Parumpamaan Dumba nang hilang ¹ buhan pangumpul pajak wan urang badusa baparak lawan Yesus gasan mandangarakan-Nya. ² Balalu urang-urang Farisi wan ahli-ahli Taurat mulai manggarunum, "Urang ini manarima urang-urang badusa wan makan baimbai lawan buhannya." ³ Yesus maucapakan parumpamaan ini lawan buhannya, ujar Sidin, ⁴ "Siapa garang diantara ikam nang apa bila baiisi 100 ikung dumba, wan kahilangan saikung, kada pacangan maninggalakan nang 99 ikung lainya di padang sabat? kadakah inya pacangan tulak mancarii nang tasasat itu sampai inya manamuakannya? ⁵ wan, wayah inya manamuakannya, inya pacangan maambin dumba itu di atas bahunya wan basukacita banar. ⁶ Sasampainya di rumah, inya pacangan tulak manamui kakawanannya wan tatangga-tatangganya sambil baucap lawan bubuhannya, ""Bahimunglah baimbai lawan aku sabab aku hudah manamuakan dumbaku nang hilang; ⁷ aku baucap lawan ikam, nangkaya itu jua pacangan ada sukacita nang labih ganal di surga atas asa urang bardusa nang bartubat matan pada 99 urang banar nang kada mamarluakan partubatan. Parumpamaan Duit Perak nang Hilang ⁸ Atawa babinian manakah nang baisi sapuluh kaping duit pirak, pabila inya kahilangan asa kaping di antaranya, kada manyalakan palita wan manyapu rumahnya, balalu bagagamatan mancarii kaping duit itu sampai inya manamuakannya? ⁹ Wan, apabila inya manamuakannya , inya mangiau kakawanannya wan tatangga-tatangganya wan baucap lawan bubuhanya, "Bahimunglah baimba lawan aku sabab aku hudah manamuakan sakaping nang ilang itu; ¹⁰ Aku baucap lawan ikam, nang kaya itu jua ada sukscita di antara buhan malikat Allah sabab asa urang bardosa nang bartubat." Parumpamaan Dua Kakanakan lalakian Anak nang Bungsu Maninggalakan Abahnya ¹¹ Balalu Yesus baucap, "Ada saikung urang nang baisi dua kakanakan lalakian. ¹² Anak nang bungsu bapadah lawan abahnya, "Bah, bariakan lawan ulun bagian harta nang manjadi ampun ulun," Balalu abahnya pun mambagi harta kakayaannya lawan kadua anaknya. ¹³ Imbah tu kada lawas, anak bungsu itu mangumpulakan sabarataan ampun inya, balalu tulak ka nagari nang jauh wan disana inya manghambur-hamburakan hartanya itu wan hidup bafoya-foya. ¹⁴ Wayah inya sudah manghabisakan sabarataan hartanya itu, tajadilah bancana kalaparan nang hibat di nagari itu, wan inya pun mulai bakakurangan. ¹⁵ Jadi, tulaklah inya wan bagawi lawan saikung urang panduduk nagari itu, nang manyuruh inya ka huma gasan mambarii makan babi-babinya. ¹⁶ Inya handak banar maisii parutnya lawan buah karob nang dimakan babi-babi itu, tatapi kadada saikung urangpun nang mambarii lawan inya. Anak Bungsu Bulik lawan Abahnya ¹⁷ Wayah anak bungsu itu sadar, inya baucap, "Liwar banyaknya pekerja-pekerja abahku nang baisi makanan nang balimpah-limpah, tatapi aku disini parak mati kalaparan, ¹⁸ Aku pacangan bangun wan bulik lawan abahku. Aku pacangan bapadah lawan sidin; Abah, ulun hudah bardusa lawan surga wan dihadapan pian. ¹⁹ Ulun kada lagi pantas disambat anak pian, jadiakanlah ulun salah saikung pagawai pian." ²⁰ Maka, bardirilah inya wan tulak lawan abahnya. Akan tatapi, wayah anak itu masih jauh banar, abahnya malihat inya lawan panuh balas kasihan, abahnya itu bukah balalu maragapnya wan manciuminya. ²¹ Anak itu baucap lawan abahnya, 'Abah, ulun hudah bardosa lawan surga jua dihadapan pian. Ulun kada pantas lagi di sambat anak pian." ²² Namun, abahnya itu bapadah lawan palayan-palayannya, "Lakasi! Bawai jubah nang tarbaik lalu pakaiakan lawan inya. Pakaiakan jua cincin di jari tangannya wan sandal dibatisnya. ²³ Bawa jua kamari anakan sapi nang lamak wan sumbalihlah. Ayuk kita makanan wan bargambira, ²⁴ sabab anakku ini hudah mati, tatapi wayahini hidup pulang!" Inya huda hilang, tatapi wayahini hudah ditamuakan!" Maka buhannya pun mulai bargambira." Anak Sulung Marah lawan Abahnya ²⁵ Wayah itu, si anak sulung rahatan di ladang, wayah inya hudah bulik wan hudah parak rumahnya, inya mandangar suara musik wan tari-tarian. ²⁶ Jadi, inya mangiau salah saikung matan hamba-hambanya itu wan batakun apa garang nang rahatan tarjadi. ²⁷ Palayan itu mamjawab inya, "Ading pian hudah bulik, wan abah pian manyumbalih anak sapi nang lamak, sabab inya bulik wan salamat." ²⁸ Namun, anak sulung itu sarik wan kada mau masuk sahingga abahnya kaluar wan mambujukinya. ²⁹ Akan tatapi, inya bapadah lawan abahnya, "Batahun-tahun ulun bagawi malayani pian wan kada suah ma abaiakan parintah pian, tatapi pian bahkan kada suah mambarii ulun saikung kambing anum supaya ulun kawa bapista lawan kakawanan ulun. ³⁰ Namun, wayah anak pian itu bulik imbah manghabisakan harta pian gasan pasundal-pasundal, abah manyumbalih anak sapi nang lamak gasan inya." ³¹ Maka, abahnya manjawab inya, "Anakku, ikam salalu baimbai lawan aku, wan sabarataan ampunku ini ampun ikam jua. ³² Namun, hari ini kita musti bapista wan basukacita sabab ading ikam ini hudah mati, tatapi wayahini inya hidup pulang, wan hudah ditamuakan."