Panggilan Gasan Bartubat ¹ Di situ, ada babarapa urang nang mamadahi Yesus tentang urang-urang Galilea nang darahnya dicampur Pilatus lawan kurban parsambahan buhannya. ² Yesus manjawab buhannya, "Apakah ikam mangira urang-urang Galilea ini labih badosa matan urang-urang Galilea lainya sabab buhannya mandarita nang kaya itu? ³ Aku mamadahakan lawan ikam, kadak. Akan tatapi, pabila ikam kada bartubat, ikam sabarataan jua pacangan mati. ⁴ Atawa manganai kadalapan walas urang nang mati, wayah manara di parak kulam Siloam gugur wan manimpa buhannya, apakah ikam mangira buhanya adalah pandosa nang labih buruk matan pada sabarataan urang nang badiam di Yerusalem? ⁵ Aku baucap lawan ikam, kadak. Akan tatapi, pabila ikam kada bartubat, ikam sabarataan jua pacangan mati!" Pohon nang Kada Barbuah ⁶ Yesus jua mangesahakan parumpamaan ini: "Ada saikung urang nang baisi sabatang puhun ara nang ditanam di kabun anggurnya. Akan tatapi, wayah inya datang gasan mancari buah pada puhun itu, inya kada manamuakannya. ⁷ Jadi, inya baucap lawan tukang kabunnya, "Sudah talu tahun aku datang mancari buah pada puhun ara ini, tatapi aku balum suah manamuakan asa pun. Tabang haja puhun itu! baapa musti manyia-nyiakan tanah gasan puhun itu?" ⁸ Akan tatapi, tukang kabun itu manjawab, "Tuan, bariakan puhun itu kasampatan lagi tahun ini gasan barbuah. Biarlah ulun manggali tanah disakitarnya wan mambarinya pupuk, ⁹ mungkin puhun itu pacangan manghasilakan buah tahun dapan. Pabila kada barbuah juga, Tuan kawa manabangnya." Yesus Manyambuhakan pada Hari Sabat ¹⁰ Suatu kali, Yesus mangajar di sabuah sinagoge wayah hari sabat. ¹¹ Di sana ada saikung urang binian nang karasuksn roh sahingga mambuatnya garing salawas walung walas tahun. Punggung binian itu bungkuk sahingga kada kawa bardiri tagak. ¹² Wayah Yesus malihatnya, Sidin mamanggil binian itu wan baucap, "Hai babinian, ikam hudah dibibasakan matan panyakit ikam." ¹³ Imbah tu, Yesus manumpangakan tangan Sidin pada binian itu wan sakatika nintu jua, inya kawa bardiri tagak wan mamuji Allah. ¹⁴ Akan tatapi, pamimpin sinagoge nintu manjadi sarik sabab Yesus manyambuhakan wayah hari sabat. ia baucap lawan urang banyak, "Ada anam hari gasan bagawe. Sabab nintu, datanglah gasan disambuhakan wayah hari-hari itu, kadanya wayah hari sabat." ¹⁵ Namun, Tuhan manjawab urang itu, "Ikam urang-urang munafik! kadakah ikam malapasakan sapi atawa kaladai ampun ikam nang taikat di kandang wan manuntunnya kaluar gasan minum wayah hari sabat? ¹⁶ Sabab itu, kadakah babinian ini, saikung urang katurunan Abraham nang hudah taikat salawas walung walas tahun oleh sitan, jua musti dilapasakan matan belenggunya itu wayah hari sabat?" ¹⁷ Wayah Yesus baucap damikian, sabarataan lawan-Nya disupanakan, wan urang banyak basukacita atas sagala parbuatan Ajaib nang hudah dilakuakan Sidin. Parumpamaan Biji Sasawi wan Ragi ¹⁸ Imbah tu, Yesus baucap, "Nang kaya apakah karajaan Allah itu? lawan apakah Aku kawa maumpamakanya? ¹⁹ Karajaan Allah itu nang kaya biji sasawi nang diambil urang wan di tanam di kabunnya; biji itu tumbuh manjadi puhun, wan burung-burung di udara baolah sarang pada dahan-dahannya." ²⁰ Wan lagi Sidin baucap, "Lawan apakah aku maumpamakan Karajaan Allah? ²¹ Karajaan Allah itu nang kaya ragi nang diambil saikung urang babinian wan dicampurakan lawan talu sukat tapung sampai sabarataan adonan itu mengembang." Hinggan Sadikit haja nang Disalamatakan ²² Yesus manyusuri kuta-kuta wan disa-disa, Sidin mangajar wan tarus bajalan manuju Yerusalem. ²³ Balalu, saikung urang batakun lawan Sidin, "Tuhan, apakah hanya sadikit urang haja nang disalamatakan?" Yesus bapadah lawan buhannya sabarataan, ²⁴ bausahalah gasan kawa masuk maliwati lawang nang sampit; sabab Aku bapadah lawan ikam, urang banyak pacangan bausaha masuk ka sana, tatapi buhanya kada pacangan kawa. ²⁵ Pabila tuan rumah bardiri wan manutup pintu rumahnya, sadangkan ikam bardiri di luar wan mangatuk lawang sambil baucap, "Tuan, tolong bukakanlah lawang gasan kami," Ia pacangan manjawab, "Aku kada tahu matan mana ikam baasal." ²⁶ Balalu, ikam pacangan manjawab, "Kami hudah makan wan nginum lawan pian. Pian hudah mangajar dijalan-jalan kuta kami." ²⁷ Namun, Ia pacangan manjawab, "Aku kada pinandu lawan ikam wan kada tahu matan mana ikam baasal. bajauhlah matan hadapanku, kalian sabarataan nang katuju baulah kajahatan!" ²⁸ Ikam pacangan manangis wan manggartakakan gigi wayah malihat Abraham, Ishak, wan Yakub, baimbai lawan sabarataan nabi baada di dalam Karajaan Allah samantara ikam dilimparakan kaluar. ²⁹ Imbah tu urang-urang pacangan datang matan timur wan barat, wan jua matan utara wan salatan. Buhannya pacangan duduk wan makan di dalam Karajaan Allah. ³⁰ Sasungguhnya, urang-urang nang tarakhir pacangan manjadi urang nang paasa wan urang-urang nang paasa pacangan manjadi urang nang tarakhir." Yesus Musti Tulak ka Yerusalem ³¹ Wayah itu babarapa urang farisi mandatangi Yesus wan bapadah, "Bajauhlah, tinggalakan tampat ini sabab Herodes handak mambunuh Pian." ³² Yesus manjawab buhannya, "Hari ini wan isuk, Aku pacangan mausir roh-roh jahat wan manyambuhakan urang, wan wayah hari ka talu, Aku pacangan manuntungakan gawian-Ku." ³³ Akan tatapi, Aku musti malanjutakan parjalanan hari ini, isuk, wan lusa sabab kada mungkin saikung urang nabi mati diluar Yerusalem. ³⁴ Yerusalem, Yerusalem! ikam mambunuh buhan nabi wan marajam urang nang di utus gasan ikam! Baulang kali Aku rindu mangumpulakan anak-anak ikam, sama nang kaya induk ayam nang mangumpulakan anak-anaknya di bawah halarnya. Akan tatapi, ikam kada hakun. ³⁵ Wayah ini rumah ikam pacangan dikusungakan wan manjadi sunyi. Aku bapadah lawan ikam, Ikam kada pacangan malihat Aku lagi sampai wayahnya ikam pacangan bapadah, "Dibarkahilah Ia nang datang dalam nama Tuhan!"