Tuhan atas Hari Sabat ¹ Suata katika, pas hari sabat, Yesus bajalan malalui pahumaan gandum. Pas rahat itu, murid-murid Sidin mamutiki babarapa biji gandum, manggusuknya lawan tangan, balalu mamakannya. ² Beberapa urang Farisi batakun, "Kanapa ikam baulah nang kada buleh diulah pas hari sabat?" ³ Yesus manjawab buhannya wan baucap, 'Kadakah ikam suah mambaca apa nang diulah Daud rahat inya wan urang-urang nang baimbainya marasa lapar, ⁴ manganai kayaapa inya masuk kadalam Rumah Allah, maambil rpti parsambahan, mamakan roti itu, balalu mambariakan jua gasan urang-urang nang baimbai inya, nang kada buleh mamakannya, kacuali buhan imam haja?" ⁵ Balalu, Yesus baucap wan urang-urang Farisi itu, "Anak Manusia adalah Tuhan atas hari Sabat." Yesu Manyambuhakan pas Hari Sabat ⁶ Intang hari sabat imbahnya, Yesus tulak ka sinagoge gasan mangajar. Di wadah itu ada saikung urang nang tangan kanannya lumpuh. ⁷ Ahli-ahli Taurat wan urang-urang Farisi maitihi Yesus gasan malihat apakah Sidin cagar manyambuhakan pada hari sabat, supaya buhannya baisi alasan gasan manuduh Sidin. ⁸ Akan tatapi, Yesus tahu apa nang buhannya pikirakan. Sidin baucap wan urang nang tangannya lumpuh itu, "Bangun wan badirian di tangah." Balalu, urang itu bangkit wan badiri di sana. ⁹ Yesus baucap wan buhannya, "Aku batakun wan buhan ikam, mana garang nang dibulehakan gasan digawiakan di hari sabat: babuat baik atawa babuat jahat?" ¹⁰ Imbah mamandang sakuliling, ka buhannya sabarataan, Yesus baucap wan urang nang tangannya lumpuh itu, "Ulurakan tanagan ikam." Imbah itu, urang itu maulurakan tangannya wan tangannya manjadi waras. ¹¹ Akan tatapi, urang-urang Farisi wan ahli-ahli Taurat manjadi sarik banar balalu barunding manganai apa nang cagar buhannya ulah gasan Yesus. Pamilihan Kadua Balas Rasul ¹² Pas hari itu jua, Yesus naik ka bukit gasan badoa, wan di sana Sidin badoa kapada Allah samalam-malaman. ¹³ Kaisukan paginya, Sidin mangiau murid-murid-Sidin wan mamilih dua balas dari antara buhannya, yaitu urang-urang nang dikiau-Sidin rasul: ¹⁴ Simon nang jua dingarani "Petrus", Andreas dinsanak Petrus, Yakobus, Yohanes, Filipus, Bartolomeus, ¹⁵ Matius, Tomas, Yakobus anak Alfeus, Simon nang dikiau urang Zelot, ¹⁶ Yudas anak Yakobus, wan Yudas Iskariot nang panghianat. Pangajaran Yesus ¹⁷ Imbah Yesus wan buhan rasul turun, Sidin badiri intang wadah nang rata. Balalu, datanglah wan-Sidin sarumbungan banyak buhan murid-Sidin wan urang banyak datang matan saluruh wilayah Yudea, Yerusalem, wan dari daerah pantai kota Tirus wan Sidon. ¹⁸ Buhannya samua datang gasan mandangarakan Yesus wan gasan diwarasakan matan sagala panyakit buhannya. Wan, urang-urang nang dirasuki ruh-ruh jahat diwarasakan jua. ¹⁹ Sabarataan urang bausaha gasan manjapai Yesus lantaran ada kuasa nang kaluar matan Sidin wan manyambuhakan buhan sabarataan. ²⁰ Yesus mamandang wan murid-murid Sidin balalu baucap, "Dibarakah ikam nang miskin sabab ampun ikamlah Karajaan Allah. ²¹ Dibarakah ikam nang wayahini lapar sabab ikam cagar dikanyangakan. Dibarakah ikam nang wayahini manangis sabab ikam cagar tatawa. ²² Dibarakahlah ikam pabila urang mamuari ikam, mangucilakan ikam, mahina ikam, wan mancamarakan ngaran ikam lantaran Anak Manusia. ²³ Basukacitalah pas rahat ikam diulah kaya itu, wan malumpatlah kahimungan lantaran upah ikam ganal di surga; sabab nangkaya itu jua padatuan buhannya maulah buhan nabi. ²⁴ Akan tatapi, cilakalah hai ikam nang sugih sabab ikam udah marasaakan hidup nang nyaman. ²⁵ Cilakalah ikam nang wayah ini kanyang sabab ikam cagar kalaparan. Calakalah ikam nang wayah ini tatawa sabab ikam cagar marista wan manangis. ²⁶ Cilakalah ikam pabila sabarataan urang manyambat hal-hal nang baik haja manganai diri ikam sabab nangkaya itu jua padatuab buhannya rahat mamanerakan manganai nabi-nabi palsu." Kasihilah Musuh Ikam ²⁷ Akan tatapi, Aku bapadah wan ikam nang mandangarakan Aku, Sayangi musuh ikam wan babuat baik wan urang nang mamuari ikam. ²⁸ Barkahi urang nang mangutuk ikam wan badoalah gasan buhannya nang manganiaya ikam. ²⁹ Gasan urang nang manampiling pipiikam, bari'i jua pipi ikam nang sabalahnya. Wan, gasan siapa haja nang marampas jubah ikam, jangan manangatinya pabila inya marampas baju ikam jua. ³⁰ Bariakan wan satiap urang nang maminta wan ikam, wan, pabila ada urang nang maambil ampun ikam, jangan mamintanya mambuliki. ³¹ Parlakuakan urang lain nangkaya ikam kahandaki diparlakuakan oleh buhannya. ³² Pabila ikam hinggan manyanyangi urang nang manyangi ikam, apa garang pujian nang pantas dibariakan gasan ikam? Sabab, urang badosa gin manyangi urang-urang nang manyangi inya. ³³ Pabila ikam hinggan babuat baik wan urang nang babuat baik wan ikam, pantaskah ikam mandapat pujian? Sabab, urang badosa gin maulah hal nang sama. ³⁴ Pabila ikam mainjamakan barang wan urang lain balalu maharapakan imbalan, apa garang pujian nang pantas dibariakan gasan ikam? Sabab,urang badosa gin maminjamakan gasan urng badosa lainnya supaya buhannya kawa manarima pulang wan jumlah nang sama. ³⁵ Akan tatapi, Sayangilah musuh ikam wan babuatlah nang baik, pinjamakan wan urang kada usah maharapakan imbalan, lantaran itu, ikam cagar kulehan upah nang ganal wan ikam cagar manjadi anak-anak Nang Mahatinggi, sabab Allah itu baik gasan urang-urang nang kada tahu batarimakasih wan nang jahat. ³⁶ Lantaran itu, hendakah ikam baisi rasa sayang, nangkaya Allah nang banyak manyangi." Jangan Mahakimi Urang Lain ³⁷ "Jangan mahakimi supaya ikam kada dihakimi. Jangan mahukum supaya ikam kada dihukum. Ampuni urang maka ikam cagar diampuni. ³⁸ Bariakan wan pacangan dibariakan gasan ikam: suatu takaran nang baik, nang dipadatakan, nang diguncangakan wan limpuar, balalu pacangan dituangakan ka pangkuan ikam. Lantaran wan ukuran nang sama nang ikam pakai gasan maukur, hal itu pacangan diukurakan pulang wanikam." ³⁹ Yesus mangesahakan gasan buhannya paribasa ini, "Kawakah urang buta manuntun urang buta? Kadakah buhannya badua pacangan gugur ka dalam luang? ⁴⁰ Saurang murid kada malabihi daripada gurunya. Akan tatapi, satiap urang nang sudah talatih pacangan manjadi nangkaya gurunya jua. ⁴¹ Kanapa ikam malihat sarbuk kayu intang mata dinsanakikam, tatapi ikam kada malihat baluk kayu intang mata ikam sorang? ⁴² Nangkaya apa ikam kawa bapadah wan dinsanak ikam, "Dinsanak, biar aku kaluarakan sarabuk kayu itu intang matakam', sadangkan ikam sorang kada malihat baluk kayu intang mataikam? Hai urang munafik! Kaluarakan badahulu baluk kayu itu matan mataikam sorang. Imbah itu, ikam kawa malihat wan jalas gasan manguluarakan sarbuk kayu dari mata dinsanak ikam," Pohon nang Baik Manghasilakan Buah nang Baik ⁴³ Pohon nang baik kada pacangan mahasilakan buah nang buruk, wan pohon nang buruk kada pacangan mahasilakan buah nang baik. ⁴⁴ Satiap pohon dipinandui matan janis buah nang dihasilakan. Urang kada mangumpulakan buah ara matan rumput baduri, atawa mamutik anggur matan padang sabat. ⁴⁵ Urang nang baik mangaluarakan hal-hal nang baik matan hatinya nang baik wan urang nang jahat mangaluarakan hal-hal nang jahat matan hatinya nang jahat . Apa nang kaluar matan mulut urang itu baasal matan apa nang hibak dihatinya." Dua Macam Fondasi ⁴⁶ Kanapa ikam mangiau Aku, 'Tuhan, Tuhan,' tatapi kada manggawi apa nang Aku ajarakan? ⁴⁷ Aku pacangan manampaiakan wan ikam, nangkaya apa garang urang nang datang wan-Aku, mandangarakan ajaran-Ku wan manggawinya. ⁴⁸ Inya nangkaya ura g nang mambangun rumah, nang manggali dalam-dalam, balalu maandakakan fondasi di atas batu. Rahat banjir datang, banyu mahantam itu, tatapi kada kawa manggoyahakannya lantaran rumah itu dibangun wan sangat kada bijaksana ⁴⁹ Tatapi, urang nang mandangar ajaran-Ku tatapi kada mamatuhinya, inya sama nangkaya urang nang mambangun rumah diatas tanah nang kada bapundasi. Wayah takana banjir, rumah ngintu rubuh wan liwar karusakanya.'