalni teka surga. ⁴⁸ Sameh ialah sa asalni teka dabu tane, kalayiru pada here sa asalni teka dabu tane. Anri, sameh ialah sa surgawi, kalayiru pada here sa surgawi. ⁴⁹ Ialah pada takam nasanyari hawuang wangun murunsia sa asalni teka dabu tane, takam pada sagar makai wangun murunsia sa surgawi. ⁵⁰ Aku kaeau ina ma naun, pulaksanai katuluh, hanyeyiru daging anri ira puang kaiuh masuk ma karajaan Alatalla. Kalayiru pada sa tau binasa, puang kaiuh nganti sa puang tau binasa. ⁵¹ Rengeilah! Aku iwara ma naun isa rahasia, takam puang sagar matei katuluhni, kude takam katuluh sagar naubah, ⁵² sakatika yiru, hawuang kapangitup mate ai, tawuk tarompet pangalisan: daya tarompet sagar maeau, nelang ulun matei sagar nasamelum mulek puang mitah kabinasaan, anri takam sagar naubah. ⁵³ dagana, sa tau binasa yiti musti makai sa puang tau binasa. Anri, sa tau matei yiti, musti makai sa puang tau matei. ⁵⁴ Hantek sa tau binasa yiti makai sa puang tau binasa, anri sa tau matei yiti makai sapuang tau matei, hang tawuk yiru wau jari inun sa haut nasurat: "Pampatei haut natelen kamanangen." Yesaya 25:8 ⁵⁵ "U pampatei, hang awe kamanangennu? U pampatei hang awe hengetmu?" Hosea 12:14 ⁵⁶ Henget pampatei hanyeyiru dosa, nelang kawasa dosa hanyeyiru Hukum Taurat. ⁵⁷ Kude, takam basyukur ma Alatalla sa ngami takam kamanangen mitah Tuhan takam, Yesus Kristus. ⁵⁸ Jari, kawan Pulaksanaiku hawuang isa kaparisayaen sa nasinta, ware naun mansing, ada hampe bimang, tatap sumangat hawuang pagawian Tuhan. daya, naun karasa ala katantuluh yiru puang sagar kawai hawuang Tuhan.