¹ Tamy andro fahavalo dra nitokavin'i Mosesy i Arona vo reo zanadahiny reo loholon'Israely. ² Nizaka tamin'i Arona izy ho:''Mangala zanakagn'omby laha tamy andianagn'omby ho fagnatisy noho gny fahota, dra zanakagn'omdry sy misy handrany ho fagnatisy oroa , dra hatolory eo anomoan'i Yaveh reo. ³ Ao ianao hizaka amy vahoakin'Israely ka hanao ho:''Mangala osy lahy ho fagnatisy noho gny ota dra zanakagn'omby vo zanakagn'ondry, samy heritao dra sy misy handrany, ho agny fagnatisy oroa; ⁴ mangala agn'omby avo koa vo agn'ondry lahy ho agny fagnati-pihavaba ba ho sorondrareo anoloan'i Yaveh, dra fagnatisy tegnany miharo amy dililo, satria hiseho aminao amizao i Yaveh.''' ⁵ Koa ninday nereo aby ze nandidian'i Mosesy ho ao amy tragno-lay fihaogna izy reo, dra nagnato reo fiangonan'Israely aby fdra nisanga teo anoloan'i Yaveh. ⁶ Dra nizaka i MOsesy ho:''Zao gny nandidian'i Yaveh andrareo ba hatao , ba hahafahany voninahiny miseho amindrareo.'' ⁷ Nizaka tamin'i Arona i Mosesy ho:''Mandehana marinigny alitara dra atolory gny fagnatisy noho gny otanao vo gny fagnatisy oroanao, dra manova fagnavaha ho agny vatanao vo ho agny vahoaky, dra atolory ho agny vahoaky ba hanova fagnavaha ho anazy reo gny soro, araky ze nandidian'i Yaveh.'' ⁸ Ka nadeha nagnariny gny alitara i Arona dra namono gny zanakagn'omby ho fagnatisy noho gny ota , zay ho agny vatany. ⁹ Napotoron'ereo zanadahin'i Arona taminazy gny lio, dra nandromboky gny rambon-tagnany eo agnabonigny tandroky gny alitara ;laha teo dra nagnisy gny lio teo amy fagnambanigny alitara izy. ¹⁰ Na zay avo, nitono gny sabora, reo voa, dra reo sarak'atiny teo agnabiny alitara ho fagnatisy noho gny ota araky gny nandidian'i Yaveh an'i Mosesy izy. ¹¹ Gny hena vo gny holisiny dra natonony teo ambalikiny toby. ¹² Nivonon'i Arona gny fagnatisy oroa, dra nomeny gny zanadahiny anazy gny liony,zay nahosony tegny amy lafiny alitara aby. ¹³ Dra nomen'ereo anazy isaky amy lohany, dra nagnoro anizay teo agnabony alitara izy. ¹⁴ Nanasa reo tao agnabny vo reo tombiny izy dra nagnoroany teo agnabonigny fagnatisy oroa teo amy alitara reo. ¹⁵ Nanolosy gny sorony gny vahoaky i Arona -osy lahy raiky, dra nangalaky anizay ho soro noho gny otan'ereo dra namono anizay;nanao soro zay noho gny ota izy, araky zay nataony taminigny osy lahy volohany. ¹⁶ Nampitoro gny fagnatisy oroa vo gny nagnome anizay araky ze nandidian'i Yaveh izy. ¹⁷ Nampitoro gny fagnatisy voa izy;nameno gny tagnany taminizay izy dra nagnoro anizay teo agnabony alitara, miaraky amy fagnatisy oroa maraidraim-be. ¹⁸ Nivonony avo koa gny agn'omby vo gny osy lahy, soro ho agny fagnati-pihavana, zay ho agny olo.Nomeny gny zanadahin'i arona anazy gny liony, zay nafafy tegny amy lafiny alitara aby. ¹⁹ Na zay avo, nangalan'ereo gny saborany agn'omby vo gny lahy, gny sabora zay mandrakoky gny tao agnatiny, reo voa,dra gny sarak'atiny. ²⁰ Nangalaky gny azarany zay voarasa izy reo dra nametraky anizay teo agnabony gny tratrany,dra nagnoro gny sabora teo agnabony alitara i Arona. ²¹ Dra Arona nagnevaheva reo tratra vo gny feny havana ho fagnatisy ahevaheva teo anoloan'i Yaveh, araky gny fa nandidian'i Mosesy. ²² Dra nananga gny tagnany teo amy vahoakin'i Arona dra nitso-drano anazy reo;dra nizoso laha tamy fagnatera gny fagnatisy noho gny ota izy, gny fagnatisy oroa, dra gny fagnati-pihavana. ²³ Nilisy tao amy tragno-lay fihaogna i Mosesy vo i Arona , laha teo dra niboaky draiky izy reo ka nitso-drano gny vahoaky,dra niseho tamy olo aby gny voninahisin'i Yaveh. ²⁴ Nisy afo niboaky laha tagny amin'i Yaveh ka nandevo gny fagnatisy oroa vo gny sabora teo agnabo alitara.Fa gny nahita anizay gny olo aby, dra nikoraky izy reo dra nampiahoky gny tarehiny.