Yesus Labih Besar daripada Musa ¹ Lantaran itu, dinsanak-dinsanak nang kudus, ikam nang baisi bagian dalam panggilan surgawi, pangdang haja Yesus, Sang Rasul wan Imam Besar pangakuan kita, ² nang satia wan Sidin nang udah manatapakan-Sidin, sama nangkaya Musa nang satia dalam saluruh rumah-Sidin. ³ Sabab, Yesus dianggap layak gasan mandapat kamuliaan nang labih besar daripada Musa, nangkaya halnya urang nang maulah rumah nang mandapat kahurmatan labih besar daripada rumah itu sorangan. ⁴ (Sabab, satiap rumah dibangun uleh urang, tatapi nang mambangun dari sabarataan adalah Allah) ⁵ Musa satia lawan saluruh rumah Allah manjadi palayan, gasan mambari kasaksian gasan hal-hal nang pacangan dikesahakan di hari kena. ⁶ Tatapi, Kristus satia manjadi Anak dalam rumah Allah, yaitu kita, pabila kita tatap taguh bapingkut intang kayakinan wan pangharapan nang kita banggaakan sampai panghabisannya. Taruslah Maumpati Allah ⁷ Lantaran itu, nangkaya Roh Kudus padahakan, "Pas hari ini, amun ikam mandangar suara-Sidin, ⁸ jangan karasakan hati ikam nangkaya ikam ulah dahulu mambaruntak rahat hari pencobaan di padang gurun, ⁹ yaitu wayah padatuan ikam mancubai Aku wan malihat ulahan-ulahan-Ku salawas ampat puluh tahun. ¹⁰ Sabab itu Aku sarik wan generasi itu wan baucap, 'Hati buhannya salalu sasat wan buhannya kada mangarti jalan-jalan-Ku.' ¹¹ Jadi, Aku basumpah dalam sarik-Ku:'Buhannya kada pacangan masuk ka wadah Aku badiam.""Mazmur 95:7-11 ¹² Bahati-hati haja Dinsanak sabarataan, jangan ada di antara ikam nang baisi hati nang jahat wan nang kada parcaya, nang maulah ikam bapaling matan Allah nang hidup. ¹³ Sabaliknya, nasihat haja saikung lawan nang lain satiap hari, salawas ada nang disambat "hari ini" supaya kadada di antara buhan ikam nang sasatakan uleh tipu daya dosa. ¹⁴ Kita sudah maambil bagian intang Kristus, pabila kita bapingkut taguh wan kayakinan kita nang panampaian sampai panghabisannya. ¹⁵ Nangkaya tatulis, "Pas hari ini, pabila ikam mandangar suara-Sidin, jangan karasakan hati ikam nangkaya dalam pambaruntakan. "Mazmur 95:7b-9 ¹⁶ Siapa garang urang nang imbah mandangar suara Allah, tatapi mambaruntak? kadakah buhannya sabarataan nang kaluar matan Mesir di bawah kapamimpinan Musa? ¹⁷ Wan, gasan siapa garang Allah sarik salawas ampat puluh tahun? Kadakah wan buhannya nang baulah dosa sampai mayat buhannya bagalimpangan intang padang gurun? ¹⁸ Wan, gasan siapa garang Allah basumpah bahwa buhannya kada cagar bisa masuk ka wadah kadiaman-Sidin, kalau kada gasan buhannya nang kada taat? ¹⁹ Jadi, kita malihat bahwa buhannya kada kawa masuk lantaran buhannya kada parcaya.