¹ Itati, neu kawan karuni rohani, pulaksanaiku, aku hamen hanyu karasa sa sabujurni. ² Itung hang tawuk hanyu huan kataru Alatalla, hanyu tapangaruh uma manyamah barhala sa muna. ³ Dagana yiru, aku iwara ma hanyu amun mahi sunah isa, sa ngantuh daya Roh Alatalla, sa kaeau,"takutuk Yesus," anri mahi sunah isa sa tau kaeau,"Yesus hanyeyiru Tuhan," kasuali daya Roh Kudus. ⁴ Naan hene masam karunia rohani, kude Rohni sameh. ⁵ Nelang, hene masam palayanan, kude Tuhan-ni sameh. ⁶ Naan hene masam pagawian, kude Alatalla sa sameh sa nampalus inun eleh ma uras ulun. ⁷ ma tiap ulun na karuniakan pilentah Roh himpan jari pikaeh ma takam katuluh. ⁸ ma sa isa na ami piharatien mitah Roh, anri ma sa lain lengan kapintaren daya Roh sa sameh. ⁹ Ma sa lain na ami kaparisayaen ma Tuhan daya Roh sa sameh, ma sa lain kawasa nyamare daya Roh. ¹⁰ Ma sa lain na ami pagawian ngulah kaajaiban, ma sa lain nantarang pagawian Alatalla. Ma sa lain na ami katauen mambeda kawan roh, ma sa lain katauen babahasa Roh, anri sa lain maarti bahasa Roh yiru. ¹¹ Urasni yiti na karaja daya Roh sa isa nelang sa sameh, sa mambagi ma asing-asing ulun, ialah sa na kabahumaen-Ni. Tatiap Ulun Parisaya hanyeyiru bagian teka Tenga Kristus ¹² Sameh ialah tenga hanyeyiru isa, kude naan hene angota, nelang uras angota tenga, biar hene, hanyeyiru isa tenga, kalayiru pada Kristus. ¹³ Sabab, daya isa Roh, takam uras haut na babtis ma wuang isa tenga, hau hanye ulun Yahudi atawa ulung Yunani, hau hanye budak atawa ulun bebas, nelang takam uras na ampi uut hingka isa Roh ¹⁴ Dagana tenga puang ekat hingka isa angota, kude hene angota. ¹⁵ Amun pee kaeau,"daya aku lain tenga, jari aku puang bagian teka tenga," puang baarti hanye lain bagian tenga. ¹⁶ anri, amun silu kaeau."daya aku lain mate, aku puang angota tenga," puang baarti hanye lain bagian tenga. ¹⁷ Amun uras tenga yiru mate, hang awe pangrengeian? amun urasni silu, hang awe pangenguhan? ¹⁸ Kude, itati Alatalla haut ngampunengan kawan angota yiru, tatiap ulun hingka here, hawuang tenga, iyalah sa nakabahumen-Ni. ¹⁹ Amun urasni yiru angota, hang awe pintanganni sa tenga? ²⁰ jari, samula naan hene angota, kude ekat isa tenga. ²² Sabujurni, kawan angota tenga sa nadinung labis maleme yiru sa panga naparlu. ²³ Nelang, kawan angota tenga sa pikir takam puang kajut nahurmat, yiru sa labis patut nahurmat. Anri, kawan angota tenga, sa nadinung takam puang kajut maeh putunganni, musti na ulah himpan labis patut natantarang. ²⁴ Dagana kawan sa haut maeh puang parlu natantarang. Kude, Alatalla haut ngatur tenga yiru anri ngami hurmat sa labis hante ma kawan angota sa kakurangen, ²⁵ himpan puang tabagi-bagi hawuang tenga, labis tekayiru kawan angota yiru tau mamparhati sa isa anri salainni. ²⁶ Amun isa angota mahanang, uras angota salain kaingkam mahanang. Amun isa angota natawat, uras angota kaingkam mihewu. ²⁷ Itati hanyu hanyeyiru tenga Kristus anri hanyu asing-asingni pada jari kawan angotani. ²⁸ Alatalla haut nukas unengan hawuang jamaat, sa palanungkai hanyeyiru kawan rasul, karueh kawan nabi, katelu hanyeyiru kawan guru, udiyiru kawan ka ajaiben, ulun sa naami kawan karunia nyamare panyakit, pangarawahen, ulun sa tau mamimpin, anri sa tau bamasam basa. ²⁹ Inun urasni yiru rasul? Inun urasni yiru nabi? Inun urasni yiru guru? Inun urasni yiru ulun sa tau ngulah ka ajaiben? ³⁰ Inun urasni naan karunia nyamare panyakit? Inun urasni bapaner makai bamasam basa? Inun urasni kataru? ³¹ daya yiru, kakalileh tatuu kawan karunia sa panga hante. Anri, aku sagar nutui ma hanyu lalan sa panga maeh.