¹ Handrareo gny vahoakin'i Yaveh zagnaharindraeo. Ka mitetiky gny vatandrareo, na magnarasy gny farisy gny tarehindrareo ho anigny maty. ² Fa handrareo dra firenena ze voatoka ho an'i Yaveh zagnaharindrareo, dra Yaveh nifily andrareo ho vahoaky ho fanagna manoka, mihoasy reo vahoaky aby ze eo amboninigny tany. ³ Ka mihina raha vetaveta na ino na ino. ⁴ Tahoky gny biby azondrareo hany: gny agnomby, gny agnondry, dra gny osy, ⁵ gny serfa, gny gazela, gny kapreola, gny osi-mola, gny pygarga, vo gny atilopa, dra gny ropikapra. ⁶ Azondrareo hany gny biby aby ze mivaky kitro, mana kitro mizara ro, dra ze mandiniky. ⁷ Na dre zay aza, ka mihina reo biby ilany ze mandiniky na ze manao kitro mizara ro handrareo; gny rameva, gny bitro, dra gny hyraka; akory mandiniky reo sy mivaky kitro, maloto amindrareo reo. ⁸ Gny koso koa dra maloto amindrareo akory mivaky kitro izy nefa sy mandiniky; maloto amindrareo izy. Ka mihina hena-koso, dra ka mikasiky gny fatin'ireo. ⁹ Amireo raha ze ao agnaty rano dra azondrareo hany: ze misy vombony vo kirany; ¹⁰ nefa zay gny fa sy misy vombony vo kirany dra ka hanindrareo; maloto amindrareo reo. ¹¹ Reo voro malio aby dra azondrareo hany. ¹² Nefa itahoky gny biby sy azondrareo hany: gny voromahery, gny voltora, gny gypa, ¹³ gny papango mena vo gny papango mety, ze karaza voromahery aby. ¹⁴ Ka mihina gny karaza koaky aby, ¹⁵ vo gny ostritsa, vo gny tararaky, gny vorondriaky, ze karaza tararaky aby, ¹⁶ gny voron-dolo masaiky, gny voron-dolo lahibe, gny voron-dolo fosy, ¹⁷ gny sama, gny voltora madiniky, gny vano. ¹⁸ Ka mihina gny vanobe, vo gny karaza vano aby, gny takidara, dra gny ramanavy. ¹⁹ Gny raha manan'elasy, vo mandaly aby dra maloto amindrareo; sy tokony hohany reo. ²⁰ Azondrareo hany reo raha mitily malio aby. ²¹ Ka mihina raha ze maty ho anazy; azondrareo hagnome gny vahiny ze ao amigny tananao; bahahafahany mihinan'anizay; na azondrareo avily amigny vahiny zay. Fa handrareo dra firenena ze voatoka ho an'i Yaveh zagnaharindrareo. Ka mapandevy zanak'osy amigny rononon-dreniny. ²² Aloavo gny apahafolonigny vokasy gny voanao aby, ze miboaky boak'ao amigny saka isa-tao isa-tao. ²³ Misakafoa eo anoloan'i Yaveh zagnaharindrareo, ao amigny toera ze hofiliny ho fitoerany masy, gny apahafolonigny varinao, gny divainao vaovao, vo gny menakao, dra gny volohateraky gny agnombinao vo gny agnondry aman'osinao; ba hahafahanao mianasy hanopo lalandava an'i Yaveh zagnaharinao. ²⁴ Raha lava loasy amindrareo gny lia dra sy zakandrareo zay, akory lavisy loasy anao gny toera ze hofilin'i Yaveh zagnaharinao ho fitoera masy, dra gny fa mitahy anao Yaveh zagnahary, ²⁵ havoa gny fagnatisy ho vola hanao, hamehy gny vola egny atagnanao, dra handeha agny amigny toera ze hofilin'i Yaveh zagnaharinao. ²⁶ Ao gny handanianao gny vola amize irinao aby: amigny agnomby, na amigny agnondry, na amigny divay, na amigny raha nomy mahery, na amize irinao aby; dra agny hanao gny hihinan'eo agnatrehan'i Yaveh zagnaharinao, dra hifaly hanao, hanao vo gny akohonanao. ²⁷ Gny Levita mahafo ze ao agnatin'ireo vavahadinao__ka mahafo anazy, fa sy manan'azara na lova aminao izy. ²⁸ Amigny faranigny isa-telo tao dra hanolosy gny apahafolonigny vokasao aby amizay tao zay hanao, dra hitahiry anizay ao agnatinigny vavahadinao hanao; ²⁹ dra gny Levita, akory izy sy manan'azara na lova aminao, vo gny vahiny, vo gny kamboty, dra gny pitondratena ze ao agnatinigny vavahadinao, dra ho avy vo hihina dra ho afa-po. Atovy zay ba hahafahan'i Yaveh zagnaharinao mitahy anao amigny asanigny tagnanao aby ze ataonao.