¹ Dra gny fa nahavita gny zaka reo Jesosy,niala tagny Galilia Izy,dra nagnagny amy farisin'i Jodia ze tany andafinigny renirano gny Jordana. ² Boroza maro gny nagnaraky Anazy,dra nagnasitra anazy reo tagny Izy. ³ Nagnato Anazy reo fariseo,nisapa Anazy,nizaka taminazy ho:''Ara-dalana ho agny lelahy seky gny misaraky amy valiny noho ze mety ho atony aby?'' ⁴ Jesosy namaly dra nizaka ho:''Sy nivakindrareo seky fa Izy ze nanao anazy reo taminigny valohany dra nanao anazy reo ho lahy vo ampela? ⁵ Izy ze nanao anazy dra nizaka avo koa ho:'Fa noho zay atony zay dra hagnenga gny rany vo reniny gny lelahy dra hikamba amy valiny ,dra ho lasa nofo raiky izy ro?' ⁶ Dra sy ho ro sasy ereo,fa ho nofo raiky.Dra ze natambasin'Agnahary,ao sy hisy hagnasaraky.'' ⁷ Ho izy reo taminazy ho:''Nanao akory zay Mosesy gny mandidy anay hagnome taratasy fanamarignam-pisaraha dra laha teo hahery aminazy?'' ⁸ Ho Izy tamin'ereo ho:''Fa gny hamafisam-pondrareo gny namelan'i Mosesy andrareo hisaraky amy valinadrareo,fa tamy volohany dra sy zay gny fomba. ⁹ Zakako andrareo, dre iza dre iza misaraky amy valiny,afa-sy noho gny fizangazanga,dra manambaly hafa,dra magnisakisaky ampela ze fa nisara-baly dra mizangazanga.'' ¹⁰ Reo mpianasy nizaka tamin'i Jesosy ho:''Raha zay gny toetrany lelahy ami valiny,dra sy soa gny manambaly.'' ¹¹ Fa Jesosy nizaka tamin'ereo ho:''Sy gny olo aby gny afaky magneky anizay fampianara zay,fa reo ze nanga hagneky anizay avo. ¹² Fa misy gny olo reo ionoka ze fa manahaky anizay hatrany an-tron-drenin'ereo,dra misy reo ionoka ze nataon'olombelo,dra misy ionoka ze manao gny vatan'ereo ho ionoka noho gny fazaka gny lagnisy. Izy ze afaky mandramby anizay fampianara zay,ao izy handramby anizay.'' ¹³ Laha teo nisy mota maliniky sasasasny nandesiny teo aminazy ba hametrahany tagna amin'ireo dra hivavaky,fa nizaka fatrasy anazy reo gny mpianasy. ¹⁴ Hoy Jesosy ho:''Angao gny zaza maliniky,dra ka rara ereo hamozy anahy,satria gny fazakanigny lagnisy dra manahaky anazy reo.'' ¹⁵ Napetrany teo amin'ereo zaza gny tagnany,dra laha teo niala teo Izy. ¹⁶ Indro,nisy lelahy nagnato an'i Jesosy dra nizaka ho:''Mpampianasy ,ino gny raha soa sy maisy ataoko ba hahazoako gny fiagna mandrakizay?'' ¹⁷ Jesosy nizaka taminazy ho:''Nanao akory anao gny manotany momba ze soa atiho aminahy? Raiky avo gny soa,fa raha te-hilisy agny amy fiaigna anao,dra tandremo reo didy.'' ¹⁸ Hoy gny lelahy taminazy ho:''Didy ino?''Dra hoy Jesosy ho:''Ka mamono olo, ka mizangazanga,ka mangalasy,ka mety vavolombelo diso, ¹⁹ hazao gny ranao vo gny reninao,dra tiavo gny mpiara-belo aminao manahaky gny vatanao.'' ²⁰ Gny zatovo nizaka taminazy ho:''Fa nakatoaviko aby avo koa zay.Ino gny bo taliaviko?'' ²¹ Jesosy nizaka taminazy ho:''Raha magniry gny ho tonga lafasy anao,dra mandehana,havilio ze anagnanao,dra omeo gny mizaly ,dra hana hanagna agny an-dagnisy anao;dra avia,magnaraha Anahy.'' ²² Fa gny nahare ze nizakan'i Jesosy gny zatovo,dra niala tamin'alahelo izy,satria nana fanagna maro. ²³ Hoy Jesosy tamin'ireo mpianasy ho:''Zakako mary amindrareo, sarosy ho agny mpagnarivo gny hilisy gny fazaka gny lagnisy. ²⁴ Dra bo zakako amindrareo draiky , moramora ho agny rameva gny milisy amy forim-pajaisy toy zay ilirany mpagnarivo ao amy fazakan'Agnahary. ²⁵ Gny fa nahare anizay reo mpianasy,dra tena nalazo vatany dra nizaka ho:''Iza gny afaky ho voze?'' ²⁶ Nagnety anazy reo Jesosy dra nizaka ho:''Amin'olo ddra sy hay atao zay,fa amin'Agnahary gny raha-iaby dra azo atao.'' ²⁷ Laha teo Petera namaly dra nizaka ho:''Indro,nangany gny raha-iaby dra nagnaraky Anao zahay. Ino gny ho azonay?'' ²⁸ Jesosy nizaka anazy reo ho:''Zakako mary amindrareo,amy vanim-potoa vaovao gny fa mipetraky eo amy seza fiandriana gny voninahiny gny Zanak'olo,dra hipetraky eo amy seza fiandriana ro amby folo avo andrareo ze nagnaraky Anahy,hisara reo foko ro ambiny folon'Israely. Gny olo aby nagnenga tragno,rahalahy,anabavy,ra,reny,zanaky,dre tany noho gny agnarako,dra handramby agn'abo zato heny dra handova fiaigna mandrakizay. ³⁰ Fa maro reo ze volohany ho lasa farany,dra gny farany ho volohany.