¹ Aby mipetraky hihina miaraky amigny panapaky ianao dra diniho soa izay eo anoloanao, ² Ary ambano antsy gny vozonao raha olo tia mihinakany be loasy hanao. ³ Ka misiry loasy gny hanim-piny, fa haninigny vandyizany. ⁴ Ka dre miasa mafy loasy hahazoa harena; hendre soa hahafataranao gny fotoa hisahara. ⁵ Hagnenga gny masonao hirehisy amizay ra hanao? Ho dify zay, fa ho hari-elasy manahaky gny voromahery tokoa zay dra hitilin'egny aminigny lagnisy. ⁶ Ka mihina gny haninigny olo manao maso rasy__dra ka magniry gny hagnary, ⁷ fa karazan'olo magnisy gny vili-kany izy. "Mihinana dra misotroa!" hoy izy aminao, kanefa sy aminao gny fony. ⁸ Haloanao ze kely nihaninao dra ho very foa gny zaka fandokanao. ⁹ Ka mizaka eo asofinigny mola, akory hagnamavo gny fahendreny gny zakanao izy. ¹⁰ Ka magnage gny fefy vato fahizay na magnaniky gny sakanigny kamboty, ¹¹ fa mahery gny pagnavosy anazy regny dra izy gny hisolo vava anereo hanohisy anao. ¹² Apagnekeo fapenara gny fonao ary zaka fahalala gny sofinao. ¹³ Ka misisy gny fapenara sy ho aminigny zaza, akory raha magnafay anazy hanao, dra sy ho maty izy. ¹⁴ Ino gny sy maisy hazera anazy aminigny sorakazo dra hamozy gny fagnahiny aminigny Fiegna-sy hita. ¹⁵ Ry zanako, raha hendry gny fonao, dra ho faly avo koa gny foko; ¹⁶ Hiravoravoa gny agny agnatiko aby mizaka gny sogninao. ¹⁷ Ka anga hialo ereo mpanota gny fonao, fa mipetraha amigny tahosy an'i Yaveh mandrakariva. ¹⁸ Misy tokoa gny ho avy sy ho foa gny fanatenanao. ¹⁹ Mitenoa___hanao!___ry zanako, dra hendre dra hapizoro aminigny lala mahisy gny fonao. ²⁰ Ka minama aminigny mamolava, na aminigny fatra-pihina-kena, ²¹ fa gny mamolava vo gny tenda-kany dra reo be torimaso dra hahatra dra gny faharendreha gny hapifaly anazy aminigny voro-damba. ²² Tenoy gny ranao niteraky anao vo dra ka manao sinosino gny reninao gny fa atisy izy. ²³ Vilio gny marina, fa ka mamarosy anizay; mivilia fahendrena, fapenara, dra fahazava-say. ²⁴ Hiravoravo vatany gny ranigny olo-mary, dra miteraky zaza hendry dra ho faly aminazy. ²⁵ Aoky gny ranao vo gny rreninao ho faly dra aoky hiravoravo ze niteraky anao. ²⁶ Ry zanako, omeo anahy gny fonao dra aoky gny masonao hitaridala gny lalako. ²⁷ Fa gny apela zanga dra lavaky,dra fasaka tery gny apela rasy fitondra-tegna. ²⁸ Miandriandry manahaky gny pandroba izy dra mapitombo gny isan'ireo pamadiky eo aminigny zanak'olombelo. ²⁹ Iza gny misy ozo? Iza gny mana alahelo? Iza gny manan'aly? Iza gny mana fitaregna? Iza gny mana fery sy nagnino sy nagnino? ³⁰ Reo ze mifikisy aminigny divay, reo ze magnandra gny divay mifangaro. ³¹ Ka magnety gny divay mena zay, gny fa manganohano ao aminigny zera zay dra miraraky simoramora. ³² Aminigny farany zay dra manifasy manahaky gny bibilava dra manindro manahaky gny menarana. ³³ Hahita raha hafahafa gny masonao dra gny fonao hamoaky raha lahibe. ³⁴ Hanahaky gny olo ze mandry eo aminigny ranomasy magnoza hanao na mandry eo ataponigny andria-sambo. ³⁵ "Namely anahy rery," hoy hanao, "fa sy voa zaho. Nazera anahy regny, fa sy sapako zay. Ombia zaho gny hifoha? Hialia ho nomy hafa ndraiky zaho."