¹ वल्हांडण सणा आगलोज येशुय होमजी लेदो का तियाल आमी इ दुन्या सोडीन पोरमेहेरा बाहका कोअ जावनु टेम आवी गियोहो. ² ताहा वाअती वेल मांडो खावनु टेमावे काल्या पुतांय शीमोना पोयरो यहुदा इस्कार्योता मोनाम येशुल दुश्मनाल आथाम तिई देवुनु विचार पोय देदो. ³ येशुय इ मालुम आथो, परमेहेरा बाहाकाय बांदोज तिया आथाम देदलो, ओन तो पोरमेहे बाहाकयाने आललो आथेा आन तो पोरमेहेर बाहेकाही जाहलेा . ⁴ येशु मांडो खाहलो तिहीने उठीन तियांय फांगलो पोतडो काडी थोव्यो आने रुबाल लीन कंबराल बांद्यो. ⁵ आन येशुय बासनाम पांअय लिन चेलाहा पाग तुव्या आन कंबराल बांदला रुबलाकी तियाहा पाग नुसा लाग्यो. ⁶ जाहा येशु शिमोन पेतराही आलो ताहा पेतर तियाल फुचेहे, “प्रभु, तु मा पाग तोवहो का ?” ⁷ ताह येशुय आख्यो, “आमी आय काय किहु तो तुल नाय होमजानारो, पेन फाचे होमजाय.” ⁸ पेतर तियाल आखेहे, “मा पाग तु किदिहीज तोवोहो मा.” ताह येशुय तियाल आख्यो, “मायुय तो पाग नाय तोव्या ता, तुल मा आरी वाटो नाहा हाय.” ⁹ ताहा शिमोन पेतर येशुल आखेहे, “प्रभु, मा पागुज नाहा पेन आथ आन मुनको बी तोवी दे.” ¹⁰ येशुय तियाल आख्यो, “जो उगलो हाय तिया फोक्त पाग तुवनुज गोरज हाय.” (पागालुज माहार घाण लागी जाहे) काहाका तो चोखो हाय तुमा आत्माकी चोखा हाय पेन बादाज आत्मीक चोखा नाहा. ¹¹ तियाल केउो ती दी इ येशूल मालु आथो. तिया खातोर चोखा नाहा एहकी येशुय आख्यो. ¹² जाहा तो पाग तोवी पारवाये ताहा, तियाय पोतळे पोव्ये आन जागाप आलो आन फुचा लाग्यो, “मायुय इ काय केअयो तो तुमाहान होमजायो का ?” ¹³ तुमा मान गुरुजी आन प्रभु आखताहा इ हारो आखताहा काहाका आय तोज हाय. ¹⁴ पेन आय जो प्रभु ओन गुरु हाय ते बी मायुय तुमा पाग तुव्या तेहकीज तुमा बी एकबिहीरा पाग तो वा जोजे. ¹⁵ जेहेंकी मायुय केअयो तेहकी तेमा बी केरा जोजे, तियहाल मायुय इ देखाव्योहो. ¹⁶ आय तुमाहान खेरोज आखुहू आवत्यो तोनारासे माेठो नाहा रेतो आन मोकलुलो माहू मोकलुनारासे मोडो नाहा रेतो. ¹⁷ ए गोठ्या तुमा हेमजुताहा आने तुमाहाय जर एहेंकीज केअयो ता तुमा आशिर्वादीत हाय. ¹⁸ माय तुमाहामेने बाठ्ठा केता गोगतो नाहा मायुय जियाहान निवड्याहा तियाहान माय ओखुहू. तेबी जियाहाय मा आरी मांडो खादलो तीयाय मा उचे लात उसल्यो इ शास्त्रलेखाम लिखलो हाय आन इ पुरा वेरा जोजे. ¹⁹ इ वेअनु आगलोज आय तुमाहान आखी थेावुहू, इया खातोर का जाहा इ वेरी ताहा तुमाहाय भोरुसो थोवा जोजे का आय मसिह ख्रिस्त हाय. ²⁰ आय तुमाहान खेरोज खेरोज आखुहू आय जियाल मोकलेहे तियाल जो केडो बी मानी ली तो मान मनी ली आने जो कडो मान मानि ली तो माज माेकलुनाराल मानी ली. ²¹ एहकी गोगीन येशु मोनाम दुखी वी गियो आन साक्षी दा लाग्यो, “आय तुमाहान खेरोज खेरोज आखुहू तुमाहामेने एक जा मान दुश्मना आथाम तिई दी.” ²² ता येशु केडाल आखेहे इ होमजा केअता बाद्दा चेला एकबिहीरा वेला वेरा लाग्या. ²³ चेलाहामेने ए जां येशु जियवे मोया केअतलो तो येशुय हेकीन हुदिवेल जो मान पाना जागो हाय तिही बोठलो आथो. ²⁴ ताह शिमोन पेतरांय तियाल ठाकोज इसारो किईन आख्यो, “येशु केडोल ऐहकी आखेहे तो केडो हाय इ फुच.” ²⁵ तो चेलो येशु पाही आवीन तिया सातील टेकीन तियाल फुच्यो, “प्रभु, तो केडो हाय ?” ²⁶ येशुय आख्यो, “आय जियाल मांडा कुटको रोहाम पिजवीन खा देहे, तोज जो हाय. फाचे तियाय मांडा कुटको रोहाम पिजवीन शिमोन पोयरो येहुदा इस्कार्योत याल देदो. ²⁷ तियाय मांडा कुटको लेताज काल्यो पुथ तिया मोनाम विही गीयो ताहा येशुय तियाल आख्यो, “तुल जो केअनु हाय तो माहार के” ²⁸ पेन येशुय एहकी काह आख्यो, इ जे जे मांडो खा बोठले तियायहामेने केडालुज होमजायो नाहा. ²⁹ यहुदावेज पोयसा रेतला तियाहाल बिहीरान लाग्यो का येशु तियाल सणा मांडा केअता जो जोजी तो लावा खातोर नायता गरीबाहान थेाडक पोयसा दा खातोर आखेहे. ³⁰ आन यहुदा मांडो लेतांज बारे निगी गियो, ताहा रात आथी. ³¹ तो जातांज येशुय आख्यो, “आमी मा नाव उचो बि गियो. मा महिमा वेअयी आन मामेने पोरमेहेर बाहका महिमा वेअयी ही. ³² आन जर आय तिया नाव रंचो केहेता माहारुज पोरमेहेर मान बी मा महिमाम ली आवी. ³³ मा पोयराहाय आजी आय थोडीक वाअ तुमा आरी हाय फाचे तुमा माने होदाहा जेहकी मायु यहुदी लोकाहान आख्यो तेहकी तुमहान बी आखुहू जिही आय जाहू तिही तुमहान आवानारो नाहा. ³⁴ आय तुमाहान नावी आज्ञा हीकवु तुमा एक बिहीरावे मोया केअजा जेहकी मायुय तुमाहवे मोया केअयी तेहेंकीज तुमाबी एकबिहिरावे मोया केअजेा ³⁵ तुमा एक बिहिरावे मोया री ताहांज बादा लोक तुमाहांन ओअखी का तुमा मा चेला हाय” ³⁶ शिमोन पेतराय येशुल फुच्यो, “प्रभु, तु काहि जा हाय?” येशुय आख्यो, “आय जिही जाहु आमी तो की आवानारो नाहा, पेन फाचे तु मा फाचाडी आवोहो.” ³⁷ पेतराय येशुल आख्यो, “मा की आमीज तो फाचाडी काहाल आवानारो नाहा ? आय तो खातोर मोरा बी तियार हाय.” ³⁸ ताहा येशुय आख्यो, “तु खेरोज तो जीव मा खातोर दीहो ? पेन आय खेरोज आखुहू तु मान तीन दाव नाकारी दिहो तांव लुगू हाकाल चुनख्यो कुकडो वाहनारोज नाय.”