Iman ¹ Iman adalah jaminan gasan sabarataan nang kita harapakan, wan gasan bukti sabarataan nang kada kalihatan. ² Sabab, uleh iman urang bahari kolehan pujian. ³ Uleh iman, kita paham bahwa alam samesta diulah mamakai firman Allah. Jadi, apa nang kalihatan kada taulah uleh apa nang kalihatan jua. ⁴ Uleh iman, Habel mamparsambahakan gasan Allah kurban nang labih baik matan nang diparsambahakan Kain. Malalui parsambahan itu, Habel baisi cuntuh nang baik matan Allah manjadi urang nang bujur; Allah mambariakan cuntuh taladan itu balalu manarima kurban parsambahan inya. Wan, uleh iman inya, biar inya udah mati;Habel masih kawa bapander. ⁵ Uleh iman, Henokh diangkat supaya inya kada usah marasai kayaapa rasanya mati wan inya kada kawa dicari lantaran Tuhan imbah maangakat inya;lantaran sabalum diangkat inya manjadi cuntuh urang nang mahimungi Allah. ⁶ Kada mungkin urang kawa mahimungi Allah mun kada uleh iman, sabab siapa haja nang parak wan Allah harus parcaya bahwa Allah ada, wan bahwa Allah mambari pahala gasan buhannya nang mancari Sidin. ⁷ Uleh iman, imbah diparingatakan uleh Allah masalah paristiwa nang balum inya lihat, Nuh takutan wan maasi maulah sabuah bahtera gasan manyalamatakan kaluarganya. Lawan itu, Nuh mahukum dunia wan manjadi pawaris kebenaran nang sasuai wan imam inya. ⁸ Uleh iman, Abraham pas dikiyau Tuhan, maasi balalu tulak ka wadah nang pacangan dibariakan sabagai pusaka inya. Wan, inya tulak, biar kada tahu ka mana inya cagar tulak. ⁹ Uleh iman, inya tulak balalu badiam intang tanah urang, yaitu di intang kemah lawan Ishak wan Yakub; buhan ahli waris matan janji nang sama, ¹⁰ sabab Abraham rahat mahadangi kota nang baisi pondasi, nang parancang wan nang mambangunnya adalah Allah. ¹¹ Uleh iman, Sara kulehan kakuatan rahat batianan wan malahirakan anak, biar inya mandul wan sudah tuha gasan malahirakan, sabab Sara maanggap Sidin nang sudah bajanji gasan inya adalah satia. ¹² Lantaran itulah, matan satu urang nang sudah tuha banar wan hampir mati, lahirlah katurunan nang banyaknya kaya bintang di langit wan nang jumalahnya kada kahitungan nangkaya pasir di pantai. ¹³ Buhannya sabarataan sudah mati dalam iman lawan kada kulehan apa nang dijanjiakan, tatapi buhannya mamandang wan manyambut janji-janji itu matan jauh, wan sudah paham bahwa buhannya adalah buhan pendatang wan urang asing di bumi. ¹⁴ Panderan buhannya nangkaya itu manunjukakan wan jalas bahwa buahnnya rahat mancari tanah banyu gasan buhannya. ¹⁵ Lantaran, amun nang buhannya pikirakan adalah nageri nang buhannya tinggalakan sabalumnya, maka buhannya kawa haja babulik lagi ka sana. ¹⁶ Tatapi, buhannya mahandaki suatu nageri nang labih baik, yaitu negeri surgawi. Uleh lantaran itulah, Allah kada supan di kiyau sabagai Allah buhannya sabab Sidin sudah manyadiakan sabuah kota gasan buhannya. ¹⁷ Uleh iman, rahat Tuhan mangujinya, Abraham manyarahakan Ishak sabagai kurban; inya nang sudah manarima janji-janji itu rela mamparsambahakan anak tunggal inya. ¹⁸ Masalah anak itu, Allah suah bapander, "Wan ngaran Ishaklah katurunan ikam pacangan dikiyau." ¹⁹ Abraham manaruh parcaya inya wan Allah, bahkan inya parcaya bahwa sanggup mambangkitakan urang mati. Ibaratnya, Abraham imbah kulehan Ishak babulik matan kamatian. ²⁰ Uleh iman, Ishak mambarkahi masa depan Yakub wan Esau. ²¹ Uleh iman, Yakub, pas parak inya mati, mambarakahi anak-anak Yusuf. Inya manyambah Allah balalu basandar wan kapala tungkat inya. ²² Uleh iman, Yusuf, pada akhir hidup inya, bapander masalah kaluarnya bangsa Israel matan Mesir wan mambari parintah sahubungan wan tulang-tulang inya. ²³ Uleh iman, Musa, pas lahir, disambunyiaakan salawas talu bulan uleh kuitannya. Buhannya malihat bahwa Musa adalah bayi nang manis banar, wan buhannya kada takutan wan parintah raja. ²⁴ Uleh iman, Musa, imbah baganal inya dewasa, manulak dikiyau anak matan putri Firaun. ²⁵ Inya labih mamilih mandarita lawan umat Allah dari pada manikmati kasanangan dosa nang hinggan samantara haja, ²⁶ Inya maanggap bahwa kahinaan Kristus labih baharga daripada saluruh kakayaan Mesir sabab Musa mamandang ka pahala nang cagar ditarima kena. ²⁷ Uleh iman, Musa maninggalakan Mesir wan kada marasa takutan lawan murka Raja Firaun saulah-ulah inya kawa malihat Sidin nang kada kalihatan itu. ²⁸ Uleh iman, Musa malaksanaakan Paskah wan manyimburakan darah sahingga malaikat maut kada mandatangi bangsa Israel. ²⁹ Uleh iman, bangsa Israel bajalan manyabarangi Laut Habang, saulah-ulah bajalan di tanah karing. Tatapi pas rahat urang Mesir mancuba maumpati, buhannya tinggalam. ³⁰ Uleh iman, timbuk Yerikho runtuh imbah dikalilingi salawas tujuh hari. ³¹ Uleh iman, Rahab, lahung itu, kada dibunuh taimbai wan urang-urang nang kada maasi lantaran inya wan sanang manarima mata-mata Israel. ³² Wan, apa lagi nang harus kupadahakan? Aku kada baisi cukup waktu mangesahakan wan ikam tentang Gideon, Barak, Simson, Yefta, Daud, Samuel, wan buhan nabi, ³³ nang uleh iman imbah mangalahakan karajaan-karajaan, maulah kebenaran, mandapatakan janji-janji, wan mangatupakan mulut singa-singa, ³⁴ mamadamakan kobaran api, talapas matan mandau, dikuatakan matan kalamahan buhannya, gagah parkasa intang patampuran, wan manghalau bala tantara asing. ³⁵ Buhan babinian manarima pulang urang-urang mati malalui kabangkitan, tatapi ada jua nang dianiaya wan manulak manarima pambibasan supaya buhannya kawa mandapatakan kabangkita dalam kahidupan nang labih baik. ³⁶ Samantara itu, ada jua nang dihina wan dicambuk, bahkan dibalenggu wan dipanjaraakan. ³⁷ Buhannya dirajam, digaragaji balah dua, wan dibunuh lawan mandau. Ada jua nang mangambara mamakai baju matan kulit domba atawa kulit kambing; buhannya miskin banar, ditindas, wan diparlakuakan samena-mena. ³⁸ Dunia ini kada pantas gasan buhannya, buhannya mangambara di padang gurun wan gunung-gunung, tinggal di halat gunung wan gua-guan dibawah tanah. ³⁹ Biar buhannya baisi cuntuh nang baik lantaran iman buhannya, buhannya kada manarima apa nang dijanjiakan. ⁴⁰ Sabab, Allah manyadiaakan sasuatu nang labih baik gasan kita, sahingga mun kadada kita, buhannya kada pacangan manjadi sampurna.