Kamunafikan Pamimpin Yahudi ¹ Wayah itu, ada ribuan urang bakumpul wan buhannya saling menjajak. Yesus mulai bapander lawan buhan murid labih dahulu. "Baawas-awaslah matan ragi urang-urang Farisi, yaitu kamunafikan. ² Sabab, sabarataan nang tatutup pacangan dibukaakan wan sabarataan nang tasambunyi pacangan dinyataakan. ³ Sabab, apa nang ikam padahakan di dalam galap pacangan tardangar di dalam tarang wan nang ikam bisikakan di dalam kamar pacangan dibaritaakan di atas atap-atap rumah. Takut akan Allah ⁴ Aku memadahakan lawan ikam, hai sahabat-sahabat-Ku, kada usah takutan lawan buhannya nang kawa mambunuh awak, tatapi imbah tu kada kawa manggawe nang labih jauh lagi. ⁵ Namun, Aku pacangan maingatakan ikam perihal siapa nang musti ikam takutani; takutlah lawan Dia, nang imbah mambunuh, jua bakuasa malimparakan ikam ka dalam naraka. Ya, Dialah nang musti ikam takutani ⁶ Kadakkah 5 ikung burung pipit dijual hanya saharga 2 kaping haja? Namun, kada saikung pun matan burung-burung itu nang dilupaakan di hadapan Allah. ⁷ Bahkan, jumlah rambut dikapala ikam pun tahitung. Kada usah takut, ikam jauh labih barharaga matan pada banyak burung pipit." Pariangatan bagi nang Manyangkal Yesus ⁸ Aku bapadah lawan ikam, satiap urang nang maakui Aku dihadapan urang lain, juga pacangan diakui ulih Anak Manusia di hadapan malaikat-malaikat Allah. ⁹ Akan tatapi, satiap urang nang manyangkal Aku dihadapan urang lain jua pacangan disangkal dihadapan malaikat- malaikat Allah. ¹⁰ Wan, siapa haja nang maucapakan sasuatu nang malawan Anak Manusia kawa diampuni, tatapi siapa haja nang manghujat Roh Kudus kada pacangan diampuni. ¹¹ Wayah buhanya mambawa ikam ka sinagoge wan ka hadapan buhan pamimpin wan panguasa, kada usah gaer nangkaya apa cara ikam mambila diri atawa apa nang harus ikam panderakan, ¹² sabab wayah itu jua Roh Kudus cagar malajari ikam nangkaya apa ikam harus bapander." Parumpamaan Hal Urang nang Sugih. ¹³ Saikung urang matan urang banyak nintu baucap lawan Yesus, "Guru, suruhakan dingsanak ulun babagi warisan lawan ulun." ¹⁴ Akan tatapi, Yesus baucap lawan inya, "dingsanak, siapa nang maangkat Aku manjadi hakim atawa pangantara gasan ikam?" ¹⁵ Imbah tu, Yesus baaucap lawan buhanya, " Bajaga-jaga wan baawaslah matan sagala bantuk kasarakahan sabab hidup saikung urang kada bagantung lawan banyaknya harta kakayaanya." ¹⁶ Balalu, Yesus mangesahakan sabuah parumpamaan lawan buhanya, "Ada tanah ampun saikung urang nang sugih banar nang manghasilakan banyak banar hasil panen. ¹⁷ Balalu, urang nintu bapikir dalam hatinya, "Apa nang musti aku ulah sabab aku kada baisi wadah lagi gasan manyimpan hasil panenku?" ¹⁸ Wan, inya baucap, "Inilah nang pacangan aku ulah. Aku pacangan mambungkar lumbung-lumbungku wan mambangun nang labih ganal. Disitu, aku pacangan manyimpan sabarataan gandum wan barang-barangku. ¹⁹ Balalu, aku baucap lawan jiwaku, "Hai jiwaku, ikam baisi banyak barang nang tasimpan gasan batahun-tahun; baistirahatlah, makan, nginum, wan bahimunglah!" ²⁰ Namun, Allah baucap lawan urang nintu, "Hai, urang bungul! Malam ini jua, jiwa ikam pacangan diambil matan ikam. Balalu, siapa nang pacangan mawarisi barang-barang nang ikam simpan itu?" ²¹ Damikianlah nang pacangan tarjadi lawan urang nang manyimpan harta gasan inya saurangan, tetqpi kada sugih dihadapan Allah." Kada usah Khawati r ²² Yesus bapadah lawan murid-murid-Nya, "Sabab itu, Aku bapadah lawan ikam, kada usah khawatir tentang hidup ikam, tentang apa nang pacangan ikam makan. atawa, khawatir tentang awak ikam, tentang apa nang pacangan ikam pakai. ²³ Sabab, hidup labih panting matan pada makanan wan awak labih panting matan pada pakaian. ²⁴ Liati burung-burung gagak. Buhanya kada manabur atawa manuai, buhanya jua kada baisi gudang atawa lumbung, tatapi Allah mambari buhanya makan. Ikam jauh labih barharaga matan pada burung-burung itu. ²⁵ Siapa garang diantara ikam nang sabab khawatir kawa manambah sahasta haja pada umur hidupnya? ²⁶ Pabila ikam kada kawa malakuakan hal-hal nang halus ini, ba apa ikam manghawatirakan hal-hal nang lain? ²⁷ Parhatiakanlah bunga bakung, nang kaya apa buhanya tumbuh. bunga-bunga itu kada kawa bagawi atawa mamintal, tatapi Aku bapadah lawan ikam, bahkan Salomo dalam kamuliaanya pun kada bapakaian sabungas matan pada bunga-bunga itu. ²⁸ Pabila Allah mandandani rumput di ladang, nang hari ini tumbuh wan isuk dibuang ka dalam api, kadakah Ia pacangan mandadani ikam labih matan pada rumput itu? Hai, ikam nang kurang parcaya! ²⁹ Jadi, kada usah ikam mancari apa nang pacangan ikam makan atawa apa nang pacangan ikam nginum, wan kada usah mancamasakanya. ³⁰ Sabab, bangsa-bangsa didunia ini mancari itu sabarataan, tatapi Bapamu tahu banar bahwa ikam mamarlukanya. ³¹ Sabaliknya, carilah badahulu karajaan Allah, maka sabarataan ini jua pacangan ditambahakan gasan ikam." Kumpulakan Harta di Surga ³² " Kada usah takut, hai kawanan halus, sabab Bapamu berkenan mambariakan gasan ikam karajaan itu. ³³ Juallah sabarataan ampun ikam wan barilah sadakah. Ulah haja gasan ikam kantong nang kada kawa rusak, yaitu harta di surga nang kada kawa hilang, wan nang kada kawa diambil pancuntan atawa dirusak oleh ngengat. ³⁴ Sabab dimana harta ikam baada, disitu jua hati ikam baada." Hamba nang Satia Malakuakan Tugasnya ³⁵ Hendaklah pinggang ikam tatap taikat wan palita-palita ikam tatap manyala. ³⁶ Jadilah nangkaya urang-urang nang manghadangi tuannya bulik matan pista parnikahan supaya buhannya kawa lakas mambukaakan lawang, wayah tuannya itu bulik wan mangatuk lawang. ³⁷ Dibarkatilah hamba-hamba, nang didapati tuanya siap sadia, wayah inya datang. Aku mamadahakan lawan ikam, sasungguhnya, inya pacangan maikat pinggangnya gasan malayani wan mamparsilahakan palayan-palayannya gasan duduk makan. Sidin pacangan datang wan malayani buhannya. ³⁸ Pabila tuan itu datang wayah tangah malam atawa baisukan hari wan mandapati buhannya rahatan siap sadia, dibarkatilah buhannya! ³⁹ Namun katahuilah, pabila nang ampun rumah tahu jam barapa pancuntan pacangan mandatangi rumahnya, pasti inya kada pacangan mambiarakan rumahnya dibobol. ⁴⁰ Sabab itu ikam jua musti basiap sadia sabab Anak Manusia pacangan datang wayah nang kada disangka-sangka." ⁴¹ Imbahtu, Petrus batakun lawan Sidin, "Tuhan, apakah pian mangesahakan parumpamaan ini lawan kami haja atawa lawan sabarataan urang jua?" ⁴² Jawab Tuhan, "Siapakah kapala palayan nang satia wan bijaksana nang diparcayai tuannya gasan maawasi buhan hamba nang lain, gasan mambarii buhanya makan pada wayah nang tepat? ⁴³ Dibarkatilah hamba itu, nang wayah tuanya datang, inya rahatan malakuakan tugasnya. ⁴⁴ Aku bapadah lawan ikam, sasungguhnya, tuannya itu pacangan mamilihnya gasan maawasi sabarataan hartanya. ⁴⁵ Akan tatapi, pabila hambanya itu baucap dalam hatinya, "Tuanku kada pacangan lakas datang," wan mulai manghambati hamba lalakian wan hamba babinian lainya, imbahtu makan wan nginum sampai mabuk, ⁴⁶ imbah tuanya datang wayah nang kada disangka-sangka wan kada ditahui oleh hamba itu, sang tuan pacangan mambunuh hamba itu wan maandaknya baimbai lawan urang-urang nang kada satia. ⁴⁷ Saikung urang nang tahu kahandak tuannya, tatapi kada basiap sadia atawa kada malakuakan sasuai kahandak tuannya pacangan mandapat banyak pukulan. ⁴⁸ Namun, hamba nang kada tahu apa nang dikahandaki tuannya wan malakuakan hal-hal nang pantas mandapatakan pukulan, inya pacangan mandapatakan pukulan nang labih sadikit. Satiap urang nang dibari banyak, dituntut banyak. Wan, buhannya nang diparcayakan labih banyak pacangan dituntut labih banyak lagi. Yesus Maulah Pamisahan ⁴⁹ Aku datang gasan malimparakan api kadunia, wan Aku barharap api nintu hudah manyala! ⁵⁰ Akan tatapi, ada babtisan nang musti aku jalanani, wan Aku marasa liwar tertekan sampai hal nintu diganapi. ⁵¹ Apakah ikam manyangka bahwa aku datang gasan mambawa pardamaian di atas bumi? kadak, Aku mamadahakan lawan ikam, malainkan parpacahan! ⁵² Mulai wayahini, lima urang dalam asa kaluarga pacangan dipisahakan. Talu urang pacangan malawan dua urang wan dua urang pacangan malawan talu urang. ⁵³ Buhannya pacangan dipisahakan; Abah pacangan malawan anak lalakianya, wan anak lalakian pacangan malawan Abahnya.Umanya pacangan malawan anak biniannya, wan anak bebiniannya pacangan malawan umanya. Uma mintuha pacangan malawan minantu biniannya, wan minantu binianya pacangan malawan uma mintuhanya." Manafsirakan Zaman ⁵⁴ Balalu, Yesus baucap lawan urang banyak, "Wayah ikam malihat awan di subalah barat, ikam lakas baucap, "Hujan pacanga turun," wan hujan bujur-bujur turun. ⁵⁵ Wayah ikam marasakan angin batiup matan salatan, ikam baucap, "Hari ini pacangan panas terik," wan hal nintu bujur-bujur tarjadi. ⁵⁶ Ikam urang munafik! Ikam kawa manafsirakan rupa langit wan bumi, tatapi kanapa ikam kada kawa manafsirakan zaman ini?" ⁵⁷ Mangapa ikam saurang kada kawa mamutusakan apa nang bujur? ⁵⁸ Wayah ikam tulak baimbai musuh ikam gasan manghadap pamarintah, usahakanlah gasan manuntungakan masalah ikam lawan inya dalam parjalanan supaya inya kada mairit ikam lawan hakim wan hakim pacangan manyarahakan ikam lawan pangawal, wan pangawal itu pacangan malimparakan ikam kadalam panjara. ⁵⁹ Aku baucap lawan ikam, ikam kada pacanga kaluar matan sana sabalum ikam mambayar utang ikam sampai lunas."