¹ Dra reo apostoly vo reo rahalahiny ze tagny Jodia nahare fa reo Jentilisa avo koa dra nitakasy gny Zakan'Agnahary. ² Gny fa niakasy tagny Jerosalema i Petera, reo ze tao amigny atokon'ireo voatapaky dra nagnakia anazy; ³ hoy ereo ho: "Hanao nikamba niaraky tamireo lelahy sy tinapaky sady nihina niaraky tamin'ereo!" ⁴ Fa Petera nanomboky nagnazava gny raha-nitranga tamin'ereo tamigny asipirihany; hoy izy ho: ⁵ "Nivavaky tagny amigny tananigny Jopa zaho, dra nahita fahita gny amigny fisian-draha raiky ze nizoso, manahaky gny lamba lahibe nahily boak'agny andagnisy tamireo zorony efasy zaho. Nizoso teo aminahy zay. ⁶ Nibazy anizay zaho dra nisaisay momba anizay. Nahita reo biby mana-tombony efasy gny tany, reo biby dia, reo bibi mandaly, vo reo voro egny amigny lagnisy zaho. ⁷ Boak'eo zaho dra nahare feo nizaka taminahy ho: "Misangana, ry Petera; mamono dra mihinana." ⁸ Hoy zaho ho: "Aha, ry Topo; fa sy bo nisy raha sy masy na maloto mihisy nilisy tato am-bavako." ⁹ fa gny feo namaly boaky andagnisy agny ho: "Ze zinakan'Agnahary fa malio, aza ka ato ho maloto." ¹⁰ Niseho itelo zay, dra boak'eo dra nalany nihery niakasy tagny andagnisy ndraiky gny raha aby. ¹¹ Ingo, teo no ho eo dra nisy telo lahy nisanga teo anoloanigny tragno nisy anay; nalefako boak'agny Kaisaria nagnagny aminahy ereo. ¹² Gny Fagnahy dra nandidy anahy hiaraky amin'ereo, dra sy tokony hagnisy fagnatia tarehy amin'ereo zaho. reo rahalahy enina reo dra nandeha niaraky taminahy, dra nagnao atragnonigny lelahy zahay. ¹³ Izy nizaka taminay gny nahita azely raiky nisanga taminay gny nahitany azely raiky nisanga tao atragnony dra nizaka ho: "Magniraha lelahy agny Jopa dra andeso mihery i Simona ze atao ho i Petera. ¹⁴ Izy dra nizaka hafasy raiky aminao ze havoavozy anao_Hanao vo gny akohonanao aby. ¹⁵ Raha vo manomboky nizaka tamin'ereo zaho, gny Fagnahy masy dra niavy tamin'ereo, manahaky gny nizosoany taminay tagny ambolohany. ¹⁶ Saroako gny zakanigny Topo, gny nizakany ho: "Jaona nanao batisa tamigny rano vatany; fa handrareo dra mila hatao batisa ao amigny Fagnahy Masy." ¹⁷ Ko raha Zagnahary nagnome anereo gny fagnomeza mitovy amize nameny asika tamy isika nino anigny Topo Jesosy Kristy, iza zaho, gny ho afaky hanohy an'Agnahary?" ¹⁸ Gny fa ren'ereo zay raha zay, sy nizaka na ino na ino hindesi-mamaly ereo, fa nidera an'Agnahary koa ereo dra nizaka ho: "Dra Zagnahary nameno Fibebaha ho fiegna ho anireo Jentilisa avo koa." ¹⁹ Dra reo ze naparitaky noho gny fagnezeha ze niatomboky tamigny fahafatesan'i Stefana dra niely lavisy tagny Foinika agny, Kyprosy, dra Antioka, fa ereo dra nizaka gny hafasy momba an'i Jesosy tamireo Jiosy reo avo. ²⁰ Fa gny ilany tamin'ereo, dra lelahy boaky a Kyprosy agny vo Kyrena agny, dra nandeha tagny Antioka, dra nizaka tamireo Grika avo koa, nizaka tamin'ereo gny filazasara momba gny Topo Jesosy. ²¹ Gny tagnanigny Topo dra niaraky tamin'ereo; maro isa gny nino vo nitoloky tamigny Topo. ²² Reo vaovao momba anereo dra avy egny asofonigny fengona tao a Jerosalema, dra ereo nagniraky an'i Barnabasy hatragny Antioka. ²³ Gny fa avy izy dra nahita gny fagnomezan'Agnahary, dra ravoravo izy; dra izy napahery anazy aby ba hitoby miaraky amigny Topo amigny fon'ereo aby. ²⁴ Akory izy dra lelahy soa sady feno gny Fagnahy masy vo Finoa, dra olo maro gny niapy ho anigny Topo. ²⁵ Dra nandeha nagna Tarsosy agny i Barnabasy ba hitalia an'i Saoly. ²⁶ Gny fa hitany izy, dra nizaka ta Atioka agny. Dra nandrisy gny heritao magnizisy ereo dra niara-niango niaraky tamigny fengona dra napianasy olo maro. Reo pianasy dra tonoka volohany ho Kristiana tao Antioka. ²⁷ Dra tamizay andro zay dra nisy paminany maromaro nizoso boak'agny a Jerosalema agny nagnagny Antioka. ²⁸ Raiky tamin'ereo, i Agabo gny itokava anazy, nisanga dra natoronigny Fagnahy fa hisy mosary lahibe hitranga manera anizao totolo izao. Nitranga zay tamigny andron'i Klaodio. ²⁹ Noho izay, reo pianasy, araky gny fahafahanigny sirairay aby, dra nanapakevisy gny handefa fagnapia ho anireo rahalahy tagny Jodia. ³⁰ Nanao anizay ereo; nandefa vola ho anireo loholo ereo tamigny tagnan'i Barnabasy vo i Saoly.