¹ Raha misy olo hita faty ao amigny tany ze namen'i Yaveh zagnaharindrareo ho fanagna, mandry eo amigny saka, dra sy fatasy ze nanafiky anazy; ² dra sy maisy mandeha miboaky reo loholondrareo vo reo pisarandrareo, dra sy maisy mandrefy reo tana ze magnodidy anigny olo nivono ereo. ³ Dra reo loholonigny tanan-dehibe ze agnilanigny tafinigny olo dra sy maisy mangalaky agnomby vavy boak'amigny andian-agnomby, raiky ze sy bo napesany mihisy, dra sy nisy zioga. ⁴ Boak'eo dra sy maisy roahin'ereo miziso amigny lohasaka misy rano mandesa gny agnomby vavy kely, lohasaka ze sy bo nasa tamigny fangalin'agnomby na nambole, dra eo amigny lohasakaereo gny sy maisy manola gny tarafeonigny agnombivavy kely. ⁵ Reo pisoro, taranak'i Levy, dra sy maisy magnato mariny; akory ereo gny nisafidin'i Yaveh zagnaharinao hanopo Anazy vo hitahy gny olo amigny agnaran'i Yaveh; tenoy reo tolo-kevis'ereo, akory gny zakan'ereo dra ho didi-pisara amigny fifamalian'aby vo amigny marasy. ⁶ Reo loholonigny tanan'aby ze agnilanigny olo nivono dra sy maisy manasa gny tagnan'ereo eo amigny agnomby vavy kely ze voaola teo amigny lohasaka gny tarafeony; ⁷ dra sy maisy mamaly gny raha misy ereo dra mizaka ho: "Gny tagnanay dra sy nandasaky gny liony, dra sy nahita anizay gny masonay. ⁸ Mamela gny vahoaky Israelinao, ze fa navotanao, ry Yaveh, dra ka atao meloky amigny fandasahan'dio olo sy mana-signy gny vahoaky Israelinao." Dra havela heloky amigny fandasahan-dio ereo. ⁹ Amizay fomba zay gny hangalanao gny lio sy mana-signy eo agnevonao, gny fa manao ze marin'eo amason'i Yaveh hanao. ¹⁰ Gny fa mandeha miboaky hialy hanohisy reo fahavalonao hanao dra Yaveh zagnaharinao magnome fandrese anao vo manao anereo ho eo ambany fahefanao, dra mihazon'anereo ho babo hanao, ¹¹ raha mahita apela soa tarehy eo amin'ereo hanao, dra mana-pagniria aminazy dra magniry gny hangalaky anazy ho valinao, ¹² dra handesinao agny atragnonao izy; hagnarasy gny lohany izy dra hanapaky gny vazakohony. ¹³ Dra hangalaky gny akazo ze nanovany tamin'izy babo izy dra hizano ao amigny tragnonao dra handala gny rany vo gny reniny mandrisy gny volaniraiky. Gny fa avy mindray mandry aminazy hanao dra lasa valiny, dra ho valinao izy. ¹⁴ Fa raha sy mahazo fahafinareta aminazy hanao, dra hamely anazy handeha agny amize irinao handehana. Fa sy azonao atao gny mamarosy anazy ho fahazoam-bola, dra sy azonao atao gny minday anazy manahaky gny andevo, akory fa nangala baraka anazy hanao. ¹⁵ Raha manam-baly ro gny lelahy raiky dra gny raiky tiany fa gny raiky dra halany, dra samby niteraky zaza honazy avokoa reo ro reo__gny valy tiany vo gny valy halany__raha avy amigny halany gny lahimatoa, ¹⁶ amigny andro ze hapandovanigny lelahy ze hanagnany an'ireo zanany, dra sy tokony hanao gny zanakigny valy tiany ho lahimatoa alohanigny zanakigny valy halany izy, gny zanaky ze lahimatoa amizao. ¹⁷ Fa koa, sy maisy magneky ze lahimatoa izy, dra gny zanaky gny valy halany,amigny alalanigny fagnomezan'anazy azara ro amize fanagnany aby; akory io zanak'io gny fiandohanigny tazany; dra anazy gny fizokia. ¹⁸ Raha misy lelahy riky managnanaky mahery loha vo pikomy ze sy hakato gny feonigny rany na gny feonigny reniny, na dre ahisin'ereo aza izy, dra sy hiteno anereo; ¹⁹ dra sy maisy manery anazy vo minday anazy miboaky magnagny amireo loholonigny tanany vo agny am-bavahadinigny tanany gny rany vo gny reniny. ²⁰ Sy maisy mizaka amireo loholonigny tanany ereo ho: "Ty zanakay tihoky dra maheriloha vo pikomy; sy hakato gny feonay izy; tenda-kany vo pimamo izy.'' ²¹ Dra sy maisy mitora-bato anazy ho maty avokoa gny olon'aby amigny tanany; dra hanao dra hangalaky gny rasy eo aminao. Gny Israely aby dra hahare anizay dra hatahosy. ²² Raha nanao fahota mendriky fahafatesa gny olo raiky dra vono izy, dra haraviravinao egny amigny hazo, ²³ dra sy azo azanon'eo amigny hazo mandrisy gny hariva manotolo gny fatiny. Fa koa, sy maisy alevinao amin'io andro io avo izy; akory na iza na iza naraviravy dra voaozon'Agnahary. Akatoavo gny didiny ba sy handoto gny tany ze namen'i Yaveh Zagnaharinao ho lova hanao.