अध्याय 12
1
फासे येशु वल्हांडणा सणा साहावाे दिहा बेथानी गावुम आलो, येशुय जियाल मोलामेने जिवतो केलो लाजर बी तीही आथो.
2
आन तिही तियाह येशु वाटो बाती तेला मांडो तियार केयो आने मारथा गोवारा सेवा चाकरी केतली लाजर तिया आरी मांडो खा बोठलो.
3
ताहा मरीया आरदो किलो जटामांयी खुब मोगो वासवालो ते ली आली आने येशू पागाल लागव्यो. आने तीयु चोट्याकी येशु पाग नुस्या, आने तेलु वासु की कोवेा गुंदाय उठ्यो.
4
पेन येशु चेलामेने शिमोन इस्कार्योता पोयरो यहुदो जो येशुल दुश्मनाहा आथाम ती देनारो तो फुचा लाग्यो.
5
‘ई वासवालो तेल तीनशो चांदी पोयसा वेचीन ते गरीबान का देदो नाहा.’
6
यहुदो गरीबा हा विचार नाय केतलो पेन तो बांड आथो तियाल तो एहकी आखतलो आने पाेयसाहा खोतली तियापुज रेतली ती खोतलीम जो दान टाकतले तो दान तो चौई लेतलो तिया खातोर तो एहकी आखतलो.
7
ताहा येशुय आख्यो, “मरीयाल तेलाखातोर काविज मा आखो मान तोरतीम डाटी तिया दिहा खातोर इ तेल तियुय थोवी देदलो.
8
गरीब सादाज तुमा आरी रेनारा आने पोटे ताहा तिया मदत की सकता पेन आय सादा तुमा आरी रेनारो नाहा.
9
येशु तिही हाय एहकी यहुद लाेकाहान मालुम पोड्यो ताहा ते लोक येशुय ओताज नाहा पेन जियाल येशुय माेलामेने जिवतो केलो तिया लाजराल वेरा खातोर आलला आथा.
10
ताहा मोउा याजकाय लाजराल माय टाकुला विचार केयो.
11
काहाका तिया खुबूज लोक याजकाहा उनानु सोडीन येशुय जाहला येशुपे भोरुसो थोवताेला.
12
बिहीरे दिही सणाम आलला लोकाहाज येशु यरुशलेमाम आवेहे ऐहकी मालुम पोडताज.
13
ते लोक येशुल मिला मान पान दा खातोर खजुरी डाहाग्या लिन मिला गिये आने, होस्साना प्रभु नावा की आवनारो इस्राईला राजो धन्यवादीत असो एहकी आखा लागे.
14
ताहा येशु एक फुरक्या पिलकाप बोठो.
15
ओ सिायोना पोयरी बीयो मा वे तो राजो फुरक्याप बोहीन आवेहे, शास्त्रालेखा प्रमाणे ई वेयो.
16
ए गोठ्या वेया ताहा चेलान कावीज होमजायो ताहा पेन येशु मोईन फाचे जिवतो उठीन होरगाम चोड्यो ताहा चेलाहान होमजायो का ए गोठ्या शास्त्राम लेखल्या आथ्या ऐहकीज आमी वेयो.
17
ताहा लाजराल कबरी मेने हादकीन मोलामेने उठव्यो ताहा जे लोक आथा जीयाय ते वेयो ते येशू बाेदल साक्ष दा लाग्या.
18
येशुय ओ चमत्कार केयो इ उनाईन खुबूज लोक येशुय मिला आले.
19
ताहा परुशी लोक एक बिहिराल आखा लाग्या, ‘आपु कावीज चालनारेा नाहा इ होमजी ल्या आने वेरा इुनीयातेने आखा लोक येशु फाचला चाल्या.
20
जे माहे सणाम भक्ती केरा आलले तियामेने आरदा लोक ग्रीक आथा.
21
तियाहाम येशु चेलो फिलीप्प जो गालील देशा बंथसैदा गावामेने आथो तियाय आख्यो माहाराज आमा येशुल मिला हाय.
22
फिलीप्पाय आवीन आद्रियाल आख्यो, आंद्रिया आने फिलीप्पय आवी येशुल आख्यो .
23
येशुय तीयान आख्यो मा महिमा वेनु टेम आवी गीयो हो.
24
माय तुमान खेरो खेरो आखुहू गोवा दानो तोरतीम पोडीन मोअयो ताहा एखलोज रेहे आने मोयो ता जिवतो वेहे ताहा खुबूज पीक देहे.
25
जो केडो माहु आपु जीवाव प्रेम केहे तो तियाल जीव गोमावी ओन जो इया दुनीयाम सोवताहा जीव सोंबालेहे तो सार्वकालीक जीवन सांबाली थोवी.
26
जो केडो मा सेवा केहे तो मा फाचाउाी आवा जोजे ताहा जिही हाय तिही मा सेवक बी री जो केडो मा सेवा केहे. तियाल मा बाहको मान पान दी.
27
आमी मा जीव खुब दु:खी वी गियोहो, आय काय गोगू, ओ मो बाहका मान जो वेअनारो हाय तियामेने मान वाचाव ऐहकी का पेन आय इया खातोरुज आलोहो.
28
ओ बाहका तो तावा महीमा के ताहा जुगामेने आवाज आलो मायुय तिया महिमा केयीही फाचे बी तिया महिमा केहे.
29
ताहा जे मोहे तिही उनातले ते आखा लाग्या बादलाम गाजी उठ्यो बिहिरे आखा लाग्ये देवदुत तिया आरी गोग्यो.
30
येशुल लोकाहान आख्यो, “ओ आवाज तुमा खातोर आथो, मा खातोर नाहा.”
31
इया इुनीया लोका न्याय वेनु टेम आवी गीयोहो इया इुनीया राजो बारे टाकाय जाय.
32
आने जाहा आय ताेरतीवेने फासे उठावाज जाहे ताहा काय आखा माहान माय इही खेची लेहे.
33
येशु केहकी मोनारो हाय तो होजाया केअता तो एहकी तीयाय आख्येहे.
34
तिया खातोर लोकाय येशुय फुच्यो, “ख्रिस्त कायमुज री एहकी आमा पवित्र शास्त्रामेने उनायाहा ता माहा पोयरो मोरा जोजे एहकी काहाल आखतोहो, ओ माहा पोयरो केडो हाय ?”
35
ताहा येशुय तियान आख्यो, “आमी थोडाक टेमालुज मा उजवाडो तुमा आरी हाय जावलुग तुमाहाम मा उजवाडो हाय तावलुग तुमा उजवाडाम चाला आंदाराम तुमा गाठनारा नाहा, पेन जो आंदाराम जाहे तियाल आपु काही जाता ते होमजातेा नाहा.
36
तुमा उजवाडा पोयरे वेरा जोजे तियाल तुमाही उजवाडो हाय तावुज उजवाडावे भोरुसो थोवा.” येशु ए गोग्यो आने तिहीने निगी गियाे, आने फासे तियाहान देखायो नाहा.
37
येशुय यहुदी लोकाहम ओता चमत्कार केया तेबी तियाहामेने खुब लोकाहाय येशुपे भोरुसो थोवो नाहा.
38
इया खातोर का यशया भविष्यवाने वचन पुरो वेरा जोजे तो एहकी ओ प्रभु आमा आरी गोठीपे केडाय भोरुसो थोव्योहो परमेश्वरा गोती केडाल मिलली हाय.
39
तीयाल तियान भोरुसो थोवता आलो नाहा.
40
तियाय डोवाकी वेरा नाय जोजे आन मोनाकी होमजा नाय जोजे आने मा वेला नाय वोला जोजे आने आय तियाहा हारो केरा नाय जोजे तिया खातोर तियाहा डोवा आंदला केयाहा आने मोने कठीन केअलो हाय.
41
यशयाय येशु परमेश्वरा महीमा वेई तियालुज तियाय एहकी आख्यो.
42
पेन बिहीरा खुब पुढाऱ्याहाय येशुपे भोरुसो थोव्यो तेबी परुशी लो कतियाहान प्रार्थना कोमेने बारे काडीदी इया धाकुकी लोकाहा हुबूर तियाय कबूल केया नाहा.
43
काहाका तियान परमेश्वरा मान पान खुबूज हारो लागतलो.
44
फासे येशुय खुबूज आख्यो जो मापे भोरुसो थेावेहे तो मावेज भोरुसो थोहे एहकी नाहा पेन जियाय मान मोकल्यो हो तियावे भोरुसो थोवेहे.
45
आने जो मान वेहे तो जीयाय मान मोकल्योहो तियाल वेनु सारखोज हाय.”
46
आय उजवाडो उबजीन दुनीयाम आललो हाय इया खातोर का जो केउो मावे भोरुसो थोवेहे तो आत्मीक आदाराम रा नाय जो जे.
47
आन जो केडो मा वचने उनाईन वोलतो नाहा तिया आय न्याय केअतो नाहा काहाका आय दुनीया न्याय केरा नाय पेन दुनीया तारण केरा आललो हाय.
48
पेन जो केउो मन नाकारी देहे आन मायुय जो वचन आख्यो तियाल बी नाकारी देहे तिया न्याय जो वचन माय आख्यो तियाज वचनाकी वेरी.
49
आय मा सोताहा अधिकारा की गोगतो नाहा पेन जी परमेश्वरा बाहाकाय मान मोकल्याहो तियाय जो मान होपलो तोज आय गोगुहू.
50
तीया आशा सार्वकालिक जीवन हाय जो मान मालुम हाय तीयाल जो काय माय आखु तो परमेश्वराय मान आखलो हाय तीया होसुज आय तुमान आखुहू.