¹ Raha nagnato an'i Jeresalema Jesosy vo gny mpianany dra nagnao Betifaga,agny an-dohambohisin'i Oliva,dra nandefa mpianasy ro Jesosy, ² nizaka tamin'ereo ho:''Mandehana ao amin'izay vohisy magnaraky ao,fa eo no eo andrareo dra hahita boriky mifehy dra zana-boriky raiky miaraky aminazy.hahao ereo dra andeso atiho aminahy. ³ Raha misy mizaka andrareo momba anizay,dra zakao ho:'Misy italiaviny Topo anazy reo,'dra eo no eo zay olo zay dra handefa anazy reo miaraky amindrareo.'' ⁴ Dra nisy zay ba hahatateraky ze nambara taminigny alalany mpaminany.Ho izy ho: ⁵ ''Zakao gny zanakapelan'i Ziona ho:'Indro.gny Pazakanao magnato anao,Manolon-vata dra mitikisy boriky zana-boriky lahy.''' ⁶ Laha teo dra lasa reo mpianasy dra nanao araky ze nandidian'i Jesosy anazy reo. ⁷ Nandesin'ereo gny ampondra vo gny zana-boriky dra nametraky gny lamban'ereo teo aminazy,dra nipetraky teo aminigny lamba Jesosy. ⁸ Gny mhamaroany gny vahoaky dra namelasy gny lambany tamy tany ,dra reo hafa nanapaky sampan-kazo dra nagnaparitaky anizay tamy lala. ⁹ Laha teo reo vahoaky nialuha an'i Jesosy vo reo ze nagnaraky anazy nareviky ho:''Hosana ho agny Zanak'i Davida! Isaora gny avy amy agnarany Topo!Hosana agny amy avo indrindra!'' ¹⁰ Gny fa nilisy tao Jerosalema Jesosy,dra nikoraky gny ray tana dra nanao ho:''Iza moa io?'' ¹¹ GNy vahoaky namaly ho:''Izy gny Jesosy mpaminany laha tagny Nazareta agny Galilia.'' ¹² Laha teo nilisy tao ampengana Jesosy. Niroahiny avo koa reo pivily vo pivarosy tao ampengona,dra navaliny gny latabasin'ereo mpanakalo vola vo gny fipetrahan'ereo pivarosy voromalala. ¹³ Ho Izy tamin'ereo ho:''Fa voasorasy ho:'Gny tragnoko dra natao tragno fivavaha,'kanefa ataondrareo zohy fierenigny malaso.'' ¹⁴ Nony laha teo dra nisy poaky vo mandringa nagnato Anazy tao ampengona,dra nisitraniny ereo. ¹⁵ Fa noho nahita gny raha-mahalasa nataony gny lahibeny mpisoro vo gny mpanora-dalana,dra gny fa ren'ereo gny mota maliniky nikoraky tao apengona ho:''Hosana ho agny zanak'i Davida,''dra ory fatrasy ereo. ¹⁶ Ho izy reo taminazy ho:''Rendrareo se zalan'ereo olo reo?''Namaly anazy reo Jesosy ho:''Eka! Fa sy bo nivakindrareo mihisy seky gny ho:'Laha tamy vavanigny mota maliniky vo gny zaza minono gny nandavorariandrareo gny fodera?'' ¹⁷ Laha teo niriosy anazy reo Jesosy dra nandeha tagny amy tanan'i Betania dra nitoesy tao hatra amy hariva. ¹⁸ Dra nony maray raha nihery tagny an-tana Izy,dra resy. ¹⁹ Nahita azon'aviavy tegny amoron-dala,dra nagnato tegny Izy dra sy nahita dre ino dre ino teo afa-sy gny raviny.Ho Izy taminazy ho:''Ao sy hisy tegnany sasy laha taminao mandrakizay,''dra niaraky tamin'izay dra maiky gny raviny. ²⁰ Gny fa nahita anizay reo pianasy ,dra gaga ereo dra nizaka ho:''Nanao akory gny dra havy maiky itiho aviavy itiho?'' ²¹ Namaly Jesosy dra nizaka anazy ho:''Zakao mary amindrareo,raha manam-pinoa vo sy misy fisalasala andrareo,dra sy ze natao tamin'io aviavy io avo gny hataondrareo,fa dre dra hizaka amin'itho vohisy itiho ho:'Mionga dra ho lavo agny an-dranomasy',dra ho atao anizay. ²² Dre ino dre ino angatahindrareo am-bavaky,am-pinoa,dra ho azondrareo.'' ²³ Raha nilisy tao apengona Jesosy,dra nagnato Anazy gny lahibeny gny mpisoro vo gny zokiolo raha nampianasy Izy dra nizaka ho:''Fahefa laha teza moa gny anovanao raha reo,dra iza gny nagnome anao anizay fahefa zay?'' ²⁴ Namaly Jesosy dra nizaka tamin'ereo ho:''Hametrahako fagnontania raiky avo koa andrareo.Raha zakandrareo aminahy,dra ho zakako amindrareo gny fahefa anovako anio raha io. ²⁵ Gny batisan'i Jaona -laha teza gny niaviany?Laha tagny an-dagnisy sa laha tamy olombelo?''Nialy hevisy ereo ,nanao ho:''Raha mizaka isika ho,'Laha tagny an-dagnisy,'Izy hizaka amisika ho:'Fa nanao akory andrareo gny sy nino anazy?' ²⁶ Fa raha mizaka isika ho:'Laha tamy olombelo',matohosy gny vahoaky isika,satria izy iaby dra mihevisy an'i Jaona tahaky gny paminany''. Dra namaly an'i Jesosy ereo dra nizaka ho:''Sy fatanay.'' ²⁷ Dra ho Izy avo koa tamin'ereo ho:''Izaho avo koa dra sy hizaka amindrareo ho laha teza gny fahefa anovako anio raha io. ²⁸ Fa nanao akory gny hevisindrareo? Nisy lelahy raiky nana zanadahy ro.Nandeha nagnagny aminigny volohany izy dra nanao ho:'Anaky,mandehana miasa agny amy tanim-boloboky androany.' ²⁹ Gny zanadahiny namaly anazy ho:''Sy ho agny zaho,''fa laha teo dra nagnagny aminigny faharo izy dra nizaka tahaky anizay avo koa. Namaly izy dra nizaka ho:''Ho agny zaho,topoko,'nefa sy nagnagny izy. ³¹ Iza tamin'ereo zanany ro reo gny nanao gny sitrapony rany?''Dra ho izy reo ho:''Gny volohany.''Jesosy nizaka anazy reo ho:''Zakako mary amindrareo,reo pamory hetra vo reo pivaro-tegna dra hilisy gny Fazakan'Agnahary alohandrareo. ³² Fa Jaona nagnatao andrareo tamy fahamarigna,fa sy nino anay andrareo.Fa reo mpamory hetra vo pivaro-tegna nino anazy.Fa andrareo, dre dra nahita anizay avo,dra sy nibebaky vo sy nino anazy. ³³ Tenoy itiho fagnohara raiky hafa itiho.Nisy lelahy raiky,topo tany. Nanao tanim-bploboky izy,nifefeny zay,nandavahany famiazana tao agnatiny,nananganany fiangona,dra napanofany tamin'ereo pamboly voloboky.Laha teo dra nagnagny amy tana hafa izy. ³⁴ Raha nagneky gny taom-pahamokara,dra nagniraky gn'ilany tamin'ereo panopo izy ho agny amin'ireo pamboly voloboky hangalaky gny vokasy. ³⁵ Fa nisamborin'ereo pamboly voloboky reo panopony,nizerany gny raiky,nivonony gny hafa,dra bo nitorahiny gny hafa vato. ³⁶ Dra bo, nandefa panopony hafa draiky gny topon-tany,maro noho gny tamy volohany,fa nataon'ereo manahaky anizay avo koa. ³⁷ Tafaran'izay,dra nagniraky gny zanany lahitoka tagny amin'ireo gny topon-tany,nizaka ho:''Hagnaza gny zanako ereo.' ³⁸ Gny fa nahita gny zanadahiny reo pamboly voloboky,dra nifampiresaky ereo ho:'Itiho gny mpandova.Andeha, ho vonosika izy dra ho alasika gny lova.' ³⁹ Noho zay dra nisamborin'ereo izy,natorany tao agnatinigny tanim-boloboky dra novonony. ⁴⁰ GNy fa avy gny topo gny tanim-boloboky,ino gny ho ataony amin'ereo pamboly voloboky?''. ⁴¹ Ho izy reo taminazy ho:''Ho ringaniny amin'izay fomba fatrasy indrindra reo olon-doza,dra laha teo hapagnofany amin'ereo pamboly voloboky hafa gny tanim-boloboky, olo hagnome anazy gny azarany voliny amy fotoam-pamokara.'' ⁴² Jesosy nizaka tamin'ereo ho:''Sy bo namaky gny Sorasy Masy draiky seky andrareo ho :'Gny vato nihalany mpagnori-tragno gny natao vato fehizoro.Laha tamy Topo zay,dra mahatalazo eo amasosika'? ⁴³ Noho zay zakako amindrareo,alao amindrareo gny fazakan'Agnahary dra hatolosy gny firenena ze mamokasy reo tegnagny. ⁴⁴ Dre iza dre iza lavon'io vato io dra ho torotoro.Fa zay hilavoany koa dra ho rava.'' ⁴⁵ Gny fa nahare gny fagnohara reo gny lahibeny pisoro vo reo Fariseo dra azon'ereo fa mahakasiky anazy reo gny resahiny. ⁴⁶ Nilasa gny hanambosy Anazy,saiky natahosy gny vahoaky ereo,satria nataony olo ho paminany Izy.