Pangajaran hal Doa ¹ Pas wayah itu, Yesus rahatan badoa. Imbah Sidin tuntung badua, saikung urang matan murid-murid-Nya baucap lawan Sidin, "Tuhan, ajari kami badoa sama nang kaya Yohanes maajari murid-muridnya." ² Imbah tu Yesus baucap lawan buhannya, "Wayah ikam badoa, badoalah nang kaya ini: "Bapa, dikudusksnlah ngaran Pian. Datanglah karajaan Pian. ³ Barikanlah gasan kami makanan nang sacukupnya satiap hari, ⁴ wan ampuniakan dusa-dusa kami sabab kami saurang jua maampuni satiap urang nang basalah lawan kami. Wan, jangan mambiarakan kami kana cubaan." Minta haja, Cari haja, wan Katuk haja ⁵ Imbah tu Yesus bapadah lawan buhannya, "Saandainya saikung urang matan ikam baisi saikung urang kawan wan ikam tulak ka wadah kawan ikam tu wayah tangah malam wan baucap lawan inya, "Kawan, pinjamakan dahulu aku talu ruti, ⁶ sabab ada saikung urang kawanku nang rahatan malakuakan parjalanan singgah ka wadahku, wan aku kada baisi apa-apa gasan disuguhakan lawan inya." ⁷ Kakira manyahut jua kah kawan ikam matan rumah, "Jangan manghauri aku! Lawang hudah takunci aku wan anak-anakku hudah dipangguringan. Aku kada kawa bangun gasan maambil nang ikam pinta." ⁸ Aku memadahakan lawan ikam pabila kawan ikam tu kada jua bangun wan mambariakan apa nang ikam pinta sabab ikam kawanya, tatapi lantara ikam tarus mamuhun, inya pasti pacangan bangun wan mambarii apa nang ikam parluakan. ⁹ Jadi, Aku mamadahakan lawan ikam pinta haja, ikam pacangan manarima. Cari haja, ikam pacangan manamuakan. Katuk haja, lawang pacangan dibukaakan gasan ikam. ¹⁰ Sabab siapa haja nang bapintaan pacangan manarima. Siapa haja nang bacari pacangan manamuakan. Wan siapa haja nang mangatuk, lawang pacangan dibukaakan gasan inya. ¹¹ Ada garang saurang abah diantara ikam nang pacangan mambari ular gasan anaknya pabila inya minta iwak? ¹² Atawa mambari kalajengking, pabila inya minta hintalu? ¹³ Pabila ikam haja nang jahat tahu nangkaya apa mambari nang baik gasan anak-anak ikam, apalagi Bapa ikam nang di surga. Ia pacangan mambariakan Roh Kudus gasan urang-urang nang maminta lawan Sidin." Yesus Mamakai Kuasa Allah ¹⁴ Wayah itu, Yesus mausir sitan matan saikung urang lalakian nang bisu. Imbah sitan itu kaluar, urang nang tadinya bisu itu kawa bapander sampai urang banyak manjadi hiran. ¹⁵ Akan tatapi, ada urang nang baucap, "Inya mausir sitan lawan kuasa Beelzebul, pamimpin sitan." ¹⁶ Babarapa urang lainnya handak manguji Yesus, buhannya maminta Sidin manampaiakan suatu tanda matan surga. ¹⁷ Akan tatapi, Yesus tahu apa nang buhannya pikirakan balalu baucap wan buhannya, "Satiap karajaan nang tapacah-pacah wan saling mayarang cagar hancur. Wan, kaluarga nang anggota-anggotanya saling bamusuhan cagar tahambur. ¹⁸ Jadi, pabila iblis jua tapacah-pacah wan malawan inya sorang, kada mungkin karajaannya kawa tatap batahan? Aku bapadah kaya ini lantaran ikam manyambat bahwa Aku mamakai kuasa Beelzebul mangusir setan-setan. ¹⁹ Pabila Aku mangusir setan-setan mamakai Beelzebul, lawan kuasa siapa garang anak-anak ikam mangusir buhannya? Marga itu, buhannyalah nang cagar jadi hakim ikam. ²⁰ Akan tatapi, pabila Aku mamakai kuasa Allah mangusir setan, Karajaan Allah sudah mandatangi ikam. ²¹ Pabila ada nang kuat wan basanjata langkap manjaga istananya sorang, harta bandanya pasti aman. ²² Tatapi, pabila ada urang nang labih kuat matan inya handak manyarang wan mangalahakaninya, maka urang nang labih kuat itu harus marampas sanjata-sanjata nang diandalakan uleh urang itu wan mambagiakan harta rampasannya. ²³ Siapa gin nang kada mamihak Aku, inya malawan Aku. Wan siapa gin nang kada mangumpulakan lawan Aku, inya mamisah-misahakan." Babuliknya Roh Najis ²⁴ "pabila roh najis kaluar matan awak urang, roh itu cagar bakililing maliwati intang wadah nang sunyi gasan bamandak, tatapi kada manamuakannya. Lantaran itu, inya baucap, 'Aku cagar babulik ka rumah nang udah aku tinggalakan.' ²⁵ Wayah inya babulik, inya malihati rumah itu udah dibarasihakan wan rapi. ²⁶ Imbah itu, roh najis itu tulak balalu mambawai tujuh roh nang labih jahat pada inya masuk wan badiam di rumah itu sampai kondisi urang itu jauh labih parah dari pada sabalumnya itu" Urang-Urang nang Babahagia ²⁷ Rahat Yesus mamanderakan itu, saikung babinian nang ada di tangah-tangah urang banyak bakuciak, "Dibarakahilah babinian nang malahirakan Pian wan buah dada nang manyusui Pian." ²⁸ Akan tatapi, Yesus baucap, "Babahagialah urang-urang nang mandangarakan firman Allah wan mantaatinya." Tanda Yunus ²⁹ Rahat urang-urang nang bakumpul sasar babanyak, Yesus baucap, "Generasi ini adalah generasi nang jahat; buhannya maminta tanda, tatapi kada sabuting-buting tanda nang cagar di tampaiakan gasan buhannya salain tanda Yunus. ³⁰ Nangkaya Yunus di pakai tanda gasan urang Niniwe, kayaitu jua Anak Manusia pacangan jadi tanda gasan generasi ini. ³¹ "Pas hari kiamat, Ratu matan Selatan pacangan bangkit taimbai urang-urang matan generasi ini wan inya cagar mahukum buhannya lantaran inya datang matan ujung bumi gasan mandangarakan hikmat Salomo, tatapi di sini ada urang nang labih hibat matan Salomo. ³² Intang hari kiamat, urang-urang Niniwe pacangan bangkit baimbai generasi ini lawan mahukumnya, lantaran urang-urang Niniwe batobat imbahYunus bahotbah di hadapan buhannya, sadangkan disini ada urang nang labih ganal matan Yunus." Mata adalah Palita Awak ³³ Kada saikung urangpun nang imbah manyalaakan palita, pacangan maandak palita itu dibawah gantang. Sabaliknya, buhannya maandak palita itu di tihang palita cagar urang-urang nang masuk kawa maliati tarangnya. ³⁴ Mata adalah palita tubuh ikam. Pabila mata ikam baik, sabarataan awak ikam pacanga tarang. Akan tatapi, pabila mata ikam jahat, sabarataan awak ikam pacangan hibak lawan kagalapan. ³⁵ Marga nintu, baawas-awaslah agar tarang nang ada didalam diri ikam kada manjadi galap. ³⁶ Pabila awak ikam hibak lawan tarang wan kadada bahagian nang galap, awak ikam tu pacangan tarang sabarataan sama nang kaya palita manarangi ikam lawan cahayanya." Yesus Managur Urang Farisi wan Ahli Taurat ³⁷ Imbah Yesus tuntung bapander, saikung urang Farisi maundang Sidin gasan makan. Yesus pun datang, balalu duduk wan makan. ³⁸ Akan tatapi, urang Farisi nintu hiran wayah maliati Yesus kadak mambasuh tangan-Nya badahulu sabalum makan. ³⁹ Tatapi Yesus baucap lawan inya, "Urang-urang Farisi nang kaya ikam mambarsihakan bahagian luar galas wan piring, tatapi didalam diri ikam dihibaki lawan kasarakahan wan kajahatan. ⁴⁰ Hai urang-urang bungul! Kadakah Ia nang maulah bagian luar jua maulah bagian dalamnya? ⁴¹ Marga nintu bagikanlah apa nang ada lawan ikam itu sabagai sadakah ikam. Dengan damikian, ikam pacangan banar-banar barasih. ⁴² Akan tatapi, calakalah ikam, urang-urang Farisi! Sabab, ikam mambari parsapuluhan hasil salasih, inggu, wan sagala macam tanaman kabun ikam, tatapi ikam kada parduli lawan kaadilan wan kasih Allah. Saharusnya, ikam malakuakan sabarataan hal nintu tanpa maabaiakan hal-hal nang lain. ⁴³ Calakalah ikam, urang-urang Farisi sabab ikam katuju baduduk di wadah nang tarbaik di sinsgoge wan jua katuju manarima hurmat di pasar. ⁴⁴ Cilakalah ikam lantaran ikam nangkaya kuburan nangkada ba ciri, nang kada disadari di jajak-jajak urang." ⁴⁵ Imbah itu, saikung urang ahli Taurat baucap wan Yesus, "Guru, rahat Pian bapadah hal-hal ini, Pian jua mahina kami." ⁴⁶ Tatapi, Yesus manjawab, "Calakalah ikam, hai ahli-ahli Taurat! Sabab, ikam maandak beban nang barat gasan dipikul urang lain, tatapi ikam sorang kada mau manggatuk beban itu biar lawan sabuting jari haja. ⁴⁷ Cilakalah ikam lantaran ikam maulah kuburan gasan nabi-nabi nang dibunuh uleh padatuan ikam. ⁴⁸ Bahkan, ikam manyataakan gasan samua urang amun ikam mangakui ulahan padatuan ikam, buhannyalah nang mambunuh nabi-nabi itu, tatapi ikam nang maulah kuburannya. ⁴⁹ Inilah sababnya, Allah dalam hikmat-Nya baucap, 'Aku cagar mangirim nabi-nabi wan rasul-rasul gasan buhannya, tatapi babarapa matan urang-urang nang Kuutus itu pacangan dibunuh wan disiksa,' ⁵⁰ supaya darah sabarataan nabi, nang tatumpah mulai dunia diciptaakan, kawa dituntut matan generasi ini, ⁵¹ mulai matan darah Habel sampai darah Zakharia, nang dibunuh di antara altar wan Bait Allah. Ya, Aku bapadah gasan ikam bahwa generasi ini cagar batanggung jawab gasan hal ini. ⁵² Cilakalah ikam, hai ahli-ahli Taurat! Sabab ikam udah maambil kunci pangatahuan, tatapi ikam sorang kada hakun masuk wan mahalang-halangi urang lain gasan masuk." ⁵³ Imbah Yesus maninggalakan wadah itu, ahli-ahli Taurat wan urang Farisi mulai mamusuhi-Sidin wan manuduh-Sidin wan bamacam partanyaan. ⁵⁴ Buhannya bakomplot hagan manangkap Yesus mamakai panderan nang diucapakan-Sidin.