¹ Tahoky dra bo ohabolan'i Solomona avo, ze nadikan'i Lelahin'i Hezekia, pazakan'i Joda. ² Voninahis'Agnahary gny magnavony raha, fa gny mitalia ze gny voninahisy gny pazaka. ³ Manahaky gny maha-anigny abo gny lagnisy vo gny maha-anigny laliky gny tany, gny maha-sy takasy gny say gny fon'ireo pazaka. ⁴ Alao aminigny volafosy gny taim-bolafosy dra afaky hapiasa gny volafosy aminigny asa tagnany gny panao sa aminigny vy. ⁵ Dra manahaky anizay koa, alao eo aminigny fanatrehanigny pazaka gny olo rasy fagnahy dra hatoby aminigny fanova ze mary gny seza fiandrianany. ⁶ Ka magnome voninahisy gny vatanao eo aminigny fagnatrehany pazaka dra ka misanga amigny toera voatendry ho anigny olon'agnabo. ⁷ soa vatany raha mizaka aminao izy ho: "Mekara etiky," noho gny hangalany baraka anao eo agnatrehanigny olo-mana-kaza raiky. ⁸ Ka andesy malaky agny aminigny fisara, ze natrehiny gny fa manao ze ahagnasy anao gny piara manin'aminao aminigny farany? ⁹ Ialio havisy eo amasonao vo gny piara manin'aminao vao gny raharahanao dra ka mamoaky gny sembaratelonigny hafa, ¹⁰ raha sy zay dra hitariky fahamegnaran'aminao vo tatisy rasy momba anao gny nahare anao dra sy ho laisy mapanginy. ¹¹ Gny poma volamena eo aminigny pisy volafosy dra zaka nizaka taminigny fotoa mety. ¹² Gny perasy volamena na firavaky natao taminigny volamena soa indrindra dra anasy hendry ho anigny sofy miteno. ¹³ Gny iraky matoky dra manahaky gny hasiaky gny ora-panala aminigny fotoa-piziza ho an'ireo ze magniraky anazy; mapihery gny ain'ireo topony izy. ¹⁴ Raho vo gny rivosy sy misy ora ze mirehareha aminigny fagnomeza ze sy nameny. ¹⁵ Ami-pahareta gny ahafaha mandresy lahasy gny panapaky dra gny lela malefaky dra mety hanapaky tola. ¹⁶ Raha mahita tately hanao, dra ze apy avo gny hany__raha sy zay, dra hapandoa anao, gny fihinana maro loasy anizay. ¹⁷ Ka apidira matetiky loasy ao atragnonigny namanao gny tombokao, mety ho esak'anao izy dra halaik'anao. ¹⁸ Gny olo ze mizoro vavolombelo sy mary momba gny namany dra manahaky gny langilangy, na mesa, na zana-sipiky maragnisy apiasan'amigny aly. ¹⁹ Gny olo sy matoky ze itokianao aminigny fotoanigny fahoria dra manahaky gny nify rasy na tomboky mibolisasy. ²⁰ Manahaky gny olo raiky ze magnalaky gny akazony aminigny andro mangasiaky, na manahaky gny vinaingisy nararaky teo agnabonigny sirahazo ze mikalo hira ho anigny fo mavesasy. ²¹ Raha resy gny fahavalonao, dra omeo sakafo hohany izy, dra raha mangetaheta izy dra omeo rano ho nomy, ²² fa hanambasy vain'afo eo aminigny lohany hanao dra hamaly soa anao i Yaveh. ²³ Manahaky gny hindesanigny rivosy avarasy ora vatany, dra hamandriky gny endriky ho ory gny lela ze mizaka sembaratelo. ²⁴ Soa vatany gny mitoby eo aminigny zoronigny tafo-tragno noho gny ao aminigny tragno ze hiraisana aminigny valy pialy lava. ²⁵ Manahaky gny rano mangasiaky ho an'ize mangetaheta, gny vaovao mahafaly boak'agny aminigny firenena lavisy. ²⁶ Manahaky gny loharano voahososy vo fasaka rava gny olo-mary mikoy eo agnatrehanigny olo rasy fagnahy. ²⁷ Sy soa gny mihiny tately maro loasy; manahaky gny ho mitalia voninahisy miapy voninahisy zay. ²⁸ Gny olo sy mana fahafeheza-tegna dra manahaky gny tana rava vo sy misy manda.