¹ Nagneky gny fahafatesany i Saoly. dra nanomboky tamin'io andro io gny fagnezeha lahibe hanohera gny fengona ze tao Jerosalema; dra reo pino aby dra nipetraky nanera reo farisy Jodia vo Samaria, akoasy reo Apostoly. ² Reo lelahy matahosy an'Agnahary dra nandevy an'i Stefana dra nanao hira findala anazy. ³ Fa Saoly dra nanola tateraky gny fengona; nitety tragno izy dra nangalaky reo lelahy vo reo apela, dra nandefa anereo tagny atragno mezy. ⁴ Fa reo poni ze niparitaky dra nandeha nitory gny teny. ⁵ Filipo dra nizoso tagny amigny tanan-dehibenigny Samaria dra nitory an'i Kristy tamin'ereo . ⁶ Gny fa nahare vo nahita reo famatara ze nataon'i Filipo gny vahoaky maro, dra nifatiky soa tamize zinakany ereo. ⁷ Reo Fagnahy maloto dra niboaky tamireo maro ze nilirany, nihiaky fatrasy, dra maro tamireo malemy vo kilemay gny nisitrany. ⁸ Noho izay dra nisy fifalia lahibe tao amigny tanan-dehibe. ⁹ Fa nisy lelahy raiky natao ho Simona zay tao amigny tanan-dehibe ao, ze vo sela gny panao olo; matetiky napitolagaga reo vahoakinigny Samaria izy, gny fa mitalily fa izy dra olo manan-daza. ¹⁰ Reo Samarita aby, monomboky amigny maraiky dra hantramigny lahibe indrindra, dra niteno soa anazy, dra hoy ereo ho: "Io lelahy io dra gny fehefan'Agnahary ze atao ho lahibe." ¹¹ Ereo dra niteno anazy, akory izy dra napitolagaga anereo fa nandrisy gny fotoa ela tamireo oliny. ¹² Fa gny fa nino an'i Filipo ereo noho izy nitory gny filazasara momba gny fazakan'Agnahary vo gny agnaran'i Jesosy Kristy, dra natao batisa ereo, na lelahy na apela. ¹³ Na i Simona aza dra nino, dra tafaranigny nanova batisa anazy dra nizano niaraky tamin'i Filipo avo izy. Gny fa nahita reo famatara vo asa lahibe ze niseho izy, dra gaga. ¹⁴ Dra gny fa renin'reo apostoly ao Jerosalema fa nitakasy gny zakan'Agnahary Samaria, dra nalefan'ereo tagny amin'ereo i Petera vo i Jaona. ¹⁵ Gny fa nizoso ereo, dra nivavaky ho anereo ereo, ba mety hitakaran'ereo gny Fagnahy Masy. ¹⁶ Fa mandrapahavian'izay fotoa zay, dra bo sy nisy nilasahanigny Fagnahy mihisy ereo; fa vita batisa tamigny agnaran'i Topo Jesosy avo. ¹⁷ Boak'eo i Petera vo i Jaona dra nametraky gny tagnany teo amin'ereo, dra nitakasy gny Fagnahy Masy ereo. ¹⁸ Dra gny fa hitan'i Simona fa gny Fagnahy Masy dra natolosy teo atagnan'ireo apostoly tamigny alalanigny fametraha-tagna, dra nameny vola ereo. ¹⁹ Hoy izy ho: "Ameo anahy avo koa zay fahefa zay, dra ze ametrahako tagna dra mety hitakasy gny Fagnahy Masy." ²⁰ Fa hoy i Petera taminazy ho: "Ho levo miaraky aminao anie gny volafosinao, akory hanao nieriserisy gny hahazo gny fagnomezan'Agnahary amigny alalanigny vola. ²¹ Hanao dra sy mana azara na apahany amizay raha zay, akory gny fonao dra sy mary amin'Agnahary. ²² Noho izay mibebaha amigny faharasianao dra mivavaha amy Topo, so ba mety hamela gny fagnirianigny fonao Izy. ²³ Fa izaho mahita fa hanao dra voapoizinigny lolo-po vo voafehiny gny fahota hanao." ²⁴ Simona namaly dra nizaka ho: "Mivavaha amigny Topo ho anahy, ba sy hisy hitranga aminahy reo ze nizakanao. ²⁵ Gny fa nozoro vavolombelo vo nitalily gny zakanigny Topo ereo, dra nihery tagny aJerosalema agny i Petera vo i Jaona, nitory gny Filazasara tamireo tana maro ao Samaritana. ²⁶ Dra nisy azenigny Topo nizaka tamin'i Filipo sady nizako ho: "Misangana vo mandehana magnasimonigny lala mizoso boaky a Jerosalema magnagny aGaza agny igny." ( Io lala io dra agny agnefisy.) ²⁷ Dra nisanga izy vo nandeha. Ingo, nisy lelahy boak'agny Etiopia, tandapanigny Kandasy, pazaka apelan'ireo Etiopiana. Izy gny nendrekisy gny raha aby. Avy tagny Jerosalema izy ba hidera. ²⁸ Dra noly izy dra nipetraky teo amigny kalesiny, dra namaky gny zakan'Isaia paminany. ²⁹ Dra gny fagnahy nizaka tamin'i Filipo ho: "Mandehana dra ka miala lavisy an'io kalesy io." ³⁰ dra nihazakazaky nagnato anazy izy, dra nahare anazy namaky gny teny tao amin'Isaia paminany, dra nizaka ho: "Azona ra raha vakinao hoky io?" ³¹ Nizaka gny Etiopia nanao anizahoky ho: "Ino gny hahafatarako, raha sy misy olo mitari-dala anahy?" Niangavy an'i Filipo izy ba hagnato gny kalesa dra hipetraky hiaraky aminazy. ³³ Fa tamigny fagnalam-baraka anazy dra nala taminazy gny rariny. Iza gny afaky hamarisy tateraky reo taranany? Nohonigny ainy nala teto atany." ³⁴ Noho izay dra nagnotany anigny tandapa i Filipo, nanao anizahoky ho: "Mitalao aminao zaho, iza gny zakan'io paminany io, gny vatany avo, sa olo-kafa?" ³⁵ Nanomboky nizaka i Filipo, dra nanomboky tamizay sorasy masy zay gny nitoriny gny filazasara momba an'i Jesosy taminazy. ³⁶ Gny fa nandeha tegny an-dala ereo, dra nagnato tegny amize nisy rano ereo dra hoy tandapa ho: "Ingo, misy rano eto. Ino gny mahakasiky anahy sy atao batisa?" ³⁷ (Fagnamarigna: Hoy Filipo ho: "Raha mino amigny fonao manotolo hanao, dra afaky atao batisa." Gny Etiopia namaly ho: "Mino zaho fa Jesosy kristy gny Zanan'Agnahary."') ³⁸ Dra nasanigny Etiopia nazano gny Kalesa. Nizoso nagnegny amigny rano ereo, i Filipo vo gny tandapa, dra nataon' Filipo batisa izy. ³⁹ Gny fa niboakby gny rano ereo, dra nandesinigny Fagnahinigny Topo i Filipo, dra sy hitanigny tandapa sasy izy, fa nandeha ta-pifalia tegny amigny lalany. ⁴⁰ Fa i Filipo dra niseho tagny Azota dra nitety io farisy io izy, nitory gny filazasara eraky gny tanan-dehibe aby mandrapahavianigny tany Kaisara.