¹ Sy misy lelahy narasy tamigny fangala na fanapaha gny filahiany afaky hilisy ao amigny fengonan'i Yaveh. ² Sy misy zazasary afaky ho isanigny fengonan'i Yaveh; dra hatragny amigny taranaky fara-mandimbiny fahafolo, sy hisy ho isanigny fikambanan'i Yaveh ereo. ³ Gny Amonita vo gny Moabita dra sy ho isanigny fengonan'i Yaveh; dra hatragny amigny taranaky fara-mandimbiny fahafolo, sy hisy ho isanigny fengonan'i Yaveh ereo. ⁴ Zay dra akory sy nisena andrareo tamigny mofo vo rano tegny amigny lala niboahandrareo boak'agny Egypta ereo, dra akory nagnarama an'i Balama zanadahin'i Beora boak'agny Petora agny Arama Naharaima hanoheran'anao ereo, ba hagnozognan'anao. ⁵ Fa Yaveh Zagnaharinao dra sy hiteno an'i Balama; fa koa, navadilik'i Yaveh ho fitahia honao gny ozo, akory tian'i Yaveh zagnaharinao hanao. ⁶ Sy tokony hitahy gny fedagna na fagnambinan'ereo mihisy hanao, mandrasy gny andro-piegnanao aby. ⁷ Sy tokony halaiky Edomita hanao, akory rahalahinao izy; sy tokony halaiky Egyptiana hanao, akory vahiny tagny amigny taniny hanao. ⁸ Reo taranaky boak'amigny taranaky fahatelo ze naterak'ereo dra mety ho anisanigny fengonan'i Yaveh. ⁹ Raha mandeha manahaky gny tafiky manohisy an'ireo fahavalonao hanao, dra tokony hitandry gny vatanao amigny raha rasy aby. ¹⁰ Raha misy lelahysy malio noho ze nitranga taminazy tamigny hariva eo aminao, dra tokony hiboaky ao amigny tobinigny tafiky izy; sy mahazo miherin'ao amigny toby sasy izy. ¹¹ Gny fa avy gny hariva, dra tokony hanasa gny vatany amigny rano izy; gny fa miletiky gny masoandro, dra hiherin'ao amigny toby izy. ¹² Tokony hana toeran'agny ivelanigny toby avo koa hanao ze handehananao; ¹³ dra hana raha ao amigny fitova-pesanao hanao ba handavaha; gny fa mitingitingy manao maloto hanao, dra tokony handavaky amizay dra boak'eo magnery gny tany dra mandombosy ze niboaky boak'eo aminao. ¹⁴ Akory i Yaveh zagnaharinao dra mandeha egny agnevonigny tobinao ba hagnome fandresena honao vo hanolosy reo fahavalonao aminao. Noho izay dra tokony ho masy gny tobinao, ba sy hahitany raha sy malio eo aminao dra hivadik'aminao. ¹⁵ Gny andevo ze nienga boak'agny amigny topony dra sy tokony hiherin'agny aminazy sasy. ¹⁶ Angao izy hipetraky hiaraky aminao, na eza na eza tana filiny. Ka apahory izy. ¹⁷ Sy tokony hisy pizangazanga amigny fanopoa-sapy eo amireo zanakapelan'Israely, na koa hisy pizanganga amigny fanopoa sapy eo amireo zanadahin'Israely. ¹⁸ Reo karamanigny pivarotegna na karaman'amboa dra sy tokony andesinao milisy ao atragnon'i Yaveh zagnaharinao ba hagnatateraha voady; akory samby fahavetaveta amin'i Yaveh zagnaharinao reo. ¹⁹ Sy tokony hangalaky tombony amireo Israelita namanao hanao gny fa mapitrosa__tombony amigny volo, tombony amigny sakafo, tombony amigny na ino na ino napitrosa hangala tombony. ²⁰ Mety hapindra hangala tombony hanao amigny vahiny; fa amireo Israelita namanao dra sy tokony hapindra hangala tombony hanao, ba hitahian'i Yaveh anao amize hanobianao tagnan'aby, ao amigny tany ze ho lasa fanagnanao. ²¹ Gny fa manao voady amin'i Yaveh zagnaharinao hanao, dra sy tokony hiraikiraiky amigny fagnataterahan'anizay, akory azo atoky fa ho taken'i Yaveh zagnaharinao aminao zay; ho fahota honao gny sy fagnataterahan'anizay. ²² Fa raha hanindry fo hanao amigny fanova voady, dra sy ho fahota honao zay. ²³ Gny zaka ze naloaky gny vavanao dra tandrovy vo tateraho; araki'ze voady nataonao tamin'i Yaveh zagnaharinao, na ino na ino napanatenanao maimaipoana tamigny vavanao. ²⁴ Gny fa magnagny amigny tanim-boaloboky gny piara-belon'aminao hanao, dra mety hihina voaloboky maro araky ze irinao, fa ka magnisy ao agnaty tatinao. ²⁵ Gny fa mandeha magnagny amigny tanimbarinigny piara-belon'aminao hanao, dra mety hioty salohim-bary amigny tagnanao, fa ka ametraha asy fanapaha gny salohim-bariny piara-belon'aminao.