Hal Mawarasakan pada Hari Sabat ¹ Wayah hari sabat, Yesus mandatangi rumah pamimpin urang-urang Farisi gasan makan ruti baimbai buhannya wan buhanya sabarataan mangawasi Yesus. ² Wayah itu ada saikung urang nang mandarita busung banyu dihadapan Sidin. ³ Yesus bapadah lawan urang-urang Farisi wan ahli-ahli Taurat, "Kawalah mawarasakan urang pada hari sabat?" ⁴ Akan tatapi, buhannya kada manyahuti Sidin. Balalu, Yesus pun mamingkuti urang nang garing itu wan mawarasakanya, balalu manyuruhakan urang itu bajauh. ⁵ Yesus bapadah lawan buhannya, "Siapa garang diantara bubuhan pian pabila anaknya atawa sapi jantannya gugur ka dalam sumur wayah hari sabat, kada lakas manariknya ka luar?" ⁶ Maka, buhanya pun kada kawa mambantah pamanderan Sidin. Tampat Kahurmatan ⁷ Imbah tu, Yesus mangesahakan sabuah parumpamaan gasan tamu-tamu undangan wayah Sidin malihat nangkaya apa buhannya mamilih tampat-tampat duduk nang tarhurmat disakitar mija makan, ujar Sidin lawan buhannya, ⁸ "Pabila ikam diundang oleh saikung urang ka sabuah pista parnikahan, kada usah ikam duduk diwadah kahurmatan sabab tuan rumah itu bisa haja hudah maundang urang nang labih tarhurmat matan ikam. ⁹ Balalu tuan rumah itu pacangan mandatangi ikam wan baucap, "Barikanlah tampat ikam gasan urang ini!" wan, ikam pun musti pindah ka tampat nang paling randah wan marasa supan. ¹⁰ Namun, pabila ikam disaruani, duduklah ditampat nang paling balakang supaya wayah nang manyaruani ikam datang, inya pacangan baucap lawan ikam, 'Sahabat, pindahlah ka tampat nang labih tarhurmat," dengan damikian, ikam pacangan mandapat panghurmatan di hadapan urang-urang nang duduk makan baimbai lawan ikam. ¹¹ Sabab sabarataan urang nang maninggiakan dirinya pacanga dirandahakan, tatapi inya nang marandahakan dirinya pacangan di tinggiakan." Undangan Makan wan Balasan ¹² Balalu, Yesus bapadah lawan urang nang manyaruani Sidin itu, "Pabila ikam maadaakan jamuan makan siang atawa makan malam, kada usah maundang kakawanan, dingsanak-dingsanak, kaum kaluarga, atawa tatangga ikam nang sugih sabab buhannya pacangan mambalas ikam lawan manyaruani ikam gasan makan baimbai buhannya. ¹³ Akan tatapi, pabila ikam maadaakan pista, saruanilah urang-urang miskin, urang-urang cacat, urang-urang lumpuh, wan urang-urang buta. ¹⁴ Wan, ikam pacangan diberkahi sabab urang-urang ini kada pacangan kawa mambalas ikam; ikam pacangan mandapat balasanya wayah kabangkita urang-urang bujur." Parumpamaan tentang Saruan Jamuan Makan ¹⁵ Wayah saikung urang nang makan baimbai Sidin mandangar ucapan-ucapan ini, urang itu bapadah lawan Sidin. 'Dibarkahilah urang nang pacangan makan ruti didalam Karajaan Allah." ¹⁶ Akan tatapi, ujar Yesus lawan urang itu, "Ada saikung urang nang maadaakan jamuan makan malam nang ganal wan inya manyaruani urang banyak, ¹⁷ wayah makan malam hudah sampai, urang itu manyuruhakan hambanya gasan bapadah lawan buhan tamu nang hudah disaruani itu, " Datanglah sabab sudah siap sabarataan." ¹⁸ Namun, sabarataan tamu nang disaruani itu mulai baolah alasan-alasan. urang paasa bapadah, 'Aku hanyar haja manukar sabidang ladang wan aku musti tulak malihatinya. Tarimalah parmintaan maafku." ¹⁹ Nang lain bapadah, "Aku hanyar haja manukar lima pasang sapi wan aku musti tulak gasan mamariksa sapi-sapi itu. Tarimalah parmintaan maafku." ²⁰ Samantara nang lain lagi bapadah, "Aku hanyar haja manikah. sabab itu, aku kada kawa datang." ²¹ Balalu, palayan itu pun babulik wan malapurakan sabaratan hal lawan tuannya. Maka, majikanya itu manjadi sarik, imbah tu baucap lawan palayannya, "Lakaslah! tulak kajalan-jalan wan satiap gang dikuta ini. Bawa haja gasan-Ku urang-urang miskin, urang-urang lumpuh, urang-urang pincang, wan urang-urang buta." ²² Balalu, palayan itu bapadah lawan Sidin, 'Tuan, ulun hudah malakuakan apa nang Pian parintahakan, tatapi masih ada wadah nang kusung." ²³ Tuan itu bapadah lawan palayannya, "Tulaklah ka jalan-jalan raya wan satiap gang. Bawai haja urang-urang disana gasan tulak kamari supaya rumahku manjadi hibak. ²⁴ Aku bapadah lawan ikam, kada saikung urang pun matan buhannya nang aku saruani sabalumnya itu pacangan manikmati makanan sajianku." Tentang Maumpati Yesus ²⁵ Urang banyak bajalan baimbai lawan Yesus. Balalu Yesus bapaling lawan buhannya wan baucap, ²⁶ "Pabila saikung urang datang lawan Aku tatapi kada mambanci abahnya wan umanya, bini wan kakanakanya, dingsanak lalakian wan dingsanak babinianya, bahkan hidupnya saurang, inya kada kawa manjadi murid-murid-Ku. ²⁷ Siapa haja nang kada mamikul salibnya wan maumpati Aku, inya kada kawa manjadi murid-Ku. ²⁸ Siapa garang diantara ikam nang handak mandiriakan manara, tatapi kada duduk tarlabih badahulu wan manghitung biaya gasan manahui apakah inya baisi cukup duit gasan manuntungakanya? ²⁹ Amun kadak kaya itu, wayah inya maolah pundasi wan kada sanggup manuntungakannya, sabarataan urang nang malihatnya pacangan manawai inya. ³⁰ Urang-urang itu pacangan bapadah, "Urang ini mulai mambangun, tatapi inya kada sanggup manuntungakanya." ³¹ Atawa, raja manakah nang pacangan tulak batampur malawan raja lain tatapi kada duduk tarlabih badahulu wan mampartimbangakan apakah inya baimbai 10.000 tantaranya kawa malawan musuhnya nang baisi 20.000 tantara? ³² Pabila inya kada kawa mangalahakan raja lain itu, inya pacangan mangirim saikung urang utusan wan manakunakan syarat-syarat pardamaian wayah pasukan musuhnya itu masih jauh. ³³ Nang kaya itu jua lawan ikam masing-masing, kadada saikung urangpun di antara ikam nang kawa manjadi murid-Ku pabila inya kada manyarahakan saluruh ampun inya." Garam nang Tawar Kadada Gunanya ³⁴ Uyah itu baik, tatapi pabila uyah itu hudah kahilangan rasa asinnya, nang kaya apa maulah asin pulang? ³⁵ Uyah itu bahkan kada kawa lagi di pakai gasan ladang atawa pupuk sahingga pacangan di buang urang. Siapa nang baisi talinga gasan mandangar, biar haja inya mandangar!"