¹ Dra nasehinigny azely anahy gny oninigny ranony fiegna, malio manahaky gny kristaly. Izay dra mikoria boaky agny amigny seza fiandriagnan'Agnahary vo gny zanak'agnondry ² mamakivaky eo agnevonigny lalanigny tanà. Dra gny andagniny ro amigny ony dra samby misy gny hazonigny fiegna, mamoa karaza voa ro ambiny folo, vo izay dra mamoa gny tegnany isam-bola. Gny ravin'izay hazo zay dra natao hagnasitrany gny firenena aby. ³ Dra sy hisy sasy gny voahozo. Gny seza fiandrianan'Agnahary vo gny zanak'agnondry dra ho ao amigny tanà, dra reo panopony dra hanopo anazy. ⁴ Hahita gny Endriny ereo, dra gny agnarany dra ho eo amigny handrin'ereo. ⁵ Dra sy hisy hariva sasy; ereo dra sy mitalia fahazavan'gny ziro na gny masoandro sasy gny Topo Zagnahary gny hazava eo amin'ereo. Dra hazaka mandrakizay doria ereo. ⁶ Hoy gny azely taminahy: "Ty zaka tahoky dra azo atokisa vo mary. Gny Topo, gny Zagnaharin'ireo fagnahin'ireo paminany, dra nandefa gny azeliny ba hapiseho ze raha sy maisy hitranga sy ho ela amireo panopony." ⁷ Ingo! fa mariny gny fihaviako! Sambasy ze makato reo zakanigny faminania amity boky tihoky." ⁸ Izaho, Jaona, gny raiky ze nahare vo nahita reo raha reo.Gny fa nahare vo nahita anizay zaho, dra nekohoky teo amigny tombokigny azely gny vatako ba hidera anazy, gny azely ze napiseho anahy reo raha reo. ⁹ Hoy izy taminahy: "Ka manao anizay! Fa panopo namanao miaraky aminao zaho, miaraky amireo paminany rahalahinao, dra miaraky amireo ze makato reo zakanity boky tihoky. Midera an'Agnahary!" ¹⁰ Hoy izy taminahy: "Ka asia tombo-kase reo zakanigny faminania amity boky tihoky, fa atomosy gny fotoa. ¹¹ Ze manao gny sy mary, angao izy hanohy gny sy fahamarigna. Ze maloto fiegna. Ze mary, angao izy hanohy gny fanova gny mary. Ze masy, angao izy hanohy gny fahamasigna." ¹² "Ingo! fa mariny gny fihaviako. Gny valisoako dra miaraky aminahy, ba hamaliako gny sirairay araky gny raha-vitany. ¹³ Izaho gny Alfa vo i Omega, gny volohany vo gny farany, gny fiandoha vo gny fiafara. ¹⁴ Sambasy reo ze manasa gny akazon'ereo ba hahazo alala mihina boaky amigny hazonigny fiegna vo hilisy ao amigny tanà boaky eo amigny vavahady. (Fagnamaria: Raha tokony: "Sambasy reo ze manasa gny akazon'ereo." Reo atota-taratasy hafa taloha dra mivaky ho: "Sambasy reo ze manao gny liliny.") ¹⁵ Fa agny ivelany reo amboa, reo panao oly, reo pizangazanga, reo pamono olo, reo panopo sapy, dra ze tia mavandy aby ¹⁶ Izaho, Jesosy, dra nandefa gny azeliko ba hitalily amindrareo gny raha ho anireo fengo. Izaho gny vahany vo taranak'i Davida, gny kita mamirapirasy maray." ¹⁷ Gny Fagnahy vo gny Ampakary manao anizaohoky ho: "Avia!" Aoka ze mahare hizaka ho: "Avia!" Na iza na iza mangetaheta, aoka izy hahazo maimai-poa gny ranonigny fiegna. ¹⁸ Izaho dra mitalily amize mahare gny zakanigny faminania amin'ity boky tihoky aby: "Raha misy magnapy reo, Zagnahary hagnapy loza ho anazy ze voasorasy ao amin'ity boky tihoky. ¹⁹ Raha misy mangalaky gny zaka faminania amin'ity boky tihoky, Zagnahary dra hangalaky gny azarany amigny hazonigny fiegna vo gny tana masy ze voasorasy ao agnatin'ity boky tihoky." (fagnamariha: Gny atota-taratasy taloha dra miavaky ho: "Zagnahary hangalaky gny azarany ao amigny Bokinigny fiegna vo ao amigny tana masy ze voasorasy ao amity boky tihoky.") ²⁰ Hoy gny raiky ze mizaka reo raha reo: "Eh! Fa mariny gny fihaviako." Amena! Mevia, ry Topo Jesosy! ²¹ Ho amigny olon'aby anie gny fahasoavanigny Topo Jesosy. Amena.