¹ Kakalileh sinta nelang kakalileh tatuu kawan karunia rohani, sa mambatangni himpan hanyu kaiuh banubuat. ² Daya, Hiye sa bapaner hawuang basa lela, puang bapaner ma murunsia, kude bapaner ma Alatalla; daya mahi erang kaulun jua sa kataru, kude hanye kaeau bamasam hal sa tasanina hawuang roh. ³ Balalu, ulun sa banubuat bapaner ma murunsia himpan ngampi maju, mantaru, anri ngarariu. ⁴ Kawan ulun sa bapaner hawuang basa lela ngampi kansang dirini, kude ulun sa banubuat ngampi maju ungkup. ⁵ Leha kaehni amun naun katuluh bapaner hawuang kawan basa lela, sa mambatangni himpan naun banubuat. Ulun sa banubuat labis hante teka ulun sa bapaner hawuang basa lela, kasuali amun hanye tau manarangni himpan bariran ma ungkup. ⁶ Pulaksanai katuluh, amun aku hawi nunung naun anri bapaner hawuang bamasam basa roh, inun riranni ma naun, kasuali amun aku bapaner ma naun anri lentah, bamasam pangarasaen, nubuatan, atawa ngajar? ⁷ Likan, kawan bana sa ba amirue, ialah suling atawa kasapi sa naan lenganni, amun puang babeda lenganni, kala awe ulun tau mantaru alat inun sa ganyah na main, inun silung atawa kasapi? ⁸ Suntu lain, amun lengan tarompet babaran, hie sa sagar basiap tenga neu baparang? ⁹ Kalayiru pada hanyu. Amun makai lelanu, hanyu ngantuh lengan sa puang na kataru, kala awe ulun karasa inun sa naeau? ialahni hanyu rahat bapaner anri riwut. ¹⁰ Hang dunia yena, naan hene masam basa nelang puang sunah isa basa sa mahi bararti. ¹¹ kude, amun aku puang kataru arati basa yiru, aku sagar jari ulun asing ma hanye sa bapaner, nelang ulun sa bapaner yiru jari ulun asing ma aku. ¹² Kalayiru pada hanyu, dagana hanyu tatuu bausaha ma kawan karunia roh, jari bausahaleh tatuu himpan ngampi kuat ungkup. ¹³ Dagana yiru, ulun sa bapaner hawuang basa lela laku dua himpan hanye kaiuh manarangni. ¹⁴ Daya, amun aku laku dua hawuang basa lela, rohku laku dua, kude pikiranku puang bagawi. ¹⁵ Jari, aku musti kala awe? Aku sagar laku dua makai rohku nelang aku pada sagar laku dua makai pikiranku. Aku sagar manyanyi makai rohku anri aku pada sagar manyanyi makai pikiranku. ¹⁶ Amun hanyu ekat ngantuh tarimekasis ma Alatalla makai rohnu, kala awe anri ulun lain, sa hawuang kaadaan mahi karunia yiru, tau kaeau "Amin," neu tarimekasis ma Alatalla hingka hanyu yiru dagana hanye puang kataru inun sa na eaunu? ¹⁷ Biar hanyu laku dua tarimekasis ma Alatalla anri maeh, kude ulun lain puang kataru. ¹⁸ Aku batarimekasis ma Alatalla daya aku kaiuh bapaner hawuang wahai masam basa lela labis teka naun katuluh. ¹⁹ Kude, hawuang ungkup, ware aku bapaner dime lengan makai pikiranku himpan aku pada tau ngajar ulun lain, hingka aku makai sapuluh ribu lengan hawuang basa lela. ²⁰ Pulaksanai katuluh, ada budas bapikir kala kawan iya. Jarileh kawan gena hawuang kajahaten,kude dawasa hawuang pamikirannu! ²¹ Ialah na surat hawuang Hukum Taurat, "Daya kawan ulun sa naan katauwen basa asing nelang mitah wawa kawan ulun asing, Aku sagar bapaner ma bangsa yina, kude here puang sagar nyanrengei Aku, lengan Tuhan." Yesaya 28:11-12 ²² Jari, kawan basa lela ialah siri, lain ma ulun sa parisaya, kude ma ulun sa puang parisaya, amun banubuat hanyeyiru siri, lain ma ulun sa puang parisaya, kude ma ulun sa parisaya. ²³ Amun uras ungkup bakumpul hawuang isa unengan, anri urasni bapaner makai basa lela, balalu naan kawan ulun sa puang kataru atawa kawan ulun sapuang parisaya uma, inun here puang sagar ngeau amun hanyu haut rapui? ²⁴ Kude, amun urasni banubuat, balalu naan ulun sa puang parisaya atawa ulun sa puang kataru uma, hanye sagar kataru urasni anri na haragai daya katuluhni. ²⁵ Satasanina hawuang ateini sagar natantararang, hanye sagar ngampi ranah tengani, balalu manyamah Alatalla, hanye harap tatuu amun Alatalla himat naan hang penah hanyu. Paraturan Hawuang Kumpulan Ungkup. ²⁶ Jari, inun aratini yiru, Pulaksanai katuh? Hantek hanyu bakumpul, asing-asingni naan mazmur, naan sa ngajar, naan sa mambarita, naan sa babasa lela atawa manarang neu kabar teka Alatalla. Elah katuluh yiru na ulah pakai pikaeh. ²⁷ Amun naan sa babasa lela, elahleh sunah rueh atawa paling hene telu kaulun, nelang asing-asingni bagaganti, anri musti naan sa manarangni. ²⁸ Kude, amun mahi sa manarangni, puang usah hanye makai yiru hang penah ungkup, elahleh hanye bapaner ma tengani raerai anri ma Alatalla. ²⁹ Sukup rueh atawa telu nabi sa bapaner anri sa lainni manimang inun sa natahampe yiru. ³⁰ Kude, amun kabar teka Alatalla hawi pada ma ulun lain sa maharung hang yiru, ulun sa dahulu bapaner yiru musti tariye bapaner. ³¹ Daya, hanyu katuluh kaiuh banubuat isa mangisa, himpan urasni tau piajar anri urasni batamah parisaya. ³² Karunia Roh kawan nabi tunuk ma kawan nabi. ³³ Dagana, Alatalla puang hawi hingka pirawekan, kude hingka katartiben, sameh ialah hawuang katuluh ungkup kawan ulun barasis. ³⁴ Wawei musti suni hawuang kumpulan ungkup dagana here puang nahuyu uma bapaner, kude musti nuu manyu kala sa naeau hawuang Hukum Taurat. ³⁵ Amun naan ala inun sa hamen na karasa here, elah here nunti teka matueh upuni hang lewu dagana tuu ngamangan amun wawei uma bapaner hawuang ungkup. ³⁶ Inun lengan Alatalla hawini teka hanyu? Atawa, inun ekat ma hanyu ai lengan yiru natahampe? ³⁷ Amun naan sa bapikir dirini erang kaulun nabi atawa ulun sa rohani, elah hanye mantaru amun kawan hal sa nasuratku pihanyu hanyeyiru parentah teka Tuhan. ³⁸ Amun naan ulun sa puang narime yiti, hanye ada nakatawani. ³⁹ Jari, Pulaksanaiku katuluh, kakalileh bahimat himpan tau banubuat, anri ada nguring ulun bapaner hawuang basa lela. ⁴⁰ Kude, urasni musti nakaraja anri maeh nelang taratur.