¹ Paoly, apostolin'i Kristy Jososy amigny alalanigny sitrapon'Agnahary, dra i Timoty rahalahisika, ² ho an'ireo pino vo reo rahalahy matoky ao amigny Kristy ze agny Kolosia. Ho amindrareo anie gny fahasoava, vo gny fedagna boak'amin'Agnahary Rasika. [Hagnamariha ambaninigny pezy: "Dra gny Topo Jesosy Kristy"]. ³ Magnome fisora an'Agnahary sika, gny Ranigny Toposika Jesosy Kristy, dra mivavaky mandrakariva ho andrareo zahay. ⁴ Fa renay gny finoandrareo an'i Kristy Jesosy dra gny fitiava ze anagnandrareo ho anize voatoka ho an'Agnahary aby. ⁵ Mana anizay fitiava zay handrareo noho gny fanatena agny andagnisy. Rendrareo gny momba io fanatena azo atoky iotalohanigny zaka amigny fahamarigna, gny filazasara, ⁶ ze avy amindrareo. Ty filazasara tihoky dra minday vokasy vo mitombo eran'izao totolo izao. Izay dra fa nanao anizay taminao avo koa nanomboky tamigny andro naharezanao anazy dra nianarandrareo gny mombanigny fahasasoavan'Agnahary ao amigny mary. ⁷ Tihoky gny filazasara ze araky gny nianarandrareo tamigny Epafra, gny piara-manopo malalasika, ze panopo mahatokin'i Kristy amigny agnarasika. [Fagnamariha ambaninigny pezy: misy dika-zaka mivaky ho: "Amigny agnarandrareo"] ⁸ Napahafatariny Epafra anay gny fitiavandrareo gny Fagnahy. ⁹ Noho io fitiava io, hatramigny andro naharezanay anizay dra sy nisahasy nivavaky ho andrareo zahay. Nangataky zahay ba ho feno fahalala gny sitrapony amigny fahendrena aby vo fahalala ara-pagnahy handrareo. ¹⁰ Nivavaky zahay ba handehanandrareo apahamendreha ao amigny Topo amireo fomba akasitrahan'Agnahary. Nivavaky zahay ba hamokasy amigny asa soa aby handrareo dra ba hitombo fahalala an'Agnahary. ¹¹ Mivavaky zahay ba hahazo hery amigny fahezan'aby handrareo araky gny herinigny voninahisy amigny fiareta vo gny fahareta. ¹² Mivavaky zahay ba hagnome fisora anigny Rasika apifalia handrareo, ze nahafahandrareo hanana azara amigny lovan'ireo pino amigny fahazava [Fagnamariha ambany pezy: misy dika-zaka ilany mivaky ho: "Ze nahafahasika nanan'azara"]. ¹³ Namozy asika tamigny fanapahanigny hezy vo namindra asika ho agny amigny fazakanigny zanadahiny malalany Izy. ¹⁴ Ao amigny Zanadahiny gny anagnasika gny fagnavota, gny famela reo fahota. [Fagnamariha ambaninigny Pezy: misy dika-zaka ilany mivaky ho: "Ao amigny zanany gny anagnasika fagnavota amigny alalanigny liony, dra gny famela reo fahota."] ¹⁵ Gny zanadahiny draendrikigny zagnahary sy hita maso. Izy gny teraky volohany tamigny faharia. ¹⁶ Fa tamigny alalany gny naharia gny raha aby, reo ze agny andagnisy vo reo ze eto ambaninigny tany, reo raha hita maso vo reo sy hita. Na reo seza fiandriagna, na reo fanapaha, na reo fitondra-pazaka , na reo mana-pahefa, reo raha aby dra nohary tamigny alalany vo ho anazy. ¹⁷ Izy gny alohanigny raha aby, dra ao aminazy gny haharetany raha aby. ¹⁸ Izy gny lohanigny vata, vo gny fengona. Izy gny fendoha vo teraky volohany boak'eo agnevon'ireo maty, dra izy gny nana toera volohany teo agnevon'ireo raha aby. ¹⁹ Akory sitran'Agnahary gny tokony gny hiegnanigny fahasoavany aby ao aminazy, ²⁰ dra ba hapihava amigny alalanigny zanadahiny amigny raha-aby amin'izy vatany. Zagnahary dra nihava tamigny alalanigny lionigny hazo fizalia. Zagnahary gny napihava gny raha-aby tamigny vatany, na gny raha aby eto amboniny tany na reo raha agny andagnisy. ²¹ Tamigny fotoa raiky, handrareo avo koa, dra vahiny tamin'Agnahary dra fahavalony tao asainy vo tamireo asa rasy. ²² Fa amizao izy gny napiahava andrareo tamigny vatany manotolo tamigny alalanigny fahafatesa. Nataony ze ba hanovany andrareo ho masy, sy hana-pondro eo agnatrehany, dra nangala baraka anazy noho gny fagnarasia, ²³ raha manohy amigny finoa handrareo, miory vo fatrasy ory, dra ka mihataky amignyfanatena mahatokiny filazasara ze rendrareo. Tihoky gny filazasara ze zinaka tamigny olon'aby nohary ambaninigny lagnisy. Tihoky gny filazasara ze nahavy anahy, Paoly, ho panopo. ²⁴ Amizao zaho dra faly amigny fizaliako ho andrareo, zaho dra nameno gny nofoko ze sy apy amireo fahorian'i Kristy noho gny vatany, dra gny fengona. ²⁵ Noho gny fengona gny nahapanopo anahy, araky gny andraikisy avy amin'Agnahary ze nameny anahy ho andrareo, ba hahatateraky gny zakan'Agnahary. ²⁶ Io gny mary sihita ze navony nandrisy gny tao maro vo ho anireo taranaky. Fa amizao dra fa niseho zay tamireo ze mino anazy. ²⁷ Tamin'ereo gny tian'Agnahary napahafatary reo harenigny voninahis'ity fahamarigna sihita tihoky teo agnevonigny Jentilisa. Izay dra Kristy gny ao aminao, gny tokinigny voninahisy ho avy. ²⁸ Dra izy gny torinay. Nagnanasy gny olon'aby zahay, dra napenasy gny olon'aby tamigny fahendrena, ba hanolorasika gny olon'aby feno ao amin'i Kristy. ²⁹ Noho izay dra miasa fatrasy zaho vo miezaky araky gny tazany ze miasa ato aminahy amigny hery.