Nasihat-Nasihat gasan Urang Parcaya ¹ Tarusakan mamalihara kasih lawan dinsanank sabarataan! ² Inganti tarus supaya mambari tumpangan wan urang-urang asing lantaran amun ikam manggawi itu, kada ikam sadari bahwa ikam sudah manjamu malaikat-malaikat. ³ Gananglah urang-urang nang dipanjarakan saolah-olah ikam nang dipanjarakan baimbai lawan buhannya, gananglah jua urang-urang nang taaniaya sabab ikam pun baisi intang awak. ⁴ Parnikahan musti bujur-bujur dihargai ulih sabarataan urang, wan musti dijaga ranjang parnikahan supaya tatap murni, sabab Allah pacangan manghukum urang-urang nang cabul wan buhan pasundal. ⁵ Jauhakan hidup ikam matan cinta duit, wan cukupakan diri ikam lawan apa nang manjadi ampun ikam sabab Sidin saurang bapadah: "Aku kada pacangan maninggalakan ikam, wan kada pacangan suah maabaiakan ikam. "Ulangan 31 : 6. ⁶ Jadi, saurang kawa lawan yakin bapadah; "Tuhan adalah Panolongku, wan aku kada pacangan takutan. Apa nang pacangan diulah urang ka aku?" Mazmur 118 ; 7. ⁷ Gananglah buhan pamimpin ikam, buhannya nang hudah maajarakan Firman Tuhan lawan ikam. cuba itihi hasil matan cara hidup buhannya, wan cuntuhlah iman buhannya. ⁸ Yesus Kristus tatap sama, samalam, wayahini, wan sampai salawasan. ⁹ Jangan sampai ikam disasatakan ulih pangajaran nang bamacam-macam wan nang ikam kada patuh; sabab adalah nang baik bahwa hati dikuatakan ulih anugerah, kadanya ulih aturan tentang makanan nang kada mambari manfaat gasan buhannya nang malakoninya. ¹⁰ Kita baisian altar nang matan inya urang-urang nang malayani di Kimah Suci kada baisi hak gasan makan. ¹¹ Wan, lantaran daging matan hiwan-hiwan nang darahnya di bawa ulih imam ganal ka Ruang Maha Kudus gasan parsambahan panabusan dosa dibakar diluar parkimahan. ¹² maka, Yesus jua mandarita diluar garbang kuta gasan mangudusakan umat-Nya lawan darah-Nya saurang. ¹³ Lantaran itu, ayu kita maumpati Yesus diluar parkimahan, wan mamikul kahinaan nang sama lawan kahinaan nang hudah dipikul Sidin. ¹⁴ Sabab, dibumi ini kita kada baisi kuta nang pacangan ada gasan salawasan, tatapi kita rahatan manghadangi kuta nang pacangan datang. ¹⁵ Lantaran itu, malalui Kristus ayu kita tarus-manarus mamparsambahakan kurban pujian gasan Allah, yaitu panderan bibir nang mamuliakan ngaran-Nya. ¹⁶ Jangan sampai ikam kada ingat baulah nang bujur wan mambagiakan apa nang ikam bisi lantaran kurban nangkaya itulah nang menghimungiakan Allah. ¹⁷ Taatlah lawan buhan pamimpin ikam wan tunduklah lawan buhannya lantaran buhannyalah nang manjagai jiwa ikam wan nang musti mambari partanggung jawaban atas ikam. Lawan damikian, buhannya pacangan malakuakannya lawan sukacita, kadanya lawan kaluh-kesah lantaran hal itu kada pacangan mambari kauntungan lawan ikam. Parmuhunan Doa ¹⁸ Badoalah gasan kami lantaran kami yakin bahwa kami baisi hati nurani nang bujur, nang salalu bausaha malakuakan sagala hal wan sagala cara nang tarhurmat. ¹⁹ Aku manggasak ikam gasan badoa labih bujur-bujur lagi supaya aku lakas dibulikakan lawan ikam. ²⁰ Wayahini, Allah sumber damai sajahtara, nang hudah mambangkitakan Yesus, Tuhan kita, Sang Gambala Agung atas dumba-dumba-Nya, lawan darah parjanjian nang kakal ²¹ kiranya mamparlangkapi ikam dalam satiap hal nang bujur gasan malakuakan kahandak-Nya. wan, biarakan Sidin manggawi didalam kita gasan manghimungakan hati Sidin malalui Kristus Yesus, nang lawan Sidinlah kamuliaan sampai salawasan. Amin. Salam Panutup ²² Dingsanak-dingsanakku, aku mandurung ikam gasan mandangarakan panderan nasihatku lawan sabar sabab panderan nasehatku ini hudah kutulisakan lawan singkat gasan ikam. ²³ Aku handak mamadahi ikam bahwa dingsanak kita, Timotius, hudah dibibasakan matan panjara. wan, pabila inya lakas datang ka aku, maka aku pacangan datang baimbai inya wayah manamui ikam. ²⁴ Sampaiakan salam kami lawan buhan pamimpin ikam wan lawan sabarataan urang-urang kudus. Dinsanak-dinsanak kita matan Italia manyampaiakan salam lawan ikam. ²⁵ Anugerah Allah mairingi ikam sabarataan.