Yesus Mautus Pitung Puluh Urang nang Maumpati-Nya ¹ Imbah itu, Yesus manatapakan pitung puluh urang nang maumpati nang lain, wan Yesus mautus buhannya tulak badua-dua gasan mandahului Sidin ka satiap kuta wan tampat nang pacangan dikunjungi Sidin. ² Ujar-Nya lawan buhanya. "Hasl panen memang banyak banar ,tatapi urang nang manggawi sadikitanya. Sababitu, minta haja lawan Tuan nang baisi hasil panen nintu gasan mangirim pekerja-pekerja gasan mangumpulakan hasil panen-Nya." ³ Ayu Tulak! Aku mangirim ikam kaya anak domba ka tangah-tangah kawanan serigala. ⁴ Jangan mambawa epok duit, tas, atawa sandal. Wan, jangan marawa siapa haja intang jalan. ⁵ Ka rumah siapa haja nang ikam masuki, ucapakan badahulu, 'Damai sejahtera atas rumah itu.' ⁶ Pabila urang nang ada di situ manarima, damai sejahtera ikam cagar badiam atasnya. Akan tatapi, pabila kada, damai sejahtera ikam babulik lawan ikam. ⁷ Badiam haja di rumah itu. Makan haja wan minum haja apa nang buhannya surung gasan ikam. Sabab urang nang bagawi pantas manarima upahnya. Jangan bapindah-pindah matan satu rumah ka rumah nang lain. ⁸ Satiap kali ikam mamasuki kota wan urang di sana manyambut ikam, makan haja nang buhannya surung di hadapan ikam. ⁹ Warasakan urang nang garing nang badiam disana, wan padahakan gasan buhannya, 'Karajaan Allah sudah parak lawan ikam.' ¹⁰ Akan tatapi, pabila ikam masuk ka kampung balalu urang kampung kada manarima ikam, Tulak haja ka jalan-jalan parak itu wan padahakan, ¹¹ 'Dabu matan kota ikam nang barikit di batis kami pacangan maki kibasakan di hadapan ikam, tatapi, ingati ini: Karajaan Allah sudah parak.' ¹² Aku bapadah wanikam: intang hari itu, tanggungan Sodom labih ringan matan tanggungan kota itu." Paringatan Gasan nang manolak Yesus ¹³ "Cilakalah ikam, Khorazim! Cilakalah ikam, Betsaida! Saandainya Aku maulah mujizat-mujizat nang sama di Tirus wan Sidon, maka buhannya pasti udah lawas batobat lawan duduk mamakai kain kabung wan abu. ¹⁴ Akan tatapi, wayah panghakiman, tanggungan Tirus dan Sidon labih ringan matan tanggungan ikam. ¹⁵ Wan ikam, Kapernaum, apakah ikam cagar di angkat ka surga? Kada, ikam pacangan ditawakakan ka dunia urang mati! ¹⁶ Siapa haja nang mandangarakan ikam, baarti mandangarakan Aku. Tatapi, siapa nang manulak ikam, inya manulak Aku jua. Wan, siapa manulak Aku, inya manulak Sidin nang mangutus Aku," Setan-setan Tunduk wan Pangikut Yesus ¹⁷ Imbah itu katujuh puluh pangikut itu babulik wan himung banar sambil baucap, "Tuhan, setan-setan gin tunduk wan kami dalam ngaran-Pian." ¹⁸ Yesus baucap wan buhannya, "Aku malihat iblis gugur matan langit nangkaya kilat. ¹⁹ Ingati bahwa Aku udah mambari ikam kuasa gasan manjajak ular wan kalajengking, jua kuasa atas sabarataan kakuatan musuh-musuh. Kada pacangan ada nang manyakiti ikam. ²⁰ Akan tatapi, jangan ikam himung lantaran r0h-roh itu tunduk wanikam, sabaliknya basukacitalah marga ngaran ikam tatulis di surga." Yesus Badoa ka Bapa ²¹ Pas wayah itu, himung banar Yesus di dalam Roh Kudus wan baucap, "Aku basyukur ka-Pian Bapa, Tuhan atas langit wan bumi, sabab Pian marahasiaakan hal-hal ini gasa urang bijaksana wan cerdas. Akan tatapi, Pian manampaiakannya gasan bayi-bayi. Ya Bapa, marga itulah nang dikatujui oleh -Pian. ²² Bapa-Ulun imbah manyarahakan sabarataan gasan-Ulun, wan kada saikung-ikungnya nang pinandu wan Anak kacuali Bapa. Wan, kada saikung urang nang pinandu Bapa, kacuali Anak wan urang-urang nang gasan buhannya Anak bakahandak gasan manyataakannya." ²³ Imbah itu, Yesus bapaling ka murid-murid-Sidin wan baucap wan buhannya sacara pribadi, Babahagialah mata nang malihat apa nang ikam lihat, ²⁴ Sabab Aku baucap wan ikam: banya nabi wan raja nang handak banar malihat hal-hal nang ikam lihat wayahini, tatapi buhannya kada malihatnya, Wan, handak banar mandangarakan hal-hal nang ikam dangar wayahini, tatapi buhannya kada mandangaranya. "Urang Samaria nang Baik Hati ²⁵ Imbah itu, ada ahli Hukum Taurat badiri handak mancubai Yesus, ujarnya, "Guru, apa nang harus aku ulah gasan mandapatakan hidup kekal?" ²⁶ Jawab Yesus gasan inya, "Apa nang tatulis dalam Hukum Taurat? Apa nang ikam baca di dalamnya?" ²⁷ Urang itu manjawab, "Kasihilah Tuhan, Allahmu, lawan saluruh hatiikam, lawann sabarataan jiwaikam, lawan sabarataan kakuatan ikam, wan sabarataan akal budiikam. Wan, kasihilah sasamaikam manusia kaya ikam manyangi awak ikam sorang," ²⁸ Yesus baucap wan inya, "Jawaban ikam itu bujur. Gawi'i itu, maka ikam pacangan hidup." ²⁹ Akan tatapi, urang itu handak mambila dirinya, maka inya baucap wan Yesus, "Balalu, siapa garang sasamaku manusia?" ³⁰ Yesus manjawab itu wan baucap, "Ada urang nang turun matan Yerusalem ka Yerikho, inya di rampuk urang di pukuli wan dirampas bajunya, balalu di tinggalakan talantar sampai parak mati. ³¹ Tabarungan, saikung imam maliwati jalan itu, rahat inya malihat urang itu, inya tulak haja baliung maliwati pinggir jalan. ³² Kayaitu jua nang diulah saikung urang Lewi, imbah datang ka situ wan malihat urang itu, inya baliung jua maliwati pinggir jalan lain. ³³ Akan tatapi, ada urang Samaria nang rahat dalam pajalanan liwat di situ, Wan, imbah inya malihat urang itu, inya marasa kasihan wan inya. ³⁴ Balalu, urang Samaria itu mamarakinya, mambalut luka-lukanya. Inya mangasainya lawan minyak wan anggur, balalu manaikakan urang itu ka atas kaladainya wan mambawanya ka sabuah panginapan, balalu marawat urang itu. ³⁵ Kaisukannya, urang Samaria mangaluarakan duit 2 dinar wan mambariakannya ka panjaga panginapan itu balalu baucap, 'Rawatakan urang nang taluka itu. Wan, barapa haja ikam mahabisakan duit gasan inya, aku cagar manggantiinya imbah aku babulik." ³⁶ Balalu, Yesus baucap, "Manurut ikam. siapa garang di antara katalu urang itu nang manjadi sasama manusia dari urang nang imbah di rampuk itu?" ³⁷ Jawab ahli Taurat itu, "Urang nang manampaiakan marasnya gasan urang itu, "Lalu, ujar Yesus, "Sana tulak! gawiaakan hal nang sama." Maria wan Marta ³⁸ Rahat Yesus wan murid-murid-Sidin dalam parjalanan, Yesus masuk ka sabuah kampung wan saurang babinian bangaran Marta manyambut Yesus di rumahnya. ³⁹ Marta baisi dinsanak babinian bangaran Maria nang baduduk di parak batis Yesus wan mandangarakan Yesus mangajar. ⁴⁰ Akan tatapi, Marta talalu sibuk manggawi gawian nang harus dituntungakan. Marta balalu baparak wan Yesus sambil baucap, "Tuhan, kada padulikah Pian bahwa dinsanak ulun mambiarakan ulun bagawi sorangan? Suruh pang inya mandangani aku!" ⁴¹ Akan tatapi, Tuhan manjawab inya, "Marta, Marta, ikam kuatir wan mamusingakan diri lawan banyak hal. ⁴² Hinggan ada satu hal nang panting. Maria udah mamilih bagian nang paling baik, wan bagian itu kada suah diambil matan inya."