Manaladani Yesus ¹ Lantaran kita baisi banyak saksi nang mangalilingi kita nangkaya awan, hayu kita maninggalakan sabarataan beban wan dosa nang manjarat kita balalu bukah wan tekun parlumbaan nang disadiaakan dihadapan kita. ² Biar haja mata kita tatuju wan Yesus, Sang Pancipta wan Panyampurnaan iamn kita, nang demi sukacita nang imbah ditatapakan gasan-Sidin, rela mananggung salib wan mangabaiakan kahinaaan salib itu, Wan, wayahini, Sidin duduk disabalah kanan takhta Allah, ³ Ingat haja wan Yesus, nang tabah mahadapi parmusuhan matan urang-urang nang badosa sampai jiwa ikam kada manjadi uyuh wan putus asa. Allah itu Nangkaya Saurang Abah ⁴ Dalam parjuangan ikam malawan dosa, ikam balum sampai manumpahakan darah ikam. ⁵ Wan, apakah ikam udah kada ingat nasihat nang dibariakan wan ikam sabagai anak-anak? "Hai anakku, jangan maanggap enteng didikan Tuhan, wan jangan marasa halus hati pabial ikam ditagur-Sidin. ⁶ Sabab, Tuhan mahajar urang nang disayangi-Sidin, wan mancambuk urang nang ditarima-Sidin manjadi anak."Amsal 3:11-12 ⁷ Ikam harus batahan wan didikan itu lantaran nangitu baarti Allah rahat maanggap ikam sabagai anak-Sidin; lagi jua anak apa garang nang kada suah dididik uleh abahnya? ⁸ Amun kada suah manarima didikan nang saharusnya ditarima uleh samuaan anak, ikam pasti anak haram, kada anak nang sah. ⁹ Salin itu, kita baisi abah-abah di dunia ini nang mandidik kita, wan nang kita hurmati; amun kayaitu, kadakah kita harus labih lagi manundukakan diri wan Bapa atas sabarataan roh wan atas hidup? ¹⁰ Sabab, amun abah kita nang ada didunia ini mahajar kita intang waktu nang satumat nangkaya cara nang buhannya anggap paling baik; Abah nang ada di surag mahajar kita gasan kabaikan kita sorangan sahingga kita baisi bagian intang kakudusan-Sidin. ¹¹ Samua didikan, rahat dibariaakan, memang kada manyamani wan manyakitakan. Akan tatapi, imbah itu pacangan mahasilakan buah kabenaran nang mambari damai gasan buhannya nang imbah dilatih uleh didikan itu. Parhatiakan Cara Hidup ikam ¹² Sabab itu, taguhakan tangan nang lamah wan lintuhut ikam jangan lamah, ¹³ Ulahakan jalan nang lurus gasan batis ikam sahingga batis ikam kada lamas sampai lumpuh, tatapi diwarasakan. ¹⁴ Lakasi badamai lawan sabarataan urang, wan bausaha hidup suci sabab mun kada suci, kada pacangan kawa malihat Tuhan. ¹⁵ Pastiakan supaya jangan ada saikung gin mamg kahilangan anugerah Allah; pastiakan jua jangan ada nang sagkal imbah itu manimbulakan masalah balalu maulah pusang urang banyak. ¹⁶ Wan, pastiakanlah jua supaya jangan ada urang nang baulahcabul atawa kada suci nangkaya Esau nang manjual hak kasulungan gasan samangkuk makanan. ¹⁷ Sabab ikam sorang tahu bahwa imbah itu, pas Esau mahandaki warisan barakat itu, inya kada kawa manarima wan kadada lagi kasampatan gasan batubat biar inya mancari sampai manangis. ¹⁸ Sabab ikam kada datang ka gunung nang kawa dijapai, ka api nang nyarak, atawa ka wadah nang kadap, wan badai. ¹⁹ Ikam gin kada datang wan suara tarumpet, wan suara nang panderannya maulah buhan nang mandangar mamuhun banar supaya panderan itu kada diucapakan lagi wan buhannya. ²⁰ Sabab buhannya kada kawa batahan mandangar parintah nang dibariakan, "Biar saikung binatang nang manjapai gunung itu, maka binatang itu harus ditawaki pakai batu sampaimati." ²¹ Wan, dasar mangeriakan amun malhat kajadian itu, sampai-samapi Musa gin baucap, "Aku manggitir takutan." ²² Tatapi, ikam udah mandatangi Gunung Sion, wan ka kota Allah nang hidup, Yerusalem surgawi, wan gasan malaikat nang kada tahitung jumlahnya, ²³ ikam imbah datang ka parkumpulan nang hibak jamaat nang badiri mulai kakanakan pinuhanya Allah nang imbah tadaftar di surga, wan Allah, Hakim atsa sabarataan urang, wan gasan roh urang-urang benar nang sudah disampurnaakan. ²⁴ Ikam imbah datang wan Yesus, Parantara Parjajian nang hanyar, wan gasan darah nang disimburakan, nang bapander labih pada darah Habel. ²⁵ Pastiakan haja supaya ikam jangan manulak Sidin nang bapander. Lantaran amun buhannya nang manulak Sidin nang maingatakan matan bumi haja kada kawa malapasakan diri, maginnya kita cagar kada kawa jua malapasakan diri matan Sidin nang maingatakan matan surga. ²⁶ Dahulu, suara Sidin mangguncangakan bumi, tatapi wayahini Sidin bajanji, "Amun, sakali lagi Aku kada hinggan mangguncangakan bumi, tatapi surga jua." ²⁷ Ungkapan "sakali lagi" manunjukakan masalah pamusnahan hal-hal nang kada kawa diguncangakan, yaitu sabarataan nang sudah diciptaakan, supaya hal-hal nang kada diguncangakan kawa tatap batahn. ²⁸ Lantaran itu, imbah kita manarima karajaan nang kada taguncangi, hayu kita manampaiakan rasa syukur lawan mamparsambahakan ibadah nang layak wan Allah, nang diiringi rasa hurmat wan rasa kagum, ²⁹ sabab Allah kita adalah api nang mahangusakan.