¹ Jarileh kawan ulun sa isuntu aku, ialah aku pada isuntu Kristus. Siri Kakuasaen ² Itati, aku nawat hanyu dagana hanyu ngampi itung aku hawuang uras hal nelang itegei adat-istiadat ialah sa na tahampeku ma hanyu. ³ kude, aku hamen hanyu kataru amun pamimpin kawan upu hanyeyiru Kristus, pamimpin kawan wawei hanyeyiru upu, anri pamimpin Kristus hanyeyiru Alatalla. ⁴ Amun erang kaulun upu sa laku dua nelang nahampe kabar neu Alatalla makai karudung bararti puang maharaga uluni. ⁵ Kude, erang kaulun wawei sa laku dua atawa nahampe kabar neu Alatalla puang makai karudung, hanye mahina uluni, hal yiru sameh ialah amun uluni na kukur. ⁶ Daya, amun erang kaulun wawei puang mangarudung uluni, elahleh hanye pada netek uras wuluni. kude, amun ngampi amangan ma erang kaulun wawei netek wuluni atawa ngukur uluni, elahleh hanye mangarudung uluni. ⁷ Upu puang iuh mangarudung uluni daya hanye gamaran nelang kamuliaen Alatalla. nelang, wawei hanyeyiru kamuliaen upu. ⁸ Ulun upu puang na sanyari teka wawei, kude wawei na sanyari teka upu. ⁹ Nelang, ulun upu puang nasanyari ma wawei, kude wawei ma ulun upu. ¹⁰ Iru sababni, wawei musti naan siri kakuasaen hang uluni dagana kawan malaikat. ¹¹ Biar kalayiru, hawuang Tuhan, mahi wawei sa lapas teka upu, atawa upu lapas teka wawei. ¹² Daya, wawei na sanyari teka upu, kalayiru pada ulun upu nakayaan mitah wawei. Nelang, urasni yiru asalni hingka Alatalla. ¹³ Pikirleh raerai, inun patut ma ereng kaulun wawei sa laku dua ma Alatalla anri ulu sa puang bakarudung? ¹⁴ Inun puang alam sendiri ngajar ma hanyu amun ulun upu ba wulu amau, hal yiru jari pikurun ma here? ¹⁵ Kude, amun ulun wawei ba wulu amau, hal yiru jari kamuliaen ma hanye: Dagana, wuluni yiru na ami ma hanye jari karudung. ¹⁶ Amun masih naan ulun sa ngampi soal,kami mahi kabiasaen yiru, kalayiru pada hawuang ungkup Tuhan. Uras Hal sa Hala hawuang Parjamuan Kudus. ¹⁷ Hawuang ngami parintah yiti, aku puang nawat hanyu daya hanyu bakumpul puang ma hal sa labis maeh, kude ma hal sa labis puang maeh. ¹⁸ Ka isa, hantek hanyu bakumpul hawuang ungkup, aku karengei amun naan pirawekan hang penah naun. anri, aku puang parisaya urasni. daya, musti naan pirawekan hang penah naun himpan here sa tabukti magun batahan, jari lentah hang penah naun ²⁰ Hantek hanyu bakumpul hang isa unengan sa sameh, hal yiru puang ma kutaen parjamuan Tuhan. ²¹ Dagana hantek kuman, uras ulun barabut ngalap ma tengani raerai hampe naan sa puang kabagian anri sa lainni mahamui. ²² Inun hanyu mahi lewu pakai kuman nelang nguut? Atawa, inun hanyu nangkurun ungkup Alatalla anri ngampi amangan here sa paua? Inun sa musti na ulahku ma naun? Musti sah aku nawat hanyu? Iru puang sagar! ²³ Daya, aku narime teka Tuhan inun sa pada na sarahku ma hanyu, amun Tuhan Yesus, hang malem hantek Hanye na khianat, ngalap ruti, ²⁴ nelang udi ngantuh syukur, Hanye miah palus kaeau, "Iti tenga-Ku, sa nasarah ma hanyu; tampalusleh pakai ngitung Aku." ²⁵ Kalayiru pada, Hanye ngalap sangkir angur udi nguta ruti balalu kaeau,"Angur yiti hanyeyiru janyi wau sa hawuang ira-Ku. Tampalusleh yiti, hang tiap hanyu nguutni, pakai ngitung Aku." Daya, hang tiap hanyu nguta ruti yiti anri nguut angur yiti, hanyu mambarita neu pampatei Tuhan hampe Hanye hawi. ²⁷ Dagana yiru, hiye sa nguta ruti atawa nguut angur Tuhan anri sara sa puang patut, hanye badusa ma tenga anri ira Tuhan. ²⁸ murunsia musti mariksa dirini raerai, wau hanye iyuh nguta ruti anri nguut teka sangkir angur yiru. ²⁹ Daya, ulun sa nguta anri nguut puang mangakui tenga Tuhan, hanye sagar kaiuh hukuman ma dirinini. ³⁰ Iru sababni, daya inun hene hang penah hanyu sa maleme nelang sakit, likan hene pada sa matei. ³¹ Kude, amun takam mariksa diri takam raerai anri maeh, takam puang sagar na hukum. ³² Amun, hantek takam na hukum, takam na ajar daya Tuhan himpan takam puang na hukum sinrah anri dunia. ³³ Jari, kawan pulaksanaiku, hantek naun bakumpul kuman, ware ipanganrei. ³⁴ Amun naan ulun sa kalauan, ware hanye kuman dahulu hang lewuni himpan ada naun bakumpul jari pihalaan. Balalu, kawan hal lain aku sagar manarang hantek aku hawi.