¹ Ry rahalahy, gny misy olo azonigny ota, handrareo ze ara-pagnahy gny tokony hagnery anazy ndraiky amigny fahamo-rapagnahy. Mihevisy gny vatanao, ba sy ho hala-pagnahy koa hanao. ² Mifapandesa gny mavesasy, dra amizay dra tateraho gny lalan'i Kristy. ³ Fa gny misy olo mihevisy gny vatany ho aindraha kanefa sinosino, dra mamitaky gny vatany izy. ⁴ Tokony handiniky gny asany aby gny sirairay, ba ho amigny vatany avo koa gny atony hireharehany fa sy amigny olo-kafa. ⁵ Fa samby hinday gny vatany aby gny olo sirairay. ⁶ Gny olo ze napenary gny zaka dra sy maisy mizara gny raha soa aby amize mapianasy. ⁷ Ka mety ho fitahy, fa ze ambolenigny olon'aby, gny ho zizany koa. Ho anize mamboly voa amigny toetrany feno fahota, dra boaky amizay gny hiziza fahasola. ⁸ Ze mamboly voa amigny Fagnahy, amigny fagnahy gny hizizany gny fiegna mandrakizay. ⁹ Aoky sika ba sy ho reraky amigny fanova-soa, fa hiziza gny vokasy isika amigny fotoa mety, raha sy milavo lefo sika. ¹⁰ Noho izay, akory mana fahafaha isika, dra aoky hanao gny soa amigny olon'aby, indrindra fa amigny fianakavianigny finoa. ¹¹ Atio gny halahibenigny sorasy ze nisoratinigny tagnako ho andrareo. ¹² Reo ze te hiseho ho soa ao amigny nofo gny miezaky manery andrareo ba hotapahy. Manao anizay ereo ba hiala amigny fagnezeha nohonigny amigny hazofizalian'i Kristy. ¹³ Na reo ze sy voatapaky aza dra sy mitandry gny lala, nefa tian'ereo hotapahy handrareo ba hireharehan'ereo amigny nofondrareo. ¹⁴ Nefa sy hirehareha na ombia na ombia afa-sy gny amigny hazofizalian'i Jososy Kristy Toposika anie zaho, ze nanomboa anizao totolo zao teo aminahy, dra izaho koa teo amizao totolo izao. ¹⁵ Fa gny fanapaha na gny sy fanapaha dra samby sy misy dikany, fa gny fiegnam-baovao gny misy dikany. ¹⁶ Ho anigny ze miay araky anizay fomba zay , dra ho amin'ereo anie gny fedagna vo gny famindra-po, na amigny Israelin'Agnahary aza. ¹⁷ Manomboky amizao dra aoky sy hosy hagnadala anahy, fa minday reo marik'i Jesosy eo amigny vatako zaho. ¹⁸ Ho amigny fagnahindrareo anie gny fahasoavan'i Jesosy Kristy Toposika, ry rahalahy. Amena.