¹ Halan'i Yaveh reo mizana ze sy mary, fa makasitraky gny laza mary izy. ² Raha avy gny firehareha, dra avy gny fahafaham-baraka, fa aminigny fanetre-tena gny hiavianigny fahendrena. ³ Gny sy fivadihanigny mahisy gny mitari-dalan'anereo, fa gny lala-meloky gny pivadiky dra mamotiky anereo. ⁴ Zava-poana gny harena aminigny andronigny fahoria, fa gny fahasoava gny mary dra miaro anao aminigny fahafatesa. ⁵ Gny fitondra-tegna marinigny sy mana-say dra mapahisy gny lalany, fa gny rasy fagnahy dra ho lavo nohonigny harasiapagnahiny avo. ⁶ Gny fitondra tegna soa mahafaly an'Agnahary dra maro miaro anazy, fa gny pivadiky dra voafandriky gny filan'ereo. ⁷ Gny fa maty gny olo rasy fagnahy, dra levo gny fanatenany dra gny fanatena ze tao aminigny tazany dra zava-poana. ⁸ Gny olo-mary arova lavisy gny fahoria fa avy aminigny rasy fagnahy koa zay. ⁹ Aminigny vavany gny amoteha gny panirasira gny namany, fa aminigny fahalala gny iarova gny olo-mary. ¹⁰ Gny fa ambinina gny olo-mary, dra miravoravo gny tana; gny fa levo gny rasy fagnahy, dra misy hiaka-pifalia. ¹¹ Amizay alalan'ireo fagnomeza-soa ze an'ireo mahafaly an'Agnahary, gny mahavy gny tana ho lahibe; gny mahavy gny tan ho lahibe; aminigny vavany gny rasy fagnahy, gny hahapotiky gny tana. ¹² Gny olo ze magnamavo gny namany dra sy misy say, fa gny olo mana fahazava-say dra mangina. ¹³ Ze mitovy aminigny fagnendrikendreha dra mamoaky sembaratelo, fa gny olo mahatoky dra mifahasy gny raharaha raiky hisaro. ¹⁴ Raha sy misy pitondra hendry, dra hiroda gny firenena, fa gny fandresena dra avy aminigny fangala hevisy aminigny panolosay maro. ¹⁵ Na iza na iza miatoky findramam-bola ho anigny vahiny dra hizaly fatrasy tokoa, fa gny raiky ze makahala gny fagnomeza atoky amizay karaza toky zay gny voaaro, ¹⁶ Gny apela soa fagnahy dra mahazo voninahisy, fa gny olo masiaky mambabo harena. ¹⁷ Gny olo soa fagnahy magnome tombony ho anigny vatany, fa gny raiky zay lozabe mandrasy gny vatany. ¹⁸ Gny olo rasy fagnahy dra mavandy ba hahazoany gny karamany, fa gny raiky ze mamafy gny mary dra miziza gny karamanigny fahamarigna. ¹⁹ Gny olo mary ze manao gny mety dra ho velo, fa gny raiky ze magnaraky gny rasy dra ho maty. ²⁰ Yaveh makahala reo ze mana fo mivaliky, fa makasitraky reo ze mandeha sy mana-signy Izy. ²¹ Izao gny atovy azo atoky__gny olo rasy fagnahy dra sy ho afa-may , fa reo taranaky gny olo-mary dra ho voaaro. ²² Gny apela soa tarehy sy misy fahamalina dra manahaky gny kavim-bolamena eo aminigny oro-koso. ²³ Gny fagnirianigny olo-mary mivony aminigny soa, fa fahasiahan'avo gny azonigny olo rasy fagnahy atenany. ²⁴ Misy ze mamafy voa__mahavoavory maro lavisy izy; gny hafa sy mamafy__dra avy aminigny fahatra izy. ²⁵ Gny olo malala-tagna dra hambiny dra gny raiky ze magnome rano ho anigny hafa dra hana rano ho anigny vatany. ²⁶ Ozigninigny olo gny lelahy ze manda sy hivarosy voa, fa reo fagnomeza-soa gny satro-boninahisy gny lohanize mivarosy zay. ²⁷ Ze mekazo fatrasy gny soa dra mitalia sitraky avo koa, fa gny raiky ze mitalia gny rasy dra hahita anizay. ²⁸ Reo ze mitoky aminigny hareny dra ho lavo, fa manahaky gny raviny, gny hamokaranigny olo-mary. ²⁹ Ze manday korota ao aminigny akohonany dra handova sioky avo dra gny mola dra ho avy panoponigny hendry am-po. ³⁰ Gny olo-mary dra hanahaky gny hazon'ay, fa gny herisetra mangala ay. ³¹ Ingo! Gny olo-mary mndray ze sahaza anazy; maiky fa gny rasy fagnahy vo gny panota!